ႁႅင်းၵၢၼ်မိူင်းႁူမ်ႈတုမ် ဢၼ်လုၵ်ႉတၢင်းမိူင်းၶႄႇ ပွၵ်ႈၶဝ်ႈမႃးတၢင်းမူႇၸေႊ ႁိမ်း 1 ႁဵင်ၵေႃႉၼၼ်ႉ ႁူပ်ႉတၢင်း ယၢပ်ႇၽိုတ်ႇ လွင်ႈတီႈယူႇတၼ်းသဝ်းလႄႈ လွင်ႈၶဝ်ႈၼမ်ႉတၢင်းၵိၼ်။

တႄႇဢဝ် ဝၼ်းတီႈ 3/4/2020 ထိုင် ဝၼ်းတီႈ 11/5/2020 မႃးၼႆႉ ႁႅင်းၵၢၼ်မိူင်းႁူမ်ႈတုမ် ဢၼ်လုၵ်ႉတၢင်း မိူင်းၶႄႇ ပွၵ်ႈၶဝ်ႈမႃးတၢင်းၽၵ်းတူလူင် (သူၺ်ႇၼၢင်းတေႃႇၵဵတ်ႉ) ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ မီးႁူဝ်ၵူၼ်း ၸမ် 1 ႁဵင်ၵေႃႉယဝ်ႉ။ ႁႅင်းၵၢၼ်ၸိူဝ်းၼႆႉ မိူဝ်ႈလဵဝ် ဢွၼ်ၵၼ်ထူပ်းလွင်ႈယၢပ်ႇၽိုတ်ႇ လွင်ႈတီႈယူႇတၼ်းသဝ်းလႄႈ လွင်ႈၵိၼ်ယႅမ်ႉၵၼ် ဝႃႈၼႆ။

ၵူဝ်ႇယၢၼ်ႇၸူဝ်း ႁႅင်းၵၢၼ်ဢၼ်လုၵ်ႉတၢင်းမိူင်းၶႄႇ ပွၵ်ႈမႃးၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ႁႅင်းၵၢၼ်ႁဝ်းၶႃႈ ဢၼ်ပွၵ်ႈမႃးၼႆႉ လႆႈၸွမ်းၶေႃႈၸီႉသင်ႇၽူႈမီးပုၼ်ႈၽွၼ်းၶဝ်တမ်းဝၢင်းဝႆႉပၼ်သေ ႁဝ်းၶႃႈယူႇဝႆႉတီႈမူႇၸေႊၼႆႉ မီး 3 ဝၼ်းယဝ်ႉ။ တီႈၼႆႈၵူၼ်းၵေႃႈၼမ်၊ လွင်ႈၵိၼ်ယႅမ်ႉလဵင်ႉလူၵေႃႈ မီးၵူၼ်းမႃးၸႃႇၵ တွၼ်ႈၵၢင်ၼႂ် ၸဝ်ႉၵူၺ်း၊ လိူဝ်ၼၼ်ႉ လႆႈသိုဝ်ႉၵိၼ်မူတ်းၶႃႈယဝ်ႉ။ ယွၼ်ႉၼၼ် ႁဝ်းၶႃႈ ၵူဝ်ငိုၼ်းဢမ်ႇပေႃး တွၼ်ႈတႃႇတေ ပၼ်ၵႃႈၵႃး ပွၵ်ႈႁိူၼ်းၶႃႈ” ဝႃႈၼႆ။

ႁႅင်းၵၢၼ်ၸိူဝ်းပွၵ်ႈၶဝ်ႈမႃးၼႆႉ ၵမ်ႈၼမ် ႁဵတ်းၵၢၼ်ၼႂ်းသူၼ်ဢွႆႈ။ ၽွင်းတၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈၼႆႉ ဢမ်ႇလႆႈငိုၼ်းလိူၼ်တဵမ်လႄႈ မီးငိုၼ်းၵိုၵ်းတူဝ်ဝႆႉဢေႇ။ ယွၼ်ႉၼၼ်လႄႈ တုၵ်းယွၼ်းႁႂ်ႈလႆႈပွၵ်ႈမိူဝ်းၶိုၼ်းႁိူၼ်းယေးၽႂ်မၼ်း ၵွၼ်ႇငိုၼ်း တေမူတ်းသဵင်ႈၼႆႉ ဝႃႈၼႆ။

ဢွင်ႈတီႈယူႇ ဢၼ်ဝႆႉႁႅင်းၵၢၼ် တီႈမူႇၸေႊၼၼ်ႉ လုၵ်ႈဢွၼ်ႇၵေႃႈမီး ၼၢင်းယိင်းပႃးတွင်ႉၵေႃႈမီးလႄႈ လွင်ႈယူႇသဝ်း ၵိၼ်ယႅမ်ႉၵေႃႈ ပဵၼ်ဢၼ်ယၢပ်ႇၽိုတ်ႇတႄႉတႄႉ ဝႃႈၼႆ။

မၸႃႇၶျီႇ ႁႅင်းၵၢၼ် လၢတ်ႈတီႈၽူႈတွႆႇႁွၵ်ႈဝႃႈ “တီႈၼႆႈၼႆႉ ၵူၼ်းၵေႃႈၼမ်၊ လုၵ်ႈဢွၼ်ႇလႄႈ ၵူၼ်းပႃးတွင်ႉၵေႃႈမီး။ ယဝ်ႉၵေႃႈ တီႈၼွၼ်းၵေႃႈ ႁူမ်ႈၵၼ်တင်းမူတ်းၶႃႈယဝ်ႉ” ဝႃႈၼႆ။

ႁႅင်းၵၢၼ်ၸိူဝ်းပွၵ်ႈမႃးယူႇဝႆႉတီႈမူႇၸေႊၼၼ်ႉ ယူႇတီႈၽႂ်မၼ်းသေ ႁၢင်ႈႁႅၼ်းၶႂ်ႈပွၵ်ႈမိူဝ်းၶိုၼ်း ဝၢၼ်ႈမိူင်းႁိူၼ်းယေး ၽႂ်မၼ်းယဝ်ႉ ဝႃႈၼႆ။

ၼႂ်းမိူင်းတႆးၼႆႉ ႁႅင်းၵၢၼ် ဢၼ်ၵႂႃႇႁဵတ်းၵၢၼ် မိူင်းႁိမ်းႁွမ်းသေပွၵ်ႈၶဝ်ႈမႃးၶိုၼ်းၼၼ်ႉ တၢင်းတႃႈၶီႈလဵၵ်းၵေႃႈမီး၊ တၢင်းမိူင်းလႃးၵေႃႈမီး၊ တၢင်းလၢဝ်ႇၵၢႆးၵေႃႈမီး၊ တၢင်းမူႇၸေႊ ၵေႃႈမီး။