ၶွမ်ႊမတီႊၸႄႈတွၼ်ႈမူႇၸေႊ တႅမ်ႈလိၵ်ႈသူင်ႇၸူး မိူင်းၶႄႇ တႃႇၵူၼ်းမိူင်းၼႂ်းပိုၼ်ႉတီႈ တေၸၢင်ႈတေႃႉၶဝ်ႈၵၢပ်ႇ သူင်ႇၶၢႆၸူးတၢင်းမိူင်းၶႄႇ တေႃႇထိုင်မိူဝ်ႈၼႆႉ လူင်ပွင်ၸိုင်ႈမိူင်းၶႄႇ ပႆႇတွပ်ႇလၢတ်ႈသင်မႃး ။
ဝၼ်းတီႈ 11/5/2020 ယူႇတီႈၶွမ်ႊမတီႊၸႄႈတွၼ်ႈ မူႇၸေႊ ၸိုင်ႈတႆးပွတ်းႁွင်ႇ ႁဵတ်းလိၵ်ႈသူင်ႇၸူး ထိုင်တၢင်း လူင်ပွင်ၸိုင်ႈမိူင်းၶႄႇထႅင်ႈ၊ တုၵ်းယွၼ်းႁႂ်ႈပိုတ်ႇၽၵ်းတူပၼ်ၵူၼ်းပိုၼ်ႉတီႈ လႆႈတေႃႉၶဝ်ႈၵၢပ်ႇသူင်ႇၶၢႆၸူး တၢင်းမိူင်းၶႄႇ၊ ယွၼ်ႉဝႃႈ ၸဝ်ႈသူၼ်ၶဝ်ႈၵၢပ်ႇ တၢင်းပွတ်းထုင်ႉမၢဝ်း ႁူပ်ႉလွင်ႈယၢပ်ႇၽိုတ်ႇလိူဝ်ႁႅင်း။
ၸၢႆးၵျေႃႇတဵင်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းသုၵ်းပူၼ်ႉမႃးၼၼ်ႉ တၢင်းမိူင်းၶႄႇ လႄႈ မိူင်းႁဝ်း (မိူင်းႁူမ်ႈတုမ်) ႁူပ်ႉဢုပ်ႇၵၼ်သေ ႁဝ်းၶႃႈ တုၵ်းယွၼ်း ၶဝ်ၵေႃႈပႆႇတွပ်ႇမႃးၶႃႈ။ မိူဝ်ႈဝႃးၵေႃႈ ႁဵတ်းလိၵ်ႈဢွၵ်ႇထႅင်ႈသေ သူင်ႇၸူးတၢင်းမိူင်းၶႄႇထႅင်ႈ ၶဝ်ဝႃႈ ၶဝ်တေဢုပ်ႇၵၼ်သေ ပွင်ႇပၼ်ၶိုၼ်း ၼႆသေတႃႉ တေႃႇထိုင်ယၢမ်းလဵဝ်ၼႆႉ ပႆႇပွင်ႇၶၢဝ်ႇမႃး ၶိုၼ်း” ဝႃႈၼႆ။
ဢိင်ၼိူဝ်လွင်ႈၸဝ်ႈၼႃႈတီႈၶႄႇပိၵ်ႉဢိုတ်းတၢင်းၶဝ်ႈဢွၵ်ႇ လႅၼ်လိၼ်တႆး – ၶႄႇၼႆႉသေ တုမ်ႉယွၼ်ႈၸဝ်ႈသူၼ် ၶဝ်ႈၵၢပ်ႇၶဝ်ႁႅင်း ။ ၸဝ်ႈသူၼ်မၢင်ၵေႃႉ ဢဝ်ၶဝ်ႈၵၢပ်ႇထွၵ်ႇပႅတ်ႈၼႂ်းၼမ်ႉမၢဝ်း ၊ မၢင်ၵေႃႉ ထွၵ်ႇပႅတ်ႈပဵၼ်ၵေႃႇပဵၼ်ၵွင် ၸွမ်းၶၢင်ႈတၢင်း၊ မၢင်ၸိူဝ်းဢဝ်ၵႂႃႇၸႃႇၵ ပၼ်ပီႈၼွင်ႉ ဢူၺ်းၵေႃႉ ၵူၼ်းမိုတ်ႈၵိုဝ်း ၼႂ်းၶူးၼႂ်းဝဵင်း ၊ သႂ်ႇထူဝ်ႈသေ ၸႅၵ်ႇပၼ်ၵူၼ်းၵႂႃႇမႃး ၸွမ်းတၢင်း ၸိူဝ်းၼႆႉၵေႃႈမီး ။
ၸၢႆးပီး ၸဝ်ႈသူၼ်ၶဝ်ႈၵၢပ်ႇ မူႇၸေႊလၢတ်ႈဝႃႈ – ၸဝ်ႈသူၼ် ပွတ်းထုင်ႉမၢဝ်း ဢၼ်တေႃႉၶဝ်ႈၵၢပ်ႇၵႂႃႇၶၢႆမိူင်းၶႄႇသေ ထုၵ်ႇပလိၵ်ႈၶႄႇတီႉၺွပ်း ဝႆႉၵေႃႈ မီးတင်းၼမ် – ဝႃႈၼႆ။
မိူဝ်ႈႁၢင်လိူၼ်ဢေႊပရိူဝ်ႊပူၼ်ႉမႃးၼၼ်ႉ တီႈဝဵင်းမူႇၸေႊ မီးၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ၵေႃႉၼိုင်ႈ၊ ယွၼ်ႉလွင်ႈၼႆႉသေ တၢင်းၾၢႆႇၸဝ်ႈၼႃႈတီႈၶႄႇ သင်ႇပိၵ်ႉဢိုတ်းတၢင်းၶဝ်ႈဢွၵ်ႇ ၸွမ်းလႅၼ်လိၼ် ၵမ်ႈလဵဝ် ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ လၢတ်ႈၼႄၼင်ႇၼႆ။
တေႃႇထိုင်ယၢမ်းလဵဝ် လူင်ပွင်ၸိုင်ႈတၢင်းမိူင်းၶႄႇ ဢမ်ႇတွပ်ႇလၢတ်ႈပၼ်သင် ဝႃႈတေပိုတ်ႇ ဢမ်ႇပိုတ်ႇပၼ် ၵူၼ်းမိူင်းတေႃႉသူင်ႇၶဝ်ႈၵၢပ်ႇၶၢႆ မိူင်းၶႄႇ၊ ယူႇတီႈၸဝ်ႈသူၼ်ၶဝ်ႈၵၢပ်ႇၶဝ် လႆႈဢွၼ်ၵၼ်ပႂ်ႉထွမ်ႇၶၢဝ်ႇ ထွမ်ႇငၢဝ်း ငဝ်းလၢႆး ဝႆႉယူႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ