ႁႅင်းၵၢၼ်မိူင်းႁူမ်ႈတုမ် လုၵ်ႉမိူင်းထႆး ပွၵ်ႈၶဝ်ႈ တႃႈၶီႈလဵၵ်း တၢင်းၶူဝ်မိုတ်ႈၵိုဝ်းမၢႆ 2 ထႅင်ႈပဵၼ်ပွၵ်ႈၵမ်း 4 မီး ပႃးၵူၼ်း လူမ်းမႆႈသုင်လႄႈ ၺႃးၵုမ်းတူဝ် ၼပ်ႉႁူဝ်သိပ်း။
ႁႅင်းၵၢၼ်မိူင်းႁူမ်ႈတုမ် ဢၼ်ၺႃးပလိၵ်ႈထႆး တီႉၺွပ်းၼၼ်ႉထုၵ်ႇသူင်ႇတူဝ်ပွၵ်ႈၶိုၼ်းတၢင်းၶူဝ်မၢႆ 2 တႃႈၶီႈလဵၵ်းမိူဝ်ႈ ဝၼ်းတီႈ 6/5/2020 ။ ၼႂ်းၼၼ်ႉ တင်းမူတ်း မီး 37 ၵေႃႉ ၊ တေႃႈလဵဝ် ထုၵ်ႇၵုမ်းတူဝ် Quarantine ဝႆႉ ဝႃႈၼႆ။
ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်းလႄႈ ၽူႈတူင်ႉၼိုင် ၼႂ်းၸုမ်းၸွႆႈထႅမ်ႁႅင်းၵၢၼ် လၢတ်ႈတီႈၽူႈတွႆႇႁွၵ်ႈဝႃႈ- “ ႁႅင်းၵၢၼ်မိူင်းႁူမ်ႈတုမ် ဢၼ်ပွၵ်ႈၶဝ်ႈမႃးတၢင်းတႃႈၶီႈလဵၵ်း တီႈၶူဝ်မိုတ်ႈၵိုတ်းမၢႆ 2 ၼႆႉ ပွၵ်ႈၼႆႉပဵၼ်ပွၵ်ႈတီႈ 4 မီးၵူၼ်း 37 ၵေႃႉ။ ၼႂ်းၶဝ်ၼၼ်ႉ သမ်ႉပႃးၵူၼ်းၼိူဝ်ႉမႆႈ မီးလူမ်းၼၢဝ်မႃးၵေႃႉၼိုင်ႈလႄႈ ယၢမ်းလဵဝ်လႆႈၵုမ်းတူဝ်ၶဝ်ဝႆႉ တႃႇၶၢဝ်းတၢင်း 14 ဝၼ်းၶႃႈ ၊ မိူဝ်ႈပူၼ်ႉမႃးၸုပ်ႈၵမ်းဢွၼ်တၢင်းၼၼ်ႉ လႆႈၸတ်းသူင်ႇပွၵ်ႈမိူဝ်း မိူင်းၽႂ်မၼ်းၵမ်းလဵဝ်ၶႃႈဢေႃႈ။ ”- ဝႃႈၼႆ။
ႁႅင်းၵၢၼ်ၸိူဝ်းပွၵ်ႈမႃးၼႆႉ ပွၵ်ႈၵမ်းၼိုင်ႈ မီးႁူဝ်ၵူၼ်း 92 ၵေႃႉ၊ ပွၵ်ႈသွင် 200 ၵေႃႉ၊ ပွၵ်ႈသၢမ် 62 ၵေႃႉလႄႈ ပွၵ်ႈသီႇ ၵမ်းၼႆႉသမ်ႉ 37 ၵေႃႉ ။ ၵမ်ႈၽွင်ႈၸိူဝ်းလုၵ်ႉတီႈၵႆ မိူၼ်ၼင်ႇတၢင်းၵုင်းထဵပ်ႈၸိူဝ်းပုၼ်ႉမႃး ထိုင်မႄႈသၢႆ ပလိၵ်ႈထႆး လႆႈၵုမ်းတူဝ် ဝႆႉၵမ်းၼိုင်ႈသေ ၸင်ႇသူင်ႇၶၢမ်ႈၶူဝ်မႃးၵေႃႈမီး။
ၸၢႆးၼုမ်ႇတုၺ်ႈလၢတ်ႈဝႃႈ ဢၼ်ပၼ်သဵၼ်ႈမၢႆၸိုဝ်ႈ တီႈလုမ်းၽွင်းတၢင် မၢၼ်ႈ တီႈၵုင်းထဵပ်ႈၼၼ်ႉသေ ပွၵ်ႈမႃးတႄႉ ပႆႇမီးသေၵေႃႉ။ ဢၼ်ပွၵ်ႈမႃးၸိူဝ်းၼႆႉ ၵမ်ႈၼမ်ပဵၼ်ဢၼ်ထုၵ်ႇတီႉၺွပ်း ယွၼ်ႉတၢင်းၽိတ်းသေပိူင်ပိူင် သေ သူင်ႇတူဝ်ပွၵ်ႈႁိူၼ်း ဝႃႈၼႆ။
ၾၢႆႇၸွႆႈထႅမ်ႁႅင်းၵၢၼ်တီႈတႃႈၶီႈလဵၵ်းလၢတ်ႈဝႃႈ – “တီႈၸႄႈဝဵင်းတႃႈၶီႈလဵၵ်းၼႆႉ မိူဝ်ႈဢွၼ်တၢင်း ႁၢင်ႈႁႅၼ်းဝႆႉ တႃႇၵုမ်းတူဝ် Quarantine ဝႆႉ ယူႇသေတႃႉ တေႃႈလဵဝ်တႄႉ ဢမ်ႇ ၵုမ်းတူဝ်ယဝ်ႉ၊ ၸတ်းပၼ်ၵႃးသေ သူင်ႇပွၵ်ႈမိူင်းၽႂ်မၼ်းၵမ်းလဵဝ် ႁႂ်ႈမိူဝ်းၵုမ်းတူဝ် ဢွင်ႈတီႈၽႂ်မၼ်း ”ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် ဢၼ်ထုၵ်ႇပလိၵ်ႈထႆးတီႉၺွပ်းသေ သူင်ႇပွၵ်ႈၶဝ်ႈမႃးၼၼ်ႉ ယူႇတီႈၽူႈမီးပုၼ်ႈၽွၼ်း လႆႈၵဵပ်ႈသဵၼ်ႈၸိုဝ်ႈလႄႈ ပိုၼ်းတူဝ်ဝႆႉ ။ ဢမ်ႇပႃးမၢႆၾၢင်ၵေႃႈ ပွၵ်ႈလႆႈယူႇ၊ ႁႅင်းၵၢၼ် ဢၼ်ပွၵ်ႈၶဝ်ႈမႃးတၢင်းတႃႈၶီႈလဵၵ်းၼႆႉ ၵမ်ႈၼမ်ပဵၼ်ၵူၼ်းမိူင်းတႆး ဝႃႈၼႆ။
မိူဝ်ႈဝၼ်းတီႈ 8/5/2020 ၼၼ်ႉၵေႃႈ ႁႅင်းၵၢၼ်မိူင်းႁူမ်ႈတုမ် လုၵ်ႉမိူင်းလၢဝ်း ပွၵ်ႈမႃး တႃႈၶီႈလဵၵ်း မႃးတၢင်းဢိူင်ႇမိူင်းၽူင်းမီး 131 ၵေႃႉ ၊ ၼႆႉၵေႃႈလႆႈ သူင်ႇပွၵ်ႈမိူဝ်းမိူင်းၽႂ်မၼ်းၵမ်းလဵဝ်ယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ