ၸွမ်သိုၵ်းလူင် မိၼ်းဢွင်ႇလႅင်ႇ မႃးသူႇၸႂ်းဢႅဝ်ႇယဵမ်ႈ တီႈၵဵင်းတုင် ၸိုင်ႈတႆးပွတ်းဢွၵ်ႇၶူင်းသေ ႁူပ်ႉထူပ်းဢုပ်ႇဢူဝ်း လၢႆလၢႆၸုမ်း ပႃးၸဵမ်ၸုမ်းၵူၼ်းမိူင်း။

မိူဝ်ႈဝၼ်းတီႈ 10/5/2020 ယၢမ်းၵၢင်ဝၼ်း ၸွမ်ၸိၵ်းသိုၵ်းလူင် မိၼ်းဢွင်ႇလႅင်ႇႁွတ်ႈထိုင်ၵဵင်းတုင် ယူႇတီႈၵူၼ်းမိူင်း ၵဵင်းတုင်၊ ၸဝ်ႈၼႃႈတီႈ ၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး (NDAA )လႄႈၸုမ်းဝႃႉ UWSA ႁူပ်ႉဢုပ်ႇၵၼ် တင်းၸွမ် သိုၵ်းလူင် မိၼ်းဢွင်ႇလႅင်ႇ ၽူႈၵွၼ်းသိုၵ်းသုင်သုတ်း တပ်ႉသိုၵ်းလူင်ပွင်ၸိုင်ႈမၢၼ်ႈ တီႈတိူင်းသိုၵ်းသၢမ်ၸဵင်ႇ (ၵဵင်းတုင်) ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။ ႁူပ်ႉထူပ်းဢုပ်ႇဢူဝ်းၵၼ် ၵဵဝ်ႇၵပ်းလူၺ်ႈတၢင်းပဵၼ်ၶူဝ်ႊဝိတ်ႉ – 19 ငဝ်းလၢႆးၼႂ်းပိုၼ်ႉတီႈ ၽႂ်မၼ်း-ၼႆယဝ်ႉ။

လုင်းၸၢႆးႁွင်ၶမ်း ပေႃႈၾႃႉမႄႈမိူင်း ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ- “ ၸႂ်ႈၶႃႈယဝ်ႉ၊ တပ်ႉၶျူၵ်ႉမႃး မိူဝ်ႈဝၼ်းတီႈ 9 ၼွၼ်းၶိုၼ်းၼိုင်ႈသေ ဝၼ်းတီႈ 10 တႄႉ ပွၵ်ႈမိူဝ်းၵႂႃႇယဝ်ႉ။ ယူႇတီႈႁဝ်းၶႃႈ ၵူၼ်းမိူင်းတုၵ်းယွၼ်းတႄႉ ၶႂ်ႈႁႂ်ႈၶဝ်ၸဝ်ႈ ႁဵတ်းၾၢႆပၼ်ဢိတ်းၼိုင်ႈ ၵွပ်ႈပိူဝ်ႈဝႃႈ တၢင်းၵၢတ်ႇၾႃႉ၊ ယၢင်းၵဵင်၊ ၵၢတ်ႇတဝ်ႇ ၸိူဝ်းၼႆႉ ၼမ်ႉႁႅင်ႈၼႃႇ ၼမ်ႉၼႃးဢမ်ႇမီး တႃႇၽုၵ်ႇသွမ်ႈ။ ယွၼ်ႉဝႃႈ တၢင်းသၢႆၼၼ်ႉ မၼ်းမီးၼမ်ႉတူၵ်းတၢတ်ႇဝႆႉလႄႈ ႁႂ်ႈႁဵတ်းၼွင်လူင်ပၼ်သေ ပွႆႇၼမ်ႉပၼ် ၸဝ်ႈႁႆႈၸဝ်ႈၼႃးႁဝ်း ႁႂ်ႈလႆႈမီးၼမ်ႉၸႂ်ႉတႃႇၽုၵ်ႇသွမ်ႈၵၼ် ၸိူဝ်းၼႆႉ” ဝႃႈၼႆ။

တၢင်းပွတ်းၵဵင်းတုင်ၼႆႉ ၵူၼ်းမိူင်းၵမ်ႈၼမ် ႁဵတ်းၵိၼ်ၵၢၼ်ၽုၵ်ႇသွမ်ႈ ႁႆႈၼႃး ပဵၼ်ၵၢၼ်ႁႃၵိၼ်လဵင်ႉတွင်ႉ၊ တေႃႈလဵဝ် ၼမ်ႉတႃႇတေသႂၢင်းသႂ်ႇ ၵၢၼ်ၽုၵ်ႇသွမ်ႈၼႆႉ ႁူပ်ႉလွင်ႈယၢပ်ႇၽိုတ်ႇဝႆႉ ယွၼ်ႉၼမ်ႉဢမ်ႇပေႃးမီး၊ မၢင်တီႈ ထိုင်တီႈပေႃးလႆႈ ၶုတ်းၼမ်ႉမေႃႇၼႂ်းၼႃးၽႂ်မၼ်းသေ ဢဝ်ၸၢၵ်ႈလုတ်ႇၶိုၼ်ႈသႂ်ႇၼႂ်းၼႃးၶိုၼ်း ၵေႃႈမီး ဝႃႈၼႆ။

လုင်းၸၢႆးႁွင်ၶမ်း သိုပ်ႇလၢတ်ႈဝႃႈ- “လွင်ႈၼႆႉတႄႉ တုၵ်းယွၼ်းထိုင်တီႈၶဝ်ၸဝ်ႈဝႆႉယူႇ တေယူႇတီႈၽူႈမီးပုၼ်ႈၽွၼ်း ၽူႈၵွၼ်းၸႄႈဝဵင်းၶဝ် တေလူင်းပိုၼ်ႉတီႈၵူတ်ႇထတ်းတူၺ်းပၼ်။ ထႅင်ႈၾၢႆႇၼိုင်ႈၵေႃႈ ယူႇတီႈတပ်ႉၶျူၵ်ႉ မႃးဢႅဝ်ႇ သူႇၸႂ်းတီႈတိူင်းသိုၵ်းၵဵင်းတုင်သေ မႃးပၼ်ဝႆႉၶိူင်ႈၸၢၵ်ႈတႃႇၵူတ်ႇထတ်းတၢင်းပဵၼ်ၶူဝ်ႊဝိတ်ႉ – 19 ၼႆႉ တီႈႁူင်းယႃ တပ်ႉသိုၵ်းၶဝ်၊ ယဝ်ႉၵေႃႈ မႃးၸွႆႈၵမ်ႉထႅမ်ပၼ် ၶူဝ်းၶွင်ၵိၼ်ယႅမ်ႉ လႄႈ ငိုၼ်းတွင်း ပၼ်ၵူၼ်းတုၵ်ႉယၢၵ်ႈၸိူဝ်းၼႆႉ ပႃးထႅင်ႈ” ဝႃႈၼႆ။

လိူဝ်သေၼၼ်ႉ မိၼ်းဢွင်ႇလႅင်ႇမႃးၵဵင်းတုင်ပွၵ်ႈၼႆႉ ႁူပ်ႉထူပ်းဢုပ်ႇဢူဝ်းပႃးထႅင်ႈ ၸုမ်းမိူင်းလႃး (ၼႃႈလိ ၼ်ၶိုၵ်ႉတွၼ်းမၢႆ 4 ဢၼ်ၸဝ်ႈၸၢႆးလိုၼ်းဢွၼ်ႁူဝ်) ဢိၵ်ႇ ၸုမ်းဝႃႉ ဢၼ်ယူႇတီႈဢူးၺီႇၵတ်ႉ ဢွၼ်ႁူဝ်မႃးႁူပ်ႉ ထူပ်းၼၼ်ႉ ဝႃႈၼႆ။

လွင်ႈႁူပ်ႉထူပ်းၵၼ်ပွၵ်ႈၼႆႉ လႆႈဢုပ်ႇဢူဝ်းလၢတ်ႈၼႄ ငဝ်းလၢႆး တၢင်းပဵၼ်ၶူဝ်ႊဝိတ်ႉ – 19 ၼႂ်းပိုၼ်ႉတီႈၽႂ်မၼ်း မီးလွင်ႈႁၢင်ႈႁႅၼ်းဝႆႉၸိူင်ႉႁိုဝ် ၸဵမ်ၸိူဝ်းၼႆႉ။ ယူႇတီႈတၢင်းမိၼ်းဢွင်ႇလႅင်ႇၵေႃႈဝႃႈ သင်လူဝ်ႇတၢင်းၸွႆႈထႅမ် လွင်ႈ ၽူႈႁၢပ်ႇၵၢၼ် ၾၢႆႇပၢႆးယူႇလီ တွၼ်ႈတႃႇၼႂ်းၵၢၼ်ယူတ်းယႃၸိုင် ယူႇတီႈတပ်ႉသိုၵ်း တပ်ႉမတေႃႇ တေသူင်ႇၾၢႆႇ ပၢႆးယူႇလီသိုၵ်းပၼ်ၵႂႃႇ၊ လိူဝ်သေၼၼ်ႉ သင်ဝႃႈ လူဝ်ႇၵူတ်ႇထတ်းတၢင်းပဵၼ် ပၢႆးယူႇလီၸိုင် ႁႂ်ႈမႃးၵူတ်ႇ ထတ်းတီႈၵဵင်းတုင်ၼႆႉၵေႃႈလႆႈ ဝႃႈၼႆ။