ၸုမ်းတူင်ႉၼိုင်တူင်ႇဝူင်းတႆး လၢႆမူႇၸုမ်း ႁူမ်ႈၵၼ် ၵႂႃႇပႂ်ႉႁပ်ႉတွၼ်ႈ ၼၢင်းမူၺ်ၶမ်း ၼၢင်းငၢမ်း ၼမ်ႉၶမ်း တီႈၵႂၢင်း ႁိူဝ်းမိၼ် တႃႈၵုင်ႈ မီးပီႈၼွင်ႉၵႂႃႇႁူမ်ၸူမ်းႁပ်ႉတွၼ်ႈ တင်းၼမ်လၢႆ။
ဝၼ်းတီႈ 25/01/2018 ယၢမ်းဝၢႆးဝၼ်း မွၵ်ႈ 3 မူင်းၼၼ်ႉ ၵေႃလိၵ်ႈလၢႆးလႄႈၾိင်ႈငႄႈတႆး တႃႈၵုင်ႈ၊ ၸုမ်းၵူၼ်း ၼုမ်ႇတႆး SYO ႁူမ်ႈလူၺ်ႈ ဢူၺ်းၵေႃႉဢူၺ်းသေႈ ၵႂႃႇပႂ်ႉႁပ်ႉတွၼ်ႈ ၼၢင်းမူၺ်ၶမ်း ၼၢင်းငၢမ်း ၼမ်ႉၶမ်း ဢၼ် တၢင်တူဝ် မိူင်းႁူမ်ႈတုမ်မိူင်းမၢၼ်ႈသေ ၵႂႃႇၶဝ်ႈၶႅင်ႇၼၢင်းႁၢင်ႈလီ Miss All Nation 2017-2018 တီႈမိူင်း ယၢၼ်ႇၵျိၼ်ႊ ၸိုင်ႈမိူင်းၶႄႇၼၼ်ႉသေ လႆႈႁပ်ႉသူးရၢင်းဝလ်း 2 ဢၼ်သေ ပွၵ်ႈၽႅဝ်မႃး ဝႃႈၼႆ။
ၼၢင်းမူၺ်ၶမ်း ၼၢင်းငၢမ်း ၼမ်ႉၶမ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ “ မိူဝ်ႈၼႆႉ လႆႈႁွတ်ႈၽႅဝ်တီႈတႃႈၵုင်ႈ မွၵ်ႈ ယၢမ်း 2 မူင်းၶိုင်ႈပၢႆ၊ ဢၼ်ၼၢင်းလႆႈၵႂႃႇၶဝ်ႈၶႅင်ႇ တီႈမိူင်းၶႄႇမႃးၼႆႉ လႆႈတၢင်းႁူႉၼမ်တႄႉၶႃႈ မိူၼ်ၼင်ႇ လႆႈႁူႉ ၸၵ်းဢူၺ်းၵေႃႉမႂ်ႇ ၶဝ်ႁဵတ်းႁိုဝ်ယူႇ၊ ႁဵတ်းႁိုဝ်ၵိၼ် ၸဵမ်ၸိူဝ်းၼႆႉ ယဝ်ႉၵေႃႈ ၼွင်ႉလႆႈပိုၼ်ၽႄႈၼႄ လွင်ႈ ၾိင်ႈႁိတ်ႈႁွႆးတႆး လွင်ႈယူႇသဝ်းၵိၼ်သၢင်ႈတႆးႁဝ်း ၸိူဝ်းၼႆႉ။ ယဝ်ႉၵေႃႈ မီးတၢင်းၸူမ်းသိူဝ်း ၶွပ်ႈၸႂ်ထိုင် Orgnization ဢၼ် ပဵၼ် Miss Golden land ဢၼ်ယုမ်ႇၸႂ်ၶႃႈႁဝ်းသေ ပၼ်ပုၼ်ႈၽွၼ်းၶႃႈႁဝ်း ဢၼ်လႆႈၵႂႃႇၶႅင်ႇ Miss All Nation ၼႆႉ ယဝ်ႉၵေႃႈ ၼွင်ႉၶတ်းၸႂ် ႁႂ်ႈမၼ်းတဵမ်ထူၼ်ႈ ၼင်ႇႁႅင်းတူဝ်ႁႅင်းၸႂ်မီးၼၼ်ႉၶဝ်ႈၶႅင်ႇမႃး၊ ဢမ်ႇလႆႈသူးထီႉၼိုင်ႈ သေတႃႉ ၼၢင်းလႆႈမႃးသူးသွင်ဢၼ်ၶႃႈ” ဝႃႈၼႆ။
ၼၢင်းမူၺ်ၶမ်း ၼၢင်းငၢမ်းၼမ်ႉၶမ်း ဢၼ်လႆႈတၢင်တူဝ်မိူင်းႁူမ်ႈတုမ်မိူင်းမၢၼ်ႈသေ လႆႈၵႂႃႇၶဝ်ႈၶႅင်ႇ ၼၢင်းႁၢင်ႈလီ Miss All Nation 2017-2018 တီႈမိူင်းၶႄႇၼၼ်ႉ လႆႈသူးရၢင်းဝလ်း Miss Eco Tourism award တင်း Dream of Red Mansions Twelve Nobile-Miaoyu သွင်ဢၼ်ၼႆႉ ဝႃႈၼႆ။
ၼၢင်းမူၺ်ၶမ်း လၢတ်ႈဝႃႈ ဢၼ်ၶႃႈႁဝ်းလႆႈသူးရၢင်းဝလ်း Miss Eco Tourism award ၼႆႉ ၵွပ်ႈၶႃႈႁဝ်း ၵပ်းသိုပ်ႇ လၢတ်ႈလႆႈ ၽႃသႃၵႂၢမ်းလၢတ်ႈ 5 ၽႃသႃ ႁိုဝ်ၵေႃႈဢမ်ႇႁူႉ။ ယွၼ်ႉဝႃႈ ၶႃႈႁဝ်းလႆႈ ၵႂၢမ်းတႆး၊ ၶႄႇ၊ မၢၼ်ႈ၊ ဢင်းၵိတ်းလႄႈ ထႆး ၸိူဝ်းၼႆႉ။ သူးထႅင်ႈဢၼ်ၼိုင်ႈသမ်ႉ ဢၼ်ဝႃႈ Dream of Red Mansions Twelve Nobile-Miaoyu ၼၼ်ႉ ၶူဝ်းၼုင်ႈတၢင်းဝႆၾိင်ႈႁိတ်ႈႁွႆးၸၢဝ်းၶိူဝ်းၽႂ်မၼ်း ၸိူဝ်းၼႆႉသေ ၼၢင်းလႆႈၵႂႃႇ။ ယဝ်ႉၵေႃႈ ၶႂ်ႈယွၼ်းၾၢၵ်ႇတွၼ်ႈထိုင် ၼွင်ႉၼွင်ႉဢၼ်မႂ်ႇဢၼ်တေၶိုၼ်ႈမႃးတၢင်းလင်ၼႆႉထႅင်ႈ သင်ဝႃႈၶႂ်ႈ ႁူႉၶႂ်ႈ ႁၼ် သင်သေဢမ်ႇဝႃႈ ႁဝ်းၵႂႃႇၶႅင်ႇၼႆတေလႆႈႁဵတ်းႁိုဝ်ၼႆ ၶႂ်ႈမႃးတွင်ႈ မႃးထၢမ်လႆႈယူႇၶႃႈ တေၸွႆႈၸီႉၼႄ ပၼ်ၶႃႈ” ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 25/12/2017 ၼၼ်ႉ ၼၢင်းမူၺ်ၶမ်း လႆႈတၢင်တူဝ်မိူင်းႁူမ်ႈတုမ်မိူင်းမၢၼ်ႈသေ ၵႂႃႇၶႅင်ႇၼၢင်းႁၢင်ႈလီ တီႈမိူင်းယၢၼ်ႇၵျိၼ်ႊ တင်းမူတ်း 30 ၸိုင်ႈမိူင်းပၢႆ ဝၼ်းတီႈ 25/01/2018 ၸင်ႇႁွတ်ႈၽႅဝ်ၶိုၼ်း တႃႈၵုင်ႈ ဝႃႈၼႆ။
ၼၢင်းမူၺ်ၶမ်း ၼၢင်းငၢမ်းၼမ်ႉၶမ်းၼႆႉ မိူဝ်ႈဝၼ်းတီႈ 09/07/2017 လႆႈၶႅင်ႇပေႉမိူင်းတႆးပွတ်း ႁွင်ႇတင်းသဵင်ႈ သေ လႆႈႁပ်ႉသူး Miss Golden Land Myanmar သိုပ်ႇၼၼ်ႉ လႆႈတၢင်တူဝ်မိူင်းတႆးပွတ်းႁွင်ႇသေ လႆႈၵႂႃႇၶႅင်ႇ တီႈဝဵင်း လူင်တႃႈၵုင်ႈ။ ပၢင်ၶႅင်ႇဝၼ်းတီႈ 13/10/2017 ၼၼ်ႉ မၼ်းၼၢင်းလႆႈႁပ်ႉလိူၵ်ႈပဵၼ် Miss All Nation Myanmar 2017။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ