ၾူၼ်လူင်လူမ်းလူင်ၽတ်ႉႁၢဝ်ႈႁႅင်း ၼႂ်းၸႄႈဝဵင်းၼမ်ႉၸၢင် လင်ၶႃးႁိူၼ်းၵူၼ်းဝၢၼ်ႈ လႆႈလူႉၵွႆတင်းၼမ်သေ ဝတ်ႉဝႃး (ၵျွင်းမုၼ်ၸဝ်ႈ) ၵေႃႈလူႉၵွႆ ၸွမ်းၵမ်ႈၽွင်ႈ ဝႃႈၼႆ။
ဝၼ်းတီႈ 10/5/2020 ယၢမ်းဝၢႆးဝၼ်း ၾူၼ်လူင်လူမ်းလူင် တူၵ်းၽတ်ႉႁၢဝ်ႈႁႅင်း ၼႂ်းဢိူင်ႇပဵင်းၸႂ် ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း၊ လင်ၶႃႈႁိူၼ်းၵူၼ်းဝၢၼ်ႈ ၵွၵ်း ပိဝ်ၸွမ်းလူမ်း လူႉၵွႆ ဢမ်ႇယွမ်း 150 လင်ပၢႆ။ လိူဝ်သေၼၼ်ႉ ဝတ်ႉဝႃး ၵျွင်းၶရိတ်ႉယၢၼ်ႇ ၸိူဝ်းၼႆႉၵေႃႈလူႉၵွႆၵမ်ႈၽွင်ႈ-ၼႆယဝ်ႉ။
ၻွၵ်ႊတိူဝ်ႊ ဢွင်ႇတၢၼ်းမွင်ႇ ၽွင်းလူင်ၾၢႆႇၸၢဝ်းၶိူဝ်းမၢၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “တေႃႈလဵဝ် တိုၵ်ႉလူင်းပိုၼ်ႉတီႈ သေ ၸွႆႈထႅမ်ၵူၼ်းထူပ်းၽေးႁဝ်းၶႃႈယူႇ၊ လင်ႁိူၼ်းဢၼ်ထုၵ်ႇလူမ်းၽတ်ႉပဝ်ႇလႄႈ လူႉၵွႆၼၼ်ႉ ယူႇတီႈလူင်ပွင်ၸိုင်ႈ မိူင်းတႆး ၵမ်ႉၸွႆႈၼိုင်ႈလင်ႁိူၼ်းလႂ် 3 မိုၼ်ႇပျႃး၊ လိူဝ်ၼၼ်ႉ ယူႇတီႈၶူင်းၵၢၼ် ႁၢင်ႈႁႅၼ်း(ကိန်းစီမံ) သမ်ႉ တေတူၺ်းလွင်ႈ လူႉသုမ်းၼမ်လႄႈဢေႇသေ ၸွႆႈထႅမ်ၵၼ်” ဝႃႈၼႆ။
ႁိူၼ်းယေးၵူၼ်းဝၢၼ်ႈ ဢၼ်လႆႈလူႉၵွႆ လင်ၶႃးၵွၵ်းပိဝ်ၸွမ်းလူမ်းၼၼ်ႉ တင်းမူတ်းမီး 152 လင်၊ ဝတ်ႉမုၼ်ၸဝ်ႈ 3 လင်၊ ၵျွင်းၶရိတ်ႉယၢၼ်ႇ 2 လင်လႄႈ ႁူင်းႁဵၼ်းလူင်ပွင်ၸိုင်ႈထႅင်ႈ 1 လင်၊ ဢၼ်လႆႈလူႉၵႂႃႇၼၼ်ႉ တင်းမူတ်းမီး 5 ဝၢၼ်ႈ ဝႃႈၼႆ။
ၻွၵ်ႊတိူဝ်ႊ ဢွင်ႇတၢၼ်းမွင်ႇ သိုပ်ႇလၢတ်ႈဝႃႈ “ ဝတ်ႉ 3 လင်လႄႈ ၵျွင်းၶရိတ်ႉယၢၼ်ႇ 2 လင် ႁူမ်ႈၵၼ် 5 လင်တႄႉ လႆႈၸွႆႈငိုၼ်းၵႂႃႇ ၼိုင်ႈလင် 1 သႅၼ်ပျႃး။ ယဝ်ႉၵေႃႈ ႁိူၼ်းၵူၼ်းဝၢၼ်ႈ ဢၼ်လူႉၵွႆတင်းလင်တႃႇလင်ၼိုင်ႈၼၼ်ႉ လႆႈၸွႆႈပၼ် ၶဝ်ႈသၢၼ် တႃႇ 5 ဝၼ်း၊ ၶိူင်ႈၵမ်ႉၵႅမ်ၼႂ်းႁိူၼ်းယေး 17 ဢၼ်၊ ငိုၼ်း 1 သႅၼ်ပျႃး ၸိူဝ်းၼႆႉ လႆႈၵမ်ႉၸွႆႈၵႂႃႇ” ဝႃႈၼႆ။
မိူဝ်ႈႁူဝ်လိူၼ်မေႊၼႆႉၵူၺ်း တီႈၼမ်ႉၸၢင်ၼႆႉ ၾူၼ်ယႂ်ႇလူမ်းလူင် ၽတ်ႉပဝ်ႇႁၢဝ်ႈႁႅင်းသေ တုမ်ႉတိူဝ်ႉႁိူၼ်းၵူၼ်းဝၢၼ်ႈ၊ ဝတ်ႉဝႃးၽႃသိူဝ်ႇ လူႉၵွႆ ဢမ်ႇယွမ်းၼပ်ႉႁူဝ်ပၢၵ်ႇ ၊ ၼႂ်းဝၼ်းလဵဝ်ၵၼ်ၼၼ်ႉၵူၺ်း တီႈၼႂ်းၸေႈဝဵင်းမွၵ်ႇမႆႇၵေႃႈၺႃးမိူၼ်ၵၼ်မီးလွင်ႈလုသုမ်းၼမ်ၼင်ႇၵဝ်ႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ