ၼႂ်းႁူဝ်လိူၼ်မေႊၼႆႉ ၵူၼ်းဝၢၼ်ႈပၢင်တီး ၸႄႈဝဵင်းသီႇပေႃႉ တၢႆ 3 ၵေႃႉပီႈၼွင်ႉ ပဵၼ်ၼႂ်းမုင်ႉႁေႃႁိူၼ်းလဵဝ် ၵူၼ်းတူင်ႇတၢင်ႇပိုၼ်ႉတီႈပဵၼ်ဢၼ်တူၵ်းၸႂ်ၵူဝ်ႁႄ ။
ဢၼ်လႆႈလူႉတၢႆၵႂႃႇၼႂ်းဝူင်ႈလဵဝ် 3 ၵေႃႉၼၼ်ႉတႄႉ မိူဝ်ႈဝၼ်းတီႈ 6/5/2020 ယၢမ်းၵၢင်ၼႂ် 10 မူင်း ပဵၼ်ၼၢင်းယိင်းဢွၼ်ႇ ဢႃယု 10 ၶူပ်ႇ ၊ မိူဝ်ႈဝၼ်းတီႈ 10/5/2020 ယၢမ်းၵၢင်ၼႂ် 6 မူင်း ပဵၼ်ၼၢင်းယိင်းဢွၼ်ႇ ဢႃယု 3 ၶူပ်ႇ လႄႈ ဝၼ်းတီႈ 10 ၼၼ်ႉၵူၺ်းၼင်ႇၵဝ်ႇ ယၢမ်းႁူဝ်ၶမ်ႈ 5 မူင်းပၢႆၼၼ်ႉ လုၵ်ႈဢွၼ်ႇ ဢႃယု 1 ၶူပ်ႇ ၸိူဝ်း ၶဝ် ပဵၼ်ပီႈၼွင်ႉၵၼ်-ၼႆယဝ်ႉ။
ၸၢႆးလႅင်းၵူၼ်း ဝၢၼ်ႈႁႆး လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၼႂ်းလိူၼ်ၼႆႉၵူၺ်း မုင်ႉႁေႃႁိူၼ်းလင်လဵဝ် မီးၵူၼ်းလူႉတၢႆၵႂႃႇ 3 ၵေႃႉ၊ မီးၵူၼ်းပဵၼ်ဢမ်ႇယူႇလီဝႆႉ 2 ၵေႃႉ။ ၼႂ်းမုင်ႉႁေႃႁိူၼ်းၼၼ်ႉ မီးလုၵ်ႈလၢင်း 9 ၵေႃႉ။ တႃႇၵေႃႉၼိုင်ႈ ပဵၼ်ၼၢင်းယိင်း ၵႂႃႇႁဵတ်းၵၢၼ်မိူင်းၶႄႇသေ တိုၵ်ႉပွၵ်ႈမႃးလႆႈမွၵ်ႈ 2 လိူၼ်ၼႆႉၵူၺ်း။ ၼၢင်းယိင်း ဢၼ်ပွၵ်ႈမိူင်းၶႄႇမႃးၼၼ်ႉ မိူဝ်ႈလဵဝ်တိုၵ်ႉပဵၼ် ဢမ်ႇယူႇလီဝႆႉယူႇ” ဝႃႈၼႆ။
မိူဝ်ႈၼႆႉ ဝၼ်းတီႈ 11/5/2020 ယူႇတီႈ ၸုမ်းၸွႆႈထႅမ်ဢမ်ႇမီးၶွပ်ႇလႅၼ် ပရႁိတ သီႇပေႃႉ ( နယ်စည်းမခြား ပရဟိတ သီပေါ) လႄႈ ၸဝ်ႈၼႃႈတီႈ SSPP ဢိၵ်ႇ ၾၢႆႇမေႃယႃ ႁူမ်ႈၵၼ်သေ တိုၵ်ႉၵႂႃႇႁပ်ႉၵူၼ်းပဵၼ် 2 ၵေႃႉၼၼ်ႉ မႃးတီႈႁူင်းယႃယူႇ ဝႃႈၼႆ။
ၸၢႆးလႅင်း သိုပ်ႇလၢတ်ႈဝႃႈ “ လုၵ်ႈဢွၼ်ႇ 3 ၵေႃႉ ဢၼ်လႆႈလူႉတၢႆၵႂႃႇၼၼ်ႉလႄႈ ဢၼ်တိုၵ်ႉပဵၼ်ယူႇထႅင်ႈ 2 ၵေႃႉၼၼ်ႉ ဢွၵ်ႇၾၢင်ႁၢင်ႈ ဢႆ၊ ၼၢဝ် ပဵၼ်ဝတ်း ၸိူဝ်းၼႆႉဝႆႉသေ ၾၢင်ႁၢင်ႈမိူၼ်ၵူၼ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ – 19 ဝႆႉ။ ၵူၺ်းၵႃႈ ဢမ်ႇပႆႇလႆႈၵူတ်ႇထတ်းတူၺ်းလႄႈ ပႆႇၸၢင်ႈယိုၼ်ယၼ် ဝႃႈပဵၼ်ၶူဝ်ႊဝိတ်ႉ – 19 ၶႃႈ။ သင်ဝႃႈ တၢင်းၾၢႆႇလူင်ပွင်ၸိုင်ႈၶဝ် ဢဝ်မိူဝ်းၵူတ်ႇထတ်းတူၺ်း ၸင်ႇတေလႆႈႁူႉ ၶႃႈဢေႃႈ” ဝႃႈၼႆ။
ၼႂ်းမုင်ႉႁေႃႁိူၼ်းၼၼ်ႉ တင်းမူတ်းမီး လုၵ်ႈလၢင်း 9 ၵေႃႉ ၼၢင်းယိင်း 6 ၵေႃႉ၊ ၵူၼ်းၸၢႆး 3 ၵေႃႉ။ ၼႂ်းၼၼ်ႉၼၢင်းယိင်း ၵေႃႉၼိုင်ႈ တိုၵ်ႉၵႂႃႇႁဵတ်းၵၢၼ်တၢင်းမိူင်းၶႄႇ ပွၵ်ႈမႃးႁိူၼ်း မိူဝ်ႈဝၼ်းတီႈ 16/2/2020 ၊ တေႃႈလဵဝ် ၼၢင်းယိင်း ၵေႃႉၼၼ်ႉ တိုၵ်ႉပဵၼ်ယူႇ ဢမ်ႇယူႇလီဝႆႉ ဝႃႈၼႆ။
ဢိင်ၼိူဝ်လွင်ႈၼႆႉသေ ၼင်ႇႁိုဝ် တၢင်းပဵၼ်ပေႃးတေဢမ်ႇတိတ်းၸပ်း လၢမ်းၽႄႈၵႂႃႇႁၢဝ်ႈႁႅင်းထႅင်ႈၼၼ်ႉ ယူႇတီႈ ၽူႈမီးပုၼ်ႈၽွၼ်း SSPP လႆႈပိၵ်ႉဢိုတ်း ၵူၼ်းၶဝ်ႈဢွၵ်ႇၼႂ်းဝၢၼ်ႈပၢင်တီး တင်းမူတ်းဝႆႉယဝ်ႉ။ ဝၢၼ်ႈပၢင်တီးၼႆႉ ယူႇၼႂ်းဢိူင်ႇမိူင်းလႃ မီးၸဵင်ႇၸၢၼ်းဝၼ်းဢွၵ်ႇၸႄႈဝဵင်းသီႇပေႃႉ ယၢၼ်မွၵ်ႈ 10 လၵ်း။ မီးတီႈလႅၼ်လိၼ် ၵေးသီး -သီႇပေႃႉ။
