ၵူၼ်းသိုၵ်း RCSS ပၢႆႈ တပ်ႉ ႁွတ်ႈထိုင်မိူင်းတူၼ် ၸိုင်ႈတႆးပွတ်းဢွၵ်ႇၶူင်း 9 ၵေႃႉ၊ ထုၵ်ႇတပ်ႉသိုၵ်းလူင်ပွင်ၸိုင်ႈမၢၼ်ႈ ၵုမ်းၶင်ထဵတ်ႈထၢမ်ဝႆႉ ဝႃႈၼႆ။
ၵူၼ်းမိူင်းတူၼ်လၢတ်ႈဝႃႈ မိူဝ်ႈဝၼ်းတီႈ 9/5/2020 ၼၼ်ႉ ၵေႃႉသိုၵ်းႁၢၼ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ပၢႆႈ တပ်ႉ ႁွတ်ႈၽႅဝ် တၢင်းမိူင်းတူၼ် ၸိုင်ႈတႆးပွတ်းဢွၵ်ႇၶူင်း။ ၵူၺ်းၵႃႈ ၼႂ်းမိုဝ်းၶဝ်တႄႉ ဢမ်ႇပႃးၶိူင်ႈၵွင်ႈၵၢင်ႇသင် ဝႃႈၼႆ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ၊ ဢမ်ႇၸႂ်ႈပၢႆႈပွၵ်ႈလဵဝ် တင်း 9 ၵေႃႉ၊ တေႃႈလဵဝ် တိုၵ်ႉၵူတ်ႇထတ်းတူၺ်းလွင်ႈတၢင်း မၢႆတူဝ် မၢႆတပ်ႉၶဝ်ယူႇ။ ဝႃႈၶဝ်ပၢႆႈယွၼ်ႉသင် လွင်ႈတၢင်းမီးၸိူင်ႉႁိုဝ် ” ဝႃႈၼႆ။
ဢိင်ၼိူဝ်လွင်ႈၵူၼ်းသိုၵ်းလၵ်ႉပၢႆႈၸိူင်ႉၼႆသေ တေႃႈလဵဝ် ယူႇတီႈၽူႈမီးပုၼ်ႈၽွၼ်း ၸဝ်ႈၼႃႈတီႈ RCSS တိုၵ်ႉၵူတ်ႇ ထတ်းလွင်ႈတၢင်းမၼ်းဝႆႉယူႇ ဝႃႈၼႆ။
ၵူၼ်းသိုၵ်း RCSS ၸိူဝ်းပၢႆႈဢွၵ်ႇတပ်ႉမႃးၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ (စစ်ဗျူဟာ) တီႈမိူင်းတူၼ် ၵုမ်းၶင်တူဝ်ဝႆႉ ၵူတ်ႇထတ်းထဵတ်ႈထၢမ်ၶဝ်ဝႆႉယူႇ သိုဝ်ႇၶၢဝ်ႇၵၢမ်ႇပေႃးၸတၢႆး ဢွၵ်ႇဝႆႉၼင်ႇၼႆ။
