ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) သၢၼ်ၶတ်းလွင်ႈသိုၵ်းလူင်ပွင်ၸိုင်ႈမၢၼ်ႈ တိုၵ်ႉသိုပ်ႇပူၼ်ႉပႅၼ် ၵူၼ်းမိူင်းႁၢဝ်ႈႁႅင်း ၼႂ်းၸႄႈဝဵင်းလႃႈသဵဝ်ႈလႄႈ ၸႂ်ႉၵိၼ်ႁႅင်းလၢႆ ဢိၵ်ႇ ၶႃႈႁႅမ်ၵူၼ်းမိူင်း။
မိူဝ်ႈၼႆႉ ဝၼ်းတီႈ 11/5/2020 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆးဝႃႈ ၵူၼ်းဝၢၼ်ႈ ၼႂ်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ထုၵ်ႇသိုၵ်းလူင်ပွင်ၸိုင်ႈမၢၼ်ႈ ၶႃၸႂ်၊ ၶႃႈႁႅမ်ၵူၼ်းမိူင်းလႄႈ တဵၵ်းၸႂ်ႉႁႅင်းလၢႆ ၽွင်းပိုတ်ႇၼႃႈသိုၵ်းတၢင်းဢွၵ်ႇဝဵင်းလႃႈသဵဝ်ႈ၊ ၶၢဝ်း ၽွင်းတိုၵ်ႉမီးပၼ်ႁႃ တၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈ ၸွတ်ႇတူဝ်ႈလုမ်ႈၾႃႉယူႇၼႆႉ ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ- “ယူႇတီႈၵဝ်ႉငဝ်ႈသုၼ်ႇလႆႈသုၼ်ႇပဵၼ်ၵူၼ်း သေ သၢၼ်ၶတ်းလွင်ႈသိုၵ်းမၢၼ်ႈ တိုၵ်ႉပူၼ်ႉပႅၼ်၊ သိုပ်ႇၶႃၸႂ်လႄႈၶႃႈႁႅမ်ၵူၼ်းမိူင်းတၢႆလၢႆလၢႆ ပႃးၸဵမ်လွင်ႈတဵၵ်းၸႂ်ႉႁႅင်းလၢႆ ၵူၼ်းဝၢၼ်ႈၸိူဝ်းၼႆႉ ႁၢဝ်ႈႁၢဝ်ႈႁႅင်းႁႅင်းၶႃႈ” ဝႃႈၼႆ။
မိူဝ်ႈဝၼ်းတီႈ 24/4/2020 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ တပ်ႉၸုမ်းလူင် 99 သွၵ်ႈတဝ်ထိူၼ်ႇ ၸွမ်းႁိမ်းႁွမ်းမိူင်းယေႃ ဢၼ်ႁၢင်ႇၵႆဝဵင်းလႃႈသဵဝ်ႈ 40 ၵီႊလူဝ်ႊမီႊတိူဝ်ႊၼၼ်ႉ ဝၢႆးပဵၼ်ပၢင်တိုၵ်းၵၼ်တင်းၸုမ်း ဢူၺ်းလီပွတ်းႁွင်ႇယဝ်ႉ ၶဝ်ထူပ်းႁၼ်ၸၢႆးသူၺ်ႇ ဢႃယု 27 ပီ၊ ၵူၼ်းဝၢၼ်ႈႁူဝ်သိူဝ် ၽွင်းမၼ်းၸၢႆးၵႂႃႇႁႃဝူဝ်းၵႂၢႆးသေ ပွၵ်ႈၶိုၼ်း၊ ထုၵ်ႇသိုၵ်းမၢၼ်ႈ ပေႃႉထုပ်ႉမၼ်းၸၢႆးသေ ယိုဝ်းတၢႆ တီႈၸဵင်ႇၸၢၼ်းဝၼ်းဢွၵ်ႇဝၢၼ်ႈ ယၢၼ်ဝၢၼ်ႈမွၵ်ႈ 2 ၵီႊလူဝ်ႊမီႊတိူဝ်ႊ- ဝႃႈၼႆ။
တင်ႈတႄႇ ၼႂ်းလိူၼ်ဢေႊပရိူဝ်ႊ 2020 ၼႆႉမႃး သိုၵ်းလူင်ပွင်ၸိုင်ႈမၢၼ်ႈ တပ်ႉမ 99 တင်း ၶမယ 365 ဢၼ်ပၵ်း တပ်ႉဝႆႉ တီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈၼၼ်ႉ တဵၵ်ႉၸႂ်ႉၵူၼ်းဝၢၼ်ႈၶိူဝ်းယႂ်း တႅပ်းမႆႉသူင်ႇပၼ်တပ်ႉၶဝ်၊ ၶျေႃးထူဝ်ႈ/ ၵႃး ၵူၼ်းဝၢၼ်ႈ တေႃႉသူင်ႇၶဝ်ႈၼမ်ႉတၢင်းၵိၼ်လႄႈ မၢၵ်ႇမိုဝ်ႉၸိုၼ်းယၢမ်း သူင်ႇတီႈတပ်ႉပၢင်သဝ်း တီႈပၢင်ႁႅဝ် ဢၼ်ပဵၼ်တပ်ႉၵဝ်ႇၸုမ်းပျီႇတူႉၸိတ်ႉၵွင်းၶႃးယၢမ်ႈယူႇဝႆႉၼၼ်ႉ ဝႃႈၼႆ။
ထႅင်ႈၾၢႆႇၼိုင်ႈၵေႃႈ တေႃႈလဵဝ်ၼႆႉ ပဵၼ်ၶၢဝ်းတၢင်းပဵၼ်ၶူဝ်ႊဝိတ်ႉ – 19 လၢမ်ႈၽႄႈႁၢဝ်ႈႁႅင်း၊ ယူႇတီႈတပ်ႉသိုၵ်း လူင်ပွင်ၸိုင်ႈမၢၼ်ႈ ၼႄၼႃႈတိူဝ်ႈ ၵႅတ်ႇၶႄႁႄႉၵင်ႈတၢင်းပဵၼ်ပၼ်ၵူၼ်းမိူင်းဝႃႈၼႆသေတႃႉ ၵူၺ်းၵႃႈ ႁဵတ်းႁႂ်ႈၵူၼ်းမိူင်း တူၵ်းတၢင်းယၢပ်ႇၽိုတ်ႇၵိၼ်းၸႂ်မႃးလိူဝ်ၵဝ်ႇထႅင်ႈ-ၼႆယဝ်ႉ။
ၸၢႆးႁေႃသႅင် သိုပ်ႇလၢတ်ႈဝႃႈ “ ၵွပ်ႈပိူဝ်ႈသင်ၼႆ ၽွင်းၵူၼ်းမိူင်းတူဝ်ႈလုမ်ႈၾႃႉဢွၼ်ၵၼ်ႁႃတၢင်းၵႄႈလိတ်ႈပၼ်ႁႃ တၢင်းပဵၼ် ၶူဝ်ႊဝိတ်ႊ-19 ယူႇၼႆႉ ၸုမ်းသိုၵ်းမၢၼ်ႈဢၼ်ဢၢင်ႈဝႃႈ ႁဵတ်းတႃႇၵူၼ်းမိူင်းၼႆမႃးတႃႇသေႇၼၼ်ႉ ဢမ်ႇထုၵ်ႇလီ ႁဵတ်းႁႂ်ႈၵူၼ်းမိူင်းတူၵ်းတၢင်းယၢပ်ႇၽိုတ်ႇၸိူင်ႉၼႆ။ တၢင်းလၢတ်ႈလႄႈတၢင်းႁဵတ်းၶဝ်ၼၼ်ႉ မၼ်းႁၢင်ႇၵၼ် မိူၼ်ၾႃႉလႄႈလိၼ်” ဝႃႈၼႆ။
တင်ႈတႄႇၶဝ်ႈၸဝ်ႉပီ 2020 မႃးၼႆႉ ၵူၼ်းဝၢၼ်ႈၼႂ်းဢိူင်ႇမိူင်းၵႅတ်ႈ ၸိူဝ်းမီးၵႃး ၺႃးသိုၵ်းမၢၼ်ႈတဵၵ်းၸႂ်ႉႁႅင်းလၢႆ တေႃႉသူင်ႇပၼ်သိုၵ်းၶဝ်၊ ၶိူင်ႈၵမ်ႉၵႅမ်သိုၵ်းၶဝ်လၢႆတီႈလၢႆတၢင်း- ၼႃႈတၢင်းတူၵ်းထိုင်ပၢင်ႁႅဝ် လႄႈမိူင်းယေႃ၊ ၼႃႈတၢင်းႁွင်ႇထိုင်ၵၢင်မိူင်း၊ ၼႃႈတၢင်းဢွၵ်ႇထိုင် ၼမ်ႉလုၵ်း ၾင်ႇၶူင်း လႄႈၼႃႈတၢင်းၸၢၼ်းထိုင် မၢၼ်ႈမၢၵ်ႇ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ