ၾၢႆႇၽွင်းငမ်းၸႄႈဝဵင်းၵဵင်းတုင် မၵ်းမၢႆတၢတ်ႇ 7 ၸၼ်ႉ ဢိူင်ႇၵၢတ်ႇထၢႆႈ ပဵၼ်သူၼ်တွင်ႈတဵဝ်းဢႅဝ်ႇယဵၼ်ၼႆသေ ၸတ်းႁဵတ်းပၢင်ပွႆးပိုတ်ႇပၢင်ၵႂႃႇ မိူဝ်ႈဝၼ်းဢင်းၵၢၼ်းပူၼ်ႉမႃးၼႆႉ။
ဝၼ်းတီႈ 23/01/2018 ယၢမ်းၵၢင်ၼႂ် ပီႈၼွင်ႉၵူၼ်းမိူင်းၼႂ်းပိုၼ်ႉတီႈ ဢိၵ်ႇပႃး ႁွင်ႈၵၢၼ်ၾၢႆႇလူင်ပွင်ၸိုင်ႈမၢၼ်ႈ ၼႂ်းၸႄႈဝဵင်းၵဵင်းတုင် ႁူမ်ႈၵၼ်သေ ပိုတ်ႇပၢင်။ ၼမ်ႉတူၵ်းတၢတ်ႇ 7 ၸၼ်ႉၼႆႉမီး ႁိမ်းဝၢၼ်ႈႁူဝ်ယၢင်း ဢိူင်ႇၵၢတ်ႇထၢႆႈ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ဝႃႈၼႆ။
ၵူၼ်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈဝႃႈ “ တိုၵ်ႉပိုတ်ႇမႃးလႆႈ 2-3 ဝၼ်းၼႆႉၵူၺ်း။ ၼမ်ႉတူၵ်းတၢတ်ႇၼႆႉ မိူဝ်ႈဢွၼ်တၢင်းၵေႃႈ မီးၵူၼ်းၵႂႃႇဢႅဝ်ႇလႄႇ ယူႇၵူၺ်းၵႃႈ တၢင်းလူတ်ႉၵႃး ဢမ်ႇၽႅဝ်လႄႈ ဢမ်ႇပေႃးမီးၵူၼ်းၵႂႃႇၼမ်။ တေႃႈလဵဝ် ၶိုၼ်းမႄးၶႂၢၵ်ႈသဵၼ်ႈတၢင်း တႃႇလူတ်ႉၵႃး ၵႂႃႇမႃးလႆႈထိုင်တီႈမၼ်းသေ ယဝ်ႉၵေႃႈ ၶိုၼ်းမႄးလၢင်း မႄးၶႂၢၵ်ႈ မႄးၵုမ်းလုမ်းလႃး၊ မႄးႁဵတ်း တီႈၵိၼ် တီႈယူႇ တီႈလဵၼ်ႈ ၸဵမ်ၸိူဝ်းၼႆႉဢေႃႈ” ဝႃႈၼႆ။
ပၢင်ပွႆးပိုတ်ႇၽုၺ်ႇ ၼမ်ႉတူၵ်းတၢတ်ႇ 7 ၸၼ်ႉၼႆႉ မီးၽူႈၶဝ်ႈႁူမ်ႈပိုတ်ႇပၢင်သမ်ႉ ၽူႈၵွၼ်းတိူင်းသိုၵ်းသၢမ်ၸဵင် ၵဵင်းတုင်၊ ၽူႈမီးပုၼ်ႈၽွၼ်း ႁွင်ႈၵၢၼ်လူင်ပွင်ၸိုင်ႈ၊ ၸုမ်းတူင်ႉၼိုင်တူင်ႇဝူင်းၵူၼ်း လႄႈ ၵူၼ်းမိူင်းၼႂ်းပိုၼ်ႉတီႈ ၶဝ်ႈႁူမ်ႈပိုတ်ႇပၢင် ဝႃႈၼႆ။
ၼမ်ႉတူၵ်းတၢၵ်ႇ 7 ၸၼ်ႉၼႆႉ ၵူႈပွၵ်ႈႁွင်ႉၼမ်ႉတူၵ်း 7 သီ ယၢၼ်ၵႆ ဝဵင်းၵဵင်းတုင် မွၵ်ႈ 12 လၵ်း မီးၾၢႆႇႁွင်ႇ ၸႄႈဝဵင်းၵဵင်းတုင်လႄႈ မီးၾၢႆႇတူၵ်း ဢိူင်ႇၵၢတ်ႇထၢႆႈ။ တေႃႈလဵဝ် မီးၵူၼ်းၼႂ်းပိုၼ်ႉတီႈ ဢွၼ်ၵၼ်ၵႂႃႇဢႅဝ်ႇ လႄႇၵၼ်ၵူႈဝၼ်းသေဢမ်ႇၵႃး ၵူၼ်းၼွၵ်ႈ မိူင်း (ဢႅဝ်ႇမိူင်း) ၶဝ်ၵေႃႈမႃးၽွင်ႈ ဝႃႈၼႆ။
လႅင်ႇၶၢဝ်ႇ လႅတ်ႇၼုမ်ႇ မင်းရၢႆး
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ