လုမ်းပၢႆးမၢၵ်ႈမီး RCSS/SSA ၶၢႆႉလၢႆႈပိုတ်ႇတီႈမႂ်ႇ ၼႂ်းၸႄႈဝဵင်းမူႇၸေႊ မီးၵူၼ်းမိူင်းၼႂ်းပိုၼ်ႉတီႈလႄႈ ပႃႇတီႇ ၵၢၼ်မိူင်းၶဝ်ႈႁူမ်ႈ တင်းၼမ်လၢႆ။
ဝၼ်းတီႈ 25/01/2018 ၸဝ်ႈႁၢၼ်ဢွင်ႇၵႅၼ်ႇမိူင်း ဢွၼ်ႁူဝ်သေ ၶၢႆႉလၢႆႈပိုတ်ႇလုမ်းပၢႆးမၢၵ်ႈမီး ၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တီႈမႂ်ႇ ၼႂ်းပွၵ်ႉၾၢႆႇၵၢတ်ႇ ၵွင်းၼၢမ်ႇသႃႇ ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ ဝႃႈၼႆ။
ၸဝ်ႈႁၢၼ်ဢွင်ႇၵႅၼ်ႇမိူင်း ဢၼ်တူၵ်းပုၼ်ႈၽွၼ်းၵႂႃႇၼင်ႈလုမ်း ပၢႆးမၢၵ်ႈမီး RCSS/SSA တီႈမူႇၸေႊၼၼ်ႉ လၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မိူဝ်ႈၼႆႉႁဝ်းၶႃႈ ၶိုၼ်ႈလုမ်းမႂ်ႇ လူႇတၢၼ်းႁဵတ်းၵုသူလ်တၢင်းလီ တီႈလုမ်းမႂ်ႇႁဝ်းၶႃႈ၊ လႆႈမွၵ်ႇပၢင်းထိုင်သင်ၶၸဝ်ႈ မႃးၵၢပ်ႈသွမ်းဝၼ်းသေဢမ်ႇၵႃး မွၵ်ႇထိုင် ၽူႈယႂ်ႇၵူၼ်းလူင် ၼႂ်းပွၵ်ႉ/ဢိူင်ႇလႄႈ ၵူၼ်းၼႂ်းပိုၼ်ႉတီႈလဵင်ႉလူၶဝ်ႈဝၼ်းၵၼ်သေ ပီႈၼွင်ႉမႃးၶဝ်ႈႁူမ်ႈယူႇတင်းၼမ်” ဝႃႈၼႆ။
လုမ်းပၢႆးမၢၵ်ႈမီး RCSS/SSA ၼႆႉ မိူဝ်ႈဢွၼ်တၢင်းၵေႃႈ ပိုတ်ႇဝႆႉတီႈၼႂ်းပွၵ်ႉၾၢႆႇၵၢတ်ႇၵွင်းၼၢမ်ႇသႃႇၵူၺ်း ၼင်ႇၵဝ်ႇ ၽူႈၼင်ႈလုမ်းပဵၼ် ၸဝ်ႈႁၢၼ်ၸၢႆးမူၼ်ႈသိူဝ်း တေႃႈလဵဝ် ၶိုၼ်းၶၢႆႉလၢႆႈၵႂႃႇပိုတ်ႇထႅင်ႈတီႈမႂ်ႇ ၼႂ်းပွၵ်ႉၾၢႆႇၵၢတ်ႇ ၵွင်းၼၢမ်ႇသႃႇ ၼႆႉၵူၺ်းၼင်ႇၵဝ်ႇ ဝႃႈၼႆ။
တီႈပၢင်ပိုတ်ႇလုမ်းမႂ်ႇၼႆႉ မီးပူႇၵၢင်ႉ၊ ပူႇၵႄႇ၊ ၵူၼ်းၼႂ်းပိုၼ်ႉတီႈလႄႈ တူဝ်တႅၼ်းပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ ၸိူဝ်းၼႆႉ ၶဝ်ႈႁူမ်ႈပၼ်ႁႅင်းတင်းၼမ်လၢႆ ဝႃႈၼႆ။
တေႃႈလဵဝ် ၽူႈၼင်ႈလုမ်းပၢႆးမၢၵ်ႈမီး RCSS/SSA တီႈၸႄႈဝဵင်းမူႇၸေႊသမ်ႉ ပဵၼ်ၸဝ်ႈႁၢၼ်ဢွင်ႇၵႅၼ်ႇမိူင်း၊ ၵႅမ် သမ်ႉ ပဵၼ်ၸဝ်ႈႁၢၼ် ၸၢႆးမူၼ်ႈသိူဝ်း ဝႃႈၼႆ။
ၼႂ်းလိူၼ်ၵျႅၼ်ႊၼိဝ်ႊရီႊ 2018 ၼႆႉ ၽူႈၵွၼ်းလုမ်းၵပ်းသၢၼ် RCSS/SSA ပုတ်ႈၶၢႆႉလၢႆႈၵၼ် ၼႂ်းမိူင်းတႆး လၢႆလၢႆတီႈ မိူၼ်ၼင်ႇ လုမ်းၵပ်းသၢၼ် ၸႄႈဝဵင်းတႃႈၶီႈလဵၵ်းသမ်ႉ တေႃႈလဵဝ် ၸဝ်ႈႁၢၼ်လွၼ်ႉသၢင် ဢဝ်ပုၼ်ႈၽွၼ်းၵွၼ်း လုမ်းဝႆႉ။ မိူင်းတူၼ်သမ်ႉ ပဵၼ်ၸဝ်ႈႁၢၼ်သႅင်လီ၊ မိူင်းပၼ်ႇသမ်ႉ ပဵၼ်ၸၢႆးၸိုၼ်ႈၶိုၼ်ႈပဵၼ်ၽူႈၵွၼ်းလုမ်းလႄႈ ၸႄႈဝဵင်းမူႇၸေႊသမ်ႉ ပဵၼ်ၸဝ်ႈႁၢၼ်ၸၢႆးဢွင်ႇၵႅၼ်ႇမိူင်း ၸဵမ်ၸိူဝ်းၼႆႉ ဝႃႈၼႆ။
လုမ်းၵပ်းသၢၼ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ဢၼ်ပိုတ်ႇဝႆႉၼႂ်းမိူင်းတႆး တၢင်းပွတ်း ဢွၵ်ႇသမ်ႉ တႃႈၶီႈလဵၵ်း၊ ၵဵင်းတုင်၊ မိူင်းတူၼ်လႄႈ မိူင်းသၢတ်ႇ၊ မိူင်းတေႃႉ တၢင်းပွတ်းၸၢၼ်းသမ်ႉ မိူင်းပၼ်ႇ၊ ၶူဝ် လမ်လႄႈ တူၼ်ႈတီး။ တၢင်းပွတ်းႁွင်ႇသမ်ႉ မူႇၸေႊတင်း ၵျွၵ်ႉမႄး ၸဵမ်ၸိူဝ်းၼႆႉ။
