လုင်းၸၢႆးယွတ်ႈတႆး ၽူႈဢွၼ်ႁူဝ်တူင်ႉၼိုင်ၼႂ်းပႃႇတီႇတႆး တီႈဝဵင်းပၢင်လူင် လႆႈလူႉသဵင်ႈၵႂႃႇ ၽွင်း ဢႃယု 64 ပီ။
ဝၼ်းတီႈ 3/5/2020 ယၢမ်းၵၢင်ၶမ်ႈ မွၵ်ႈ 7 မူင်းၼႆႉ လုင်းၸၢႆးယွတ်ႈတႆး ၽူႈဢွၼ်ႁူဝ်တူင်ႉၼိုင် ၼႂ်းပႃႇ တီႇ ႁူဝ်သိူဝ်၊ သိူဝ်ၽိူၵ်ႇ လႆႈလူႉသဵင်ႈၵႂႃႇ ယွၼ်ႉတၢင်းပဵၼ်ၶႅၼ်ႊသိူဝ်ႊတပ်း (မၢၵ်ႇႁဵင်းတပ်း) တီႈႁိူၼ်း မၼ်းၸၢႆး ပွၵ်ႉ 4 ဝဵင်းပၢင်လူင် ၸိုင်ႈတႆးပွတ်းၸၢၼ်း ဝႃႈၼႆ။
ၼၢင်းမျႃႉထူၺ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းလွႆလႅမ် လၢတ်ႈတီႈ ၽူႈတွႆႇ ႁွၵ်ႈဝႃႈ- “မၼ်းၸၢႆး ပဵၼ်ၶႅၼ်ႊသိူဝ်ႊတီႈတပ်းသေ လူႉသဵင်ႈၵႂႃႇၶႃႈ။ လႆႈလူႉၵႂႃႇ မိူဝ်ႈၶမ်ႈဝၼ်းသိုၼ်း၊ လူႉသဵင်ႈၵႂႃႇတီႈႁိူၼ်းပၢင်လူင်ၵူၺ်းၶႃႈ” ဝႃႈၼႆ။
ထိုင်မႃး ဝၼ်းတီႈ 4/5/2020 ယူႇတီႈလုၵ်ႈလၢင်း ၊ ပီႈၼွင်ႉၸိူဝ်ႉၶိူဝ်း လႆႈဢွၼ်ၵၼ် ပူၼ်ႉ ၶၢပ်ႈတူဝ်ႁွပ်ႇႁူဝ်ၶဝ်ႈႁဵဝ်ႈၵႂႃႇ ဝႃႈၼႆ။
လုင်းၸၢႆးယွတ်ႈတႆးၼႆႉ ပဵၼ်ၽူႈဢွၼ်ႁူဝ်တူင်ႉၼိုင်ၼႂ်းပႃႇတီႇတႆး တင်းသွင်ပႃႇတီႇ၊ ပႃႇတီႇႁူဝ်သိူဝ် တင်း ပႃႇတီႇသိူဝ်ၽိူၵ်ႇ။ လိူဝ်သေၼၼ်ႉ ယၢမ်ႈပဵၼ်ၽူႈၵွၼ်းပွၵ်ႉ 4 မႃးၶၢဝ်းတၢင်း 2 ပီ။
လုင်းၸၢႆးယွတ်ႈတႆးၼႆႉ တႄႇၼႃႈႁိူၼ်းၵိုၵ်းၸွမ်း ၼၢင်းထူၺ်းၶမ်း မီးလုၵ်ႈႁူမ်ႈၵၼ် 2 ၵေႃႉ။
