တပ်ႉသိုၵ်းလူင်ပွင်ၸိုင်ႈမၢၼ်ႈ တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA သွင်ၾၢႆႇလႆႈ ပဵၼ် ပၢင်တိုၵ်းၵၼ် ၼႂ်းလုၵ်ႈလိူၼ်ၼႆႉ 3 ပွၵ်ႈ ဝႃႈၼႆ။
ဝၼ်းတီႈ 21/01/2018 ယၢမ်းၵၢင်ၶမ်ႈ 7 မူင်းၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်တူင်ႉၼိုင်တၢင်းပွတ်း ဢိူင်ႇမိူင်းငေႃႉၼၼ်ႉ ၽႃႇယိုဝ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တၢင်းလွႆၾၢႆႇတူၵ်း ဢိူင်ႇမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ မိူဝ်ႈ 6/1/2018 ၼၼ်ႉ သမ်ႉယိုဝ်းၵၼ် ၼႂ်းဢိူင်ႇမိူင်းပူးလူင် ၸႄႈဝဵင်းမိူင်းပဵင်း ၸႄႈတွၼ်ႈမိူင်းသၢတ်ႇ 2 ပွၵ်ႈ ဝႃႈၼႆ။
ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇၼႂ်းမိူင်း RCSS/SSA လၢတ်ႈဝႃႈ“ ၸႂ်ႈဢေႃႈ တင်းသိုၵ်းလူင်ပွင်ၸိုင်ႈမၢၼ်ႈသေ ၽႃႇၺႃးၵၼ်လႄႈ လႆႈပဵၼ်ပၢင် တိုၵ်းဢေႃႈ တၢင်းမိူင်းငေႃႉၼၼ်ႉ၊ ၼႂ်းဢိူင်ႇမိူင်းပူး မိူင်းပဵင်းၵေႃႈပဵၼ်ဢေႃႈ” ဝႃႈၼႆ။
ဢၼ်လႆႈပဵၼ်ပၢင်တိုၵ်းတၢင်းပွတ်းမိူင်းငေႃႉၼၼ်ႉ ၾၢႆႇသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဝႆႉဝႃႈ RCSS ပူၼ်ႉပႅၼ် ၼႃႈလိၼ်လႄႈ ၺႃးတိုၵ်း တီႉလႆႈတူဝ်တၢႆ RCSS 2 ၵေႃႉ၊ ၵွင်ႈသွင်လဝ်း ဝႃႈၼႆ။
ဝၢႆးသေ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လူင်းလၢႆးမိုဝ်းတင်ႈတႄႇ ပီ 2015 မႃးတေႃႇ ယၢမ်းလဵဝ် သွင်ၾၢႆႇလႆႈပဵၼ်ပၢင်တိုၵ်းၵၼ်မႃး 20 ပွၵ်ႈပၢႆ ဝႃႈၼႆ။
RCSS ၼႆႉ ၸိူင်ႉၼင်ႇၺႃးသိုၵ်းလူင်ပွင်ၸိုင်ႈႁႅၼ်းသိုၵ်းလေႃႇတိုၵ်းၼၼ်ႉ ၼႂ်းႁူဝ်လိူၼ်ၵျႅၼ်ႊၼိဝ်ႊရီႊၼႆႉၵေႃႈ ပဵၼ်ပၢင်တိုၵ်းတင်းသိုၵ်းလွႆ TNLA ၼႂ်းၸႄႈဝဵင်းၵျွၵ်ႉမႄး/ ၼမ်ႉသၼ်ႇ လၢႆလၢႆတီႈ လၢႆလၢႆပွၵ်ႈ။
ပူၼ်ႉမႃး ဝၼ်းတီႈ 16/12/2016 ၼၼ်ႉၵေႃႈ တပ်ႉသိုၵ်းလူင်ပွင်ၸိုင်ႈမၢၼ်ႈတင်း RCSS/SSA လႆႈပဵၼ်ပၢင်တိုၵ်း ၵၼ် ၼႂ်းဢိူင်ႇမိူင်းပဵင်း ၸႄႈဝဵင်းႁူဝ်ပူင်း 4 ပွၵ်ႈ ဝႃႈၼႆ။
ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၼႆႉလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ဝႆႉ ၵႆႉၺႃးသိုၵ်းလူင်ပွင်ၸိုင်ႈမၢၼ်ႈၼႄးဝႃႈ ပူၼ်ႉပႅၼ်ၶေႃႈၵိၼ်ၵႅၼ်ႇ NCA ၊ ၽႅၼ်ၵၢၼ်ၵႂၢတ်ႇလၢင်ႉပိုၼ်ႉ တီႈၸိူဝ်း ၼႆႉလႄႈ ၵႆႉၵႆႉပဵၼ်ပၢင်တိုၵ်းၵၼ် ၼႆယဝ်ႉ။
