လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ တေဢမ်ႇၵႂႃႇၶဝ်ႈႁူမ်ႈပၢင်ၵုမ် CSSU ဢၼ်တေ ၸတ်းႁဵတ်း တီႈငဝ်ႈၸိုင်ႈလွႆတႆးလႅင်း မွပ်ႈယိုၼ်ႈတၼ်းႁဵင်းႁူဝ်ပဝ်ႈ။

ဝၼ်းတီႈ 01-02/02/2018 တေမႃးၼႆႉ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး Committee for Shan State Unity (CSSU) တေၸတ်းႁဵတ်း ပၢင်ၵုမ် တီႈငဝ်ႈၸိုင်ႈလွႆတႆးလႅင်း တေထတ်းသၢင်ၶိုၼ်း လွင်ႈၼႃႈၵၢၼ်တႃငၢၼ်းဢၼ်လႆႈ ႁဵတ်းသၢင်ႈတူင်ႉၼိုင်မႃးလႄႈ တေမွပ်ႈဢၢပ်ႈတၼ်းႁဵင်းႁူဝ် ပဝ်ႈၵေႃႉမႂ်ႇ ။

တူဝ်တႅၼ်း ပႃႇတီႇသိူဝ်ၽိူၵ်ႇ ၸိူဝ်းတေၵႂႃႇ ၶဝ်ႈႁူမ်ႈ ပၢင်ၵုမ်တႄႉလုင်းၸၢႆးၽူးဢွင်ႇ ၊ ၸၢႆးဢွင်ႇ မိၼ်ႉၶၢႆႇ၊ ၸၢႆးၶမ်းၵျေႃႇ ၊ ၼၢင်းဝႃႇၼူႉ၊ ယိင်းယိင်းဢူး ၸိူဝ်းၼႆႉ။

လုင်းၸၢႆးဢၢႆႈပဝ်း ႁူဝ်ပဝ်ႈ SNDP လၢတ်ႈဝႃႈ – “ ပၢင်ၵုမ်တေမႃးၼႆႉ ႁဝ်းဢမ်ႇၸၢင်ႈၶဝ်ႈႁူမ်ႈ ပၢႆးယူႇ လီ ဢမ်ႇလီလႄႈ မေႃယႃၶဝ်ဢမ်ႇပၼ်ဢွၵ်ႇတၢင်း၊ ၵူၺ်းၵႃႈပေႃးႁဝ်းႁပ်ႉတၼ်းႁဵင်းမႃးယဝ်ႉတႄႉ ၼင်ႇႁိုဝ်တႆးတေမီးလွင်ႈၽွမ်ႉႁူမ်ႈၵၼ်၊ ပေႃးတေ ၸၢင်ႈႁဵတ်းၵၢၼ်လႆႈလီလီ ငၢမ်းငၢမ်းၼၼ်ႉ ႁဝ်းတေၶတ်းၸႂ်တဵမ်တီႈယူႇ” ဝႃႈၼႆ။

CSSU ၼႆႉၼိုင်ႈပီ ၼိုင်ႈပွၵ်ႈပိၼ်ႇလႅၵ်ႈတၼ်းႁဵင်းၽူႈၼင်ႈၸိုင်ႈ မိူဝ်ႈပီ 2016 တူၵ်းပုၼ်ႈၽွၼ်း သေတႃႉဢမ်ႇႁပ်ႉလႆႈ။ ႁူဝ်ပဝ်ႈၵေႃႁူမ်ႈသၢင်ႈၸိုင်ႈတႆး SSJAC ၸဝ်ႈၶုၼ်ထုၼ်းဢူး လႆႈႁပ်ႉတႅၼ်း။ ႁွပ်ႈၼႆႉတႄႉလုင်းၸၢႆးဢၢႆႈပဝ်းမွၵ်ႇလၢတ်ႈဝႃႈ တူဝ်ႈတၼ်းယဝ်ႉ ဝႃႈၼႆ။

CSSU ၼႆႉ ၵေႃႇတင်ႈမႃးမိူဝ်ႈပီ 2013 မီးလုၵ်ႈၸုမ်း ၸိူဝ်းပဵၼ်တပ်ႉသိုၵ်းၸိုင်ႈတႆး ပွတ်းႁွင်ႇ၊ ပွတ်းၸၢၼ်း ၊ သိုၵ်းၵူၼ်းမိူင်း( သႅင်ၵႅဝ်ႉ ) ပႃႇတီႇၵၢၼ်မိူင်းႁူဝ်သိူဝ်/ သိူဝ်ၽိူၵ်ႇ၊ ၵွင်ၸႆး၊ ၸုမ်းတူင်ႇ ဝူင်းတႆး ၶဝ်ႈႁူမ်ႈဝႆႉဢမ်ႇယွမ်း 10 ၸုမ်း။