လူမ်းလူင်ၽတ်ႉသႂ်ႇ ႁိူၼ်းၵူၼ်းဝၢၼ်ႈ၊ ဝတ်ႉဝႃးၽႃသိူဝ်ႇလႄႈ ႁူင်းႁဵၼ်းၸိူဝ်ႉၸၢတ်ႈ ၼႂ်းဢိူင်ႇၵဵင်းၶမ်းဢွၼ်ႇ ၸႄႈဝဵင်း ၶူဝ်လမ် လူႉၵွႆတင်းၼမ်။

ဝၼ်းတီႈ 29/4/2020 ယၢမ်းႁူဝ်ၶမ်ႈၼၼ်ႉ ၾူၼ်လူင် လူမ်းလူင် ၽတ်ႉသႂ်ႇႁိူၼ်းၵူၼ်းဝၢၼ်ႈ ၼႂ်းဝၢၼ်ႈၶၢႆး ဢိူင်ႇၵဵင်းၶမ်းဢွၼ်ႇ ၵိင်ႇၸႄႈဝဵင်းၶူဝ်လမ် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၊ ဝတ်ႉဝႃးၽႃသိူဝ်ႇလႄႈ ႁူင်းႁဵၼ်း လႆႈလူႉၵွႆ 20 လင်ပၢႆ ။

ၸဝ်ႈၶူး တေႇဝိင်ႇတ ၽူႈၵွၼ်းဝတ်ႉၽႃသွၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်မိူဝ်ႈသိုၼ်း ၊ ပဵၼ်လူမ်းလူင် ၾူၼ်လူင် မႃးဢိူဝ်ႈ။ တေပဵၼ်ယၢမ်းႁူဝ်ၶမ်ႈ မွၵ်ႈ 5 မူင်းပၢႆၼႆႉ။ လူမ်းလူင်ၽတ်ႉဢဝ် လင်ၶႃးႁိူၼ်းၵူၼ်း ဝၢၼ်ႈၶၢႆး၊ ဝတ်ႉလႄႈၵျွင်း ႁူင်းႁဵၼ်း လဵၵ်းၽိူၵ်ႇမုင်း ၵွၵ်းပိဝ်တင်းၼမ်၊ တင်းမူတ်း တုမ်ႉတိူဝ်ႉမွၵ်ႈလင်ႁိူၼ်း 20 ပၢႆၼႆႉ” ဝႃႈၼႆ။

ဝၢၼ်ႈမႂ်ႇပၢင်ႇသႃႇ (ႁွင်ႉ) ဝၢၼ်ႈၶၢႆးၼႆႉ မီး လင်ႁိူၼ်းမွၵ်ႈ 30 လင်ပၢႆ။ မီးၼႂ်း ဢိူင်ႇၵဵင်းၶမ်းဢွၼ်ႇ မီးၾၢႆႇၸၢၼ်း ဝဵင်းၶူဝ် လမ်၊ ယၢၼ်ၵႆမွၵ်ႈ 15 လၵ်း။

ၸဝ်ႈၶူး တေႇဝိင်ႇတ သိုပ်ႇလၢတ်ႈဝႃႈ “ လွင်ႈမၢတ်ႇၸဵပ်းလူႉတၢႆတႄႉ ဢမ်ႇမီး။ ပီႈၼွင်ႉၼႂ်းဝၢၼ်ႈႁဝ်းၶဝ် ဢၼ်ၺႃးလူမ်း ၽတ်ႉသေ လင်ၶႃးမုင်းလဵၵ်းၵွၵ်းပိဝ်ၵႂႃႇၼၼ်ႉ ၶဝ်ဢွၼ်ၵၼ်ယူႇ ၸွမ်းသိုင်ႇၸွမ်းႁိူၼ်းၽႂ်မၼ်းဝႆႉ။ ယူႇတီႈပီႈၼွင်ႉ ၼႂ်း ဝၢၼ်ႈၶၢႆးၼၼ်ႉလႄႈသင်၊ ဝၢၼ်ႈႁိမ်းႁွမ်း ၸိူဝ်းၼၼ်ႉၵေႃႈ ဢွၼ်ၵၼ်မႃးၸွႆႈၵၼ်မုင်း ႁဵတ်းပၼ်ၶိုၼ်းယူႇ” ဝႃႈၼႆ။

ၾူၼ်လူင်လူမ်းလူင် ၽတ်ႉသႂ်ႇလႄႈလင်ၶႃးမုင်းႁိူၼ်း ၵွၵ်းပိဝ်သေဢမ်ႇၵႃး ၽႃႁိူၼ်းၸိူဝ်းၼႆႉၵမ်ႈၽွင်ႈ တႅၵ်ႇၸတ်ႉ ၵွႆၽွင်ႈ ၸဝ်ႈၶူးတေႇဝိင်ႇတ လၢတ်ႈၼႄၼင်ႇၼႆ။