ၼႂ်းႁူဝ်ပီ 2018 ၼႆႉ ၸဝ်ႈၶူးဝႃးသိလ်ထမ်းဝုၼ်းၸုမ်ႉ ဢွၵ်ႇၶၢဝ်းတၢင်းၶိုင်သၢင်ႈ ႁဵတ်းၵၢၼ် သႃသၼႃ လၢႆတီႈၼႂ်းၸိုင်ႈတႆးပွတ်းႁွင်ႇလႄႈ လၢႆလၢႆဝဵင်း။

ဝၼ်းတီႈ 24/01/2018 ၼႆႉ ယေႃးတူဝ်တီႈဝဵင်းတၢင်ႉယၢၼ်း၊ ဝၼ်းတီႈ 25/01/2018 မိူင်းယႆ၊ ဝၼ်းတီႈ 26 /01/2018 လွႆၸၢင်ႉၽိူၵ်ႇ မွၵ်ႇလွၼ်ႉ၊ ဝၼ်းတီႈ 27/01/2018 ယေႃးတူဝ်ၵႂႃႇတီႈ ၵုၼ်လူင် ႁူဝ်ပၢင်ႇ၊ဝၼ်းတီႈ 28/01/2018 မူႇၸေႊ၊ ၼမ်ႉၶမ်း၊ မိူင်းၶွၼ်၊ ဝၼ်းတီႈ 30/01/2018 လႃႈသဵဝ်ႈ၊ ဝၼ်းတီႈ 31 /01/2018 တၢင်ႇထီး ၵွင်းမူးၶိူဝ်းၼိမ်၊ ဝၼ်းတီႈ 01/02/2018 ၵျွင်းၶူဝ်ဢုင် ၵျႂၵ်ႉမႄး ၊ ဝၼ်းတီႈ 03 /02/2018 ပၢင်ႇဢူႈ၊ ဝၼ်းတီႈ 04 /02/2018 ဝဵင်းလိူဝ်ႇ ၊ဝၼ်းတီႈ 06 /02/2018 တႃႈၵုင်ႈ ၸိူဝ်းၼႆႉ ။

ၸၢႆးဢွၼ်ပိုၼ်းတႆး ၵူၼ်းၼမ်ႉၶမ်း လၢတ်ႈဝႃႈ – “ ဢေႃႈၸႂ်ႈယဝ်ႉၶႃႈ ၵူၼ်းမိူင်းၼမ်ႉၶမ်းႁဝ်းၶႃႈ ၵေႃႈမီးတၢင်းၸူမ်းသိူဝ်းသေ ႁၢင်ႈႁႅၼ်းပိုၼ်ႉတီႈပႂ်ႉႁပ်ႉမၼ်းၸဝ်ႈယူႇဢေႃႈ။ လႆႈငိၼ်းဝႃႈမၼ်း ၸဝ်ႈတေမႃးယၢတ်ႇၼမ်ႉ တီႈလႂ်တႄႉဢမ်ႇပႆႇႁူႉၶႃႈ ဢၼ်မီးလိၵ်ႈ ဢွၵ်ႇမႃးၶၢဝ်းတၢင်းမၼ်းၸဝ်ႈ ၼႆႉပေႃးဢမ်ႇမီးလွင်ႈၶွင်ႉၶမ်သင်တႄႉ မၼ်းၸဝ်ႈ ယေႃးတူဝ်ၵႂႃႇၸွမ်းၼင်ႇတမ်းဝၢင်းဝႆႉယူႇ ” ဝႃႈၼႆ။

ၸဝ်ႈၶူးဝႃးဝုၼ်းၸုမ်ႉၼႆႉ ပဵၼ်လုၵ်ႈပေႃႈသႅင်လႃႈလႄႈ မႄႈၶမ်းလႃႈ။ ၸႃတိတီႈၵိူတ်ႇ ဝဵင်းၵဵင်းသႅၼ် ၸိုင်ႈထႆး။ ၽွင်းဢႃယုၸဝ်ႈ 4 ပီ ထိုင် 10 ပီၼၼ်ႉ လႆႈၶဝ်ႈႁဵၼ်းတၢင်းႁူႉ ၼႂ်းႁူင်းႁဵၼ်းထႆး။ ထိုင်မႃး ဢႃယု ၸဝ်ႈလႆႈ 11 ပီၼၼ်ႉ ၶိုၼ်ႈပဵၼ်ၸဝ်ႈသၢင်ႇ၊ ဢႃယု 12 ပီ တၵ်ႉၵႃႇသတ်ႉထႃး ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း ၸင်ႇၵႂႃႇ ပၢင်းၸဝ်ႈၶူးဝႃးဝုၼ်းၸုမ်ႉသေ ပူၵ်းပွင်သႃသၼႃတီႈ ဢိူင်ႇမိူင်းၽူင်း တေႃႇထိုင်ဝၼ်းမိူဝ်ႈၼႆႉ ဝႃႈၼႆ။