သိုၵ်းလူင်ပွင်ၸိုင်ႈမၢၼ်ႈ တိုၵ်ႉသိုပ်ႇပူၼ်ႉပႅၼ် တဵၵ်းၸႂ်ႉၵိၼ်ႁႅင်းလၢႆၵူၼ်းမိူင်းလႄႈ ၶျေႃးၵႃး/ ထူဝ်ႈၵူၼ်းမိူင်း ဢမ်ႇထၢတ်ႇ ဢမ်ႇဝၢႆး ယူႇၶိူဝ်းယႂ်း ၼႂ်းၸႄႈဝဵင်းလႃႈသဵဝ်ႈ။
ဝၼ်းတီႈ 28/4/2020 တပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 365 တႂ်ႈတပ်ႉမ 99 ဢၼ်ၵႂႃႇတူင်ႉၼိုင် ပၵ်းသဝ်းတၢင်း ဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ၶၢၼ်းထေႃႈ/ ထူဝ်ႈ ၵူၼ်းဝၢၼ်ႈ ၼႂ်းဢိူင်ႇမိူင်းၵႅတ်ႈ 2 လမ်း၊ ၸႂ်ႉတေႃႉတၢင်ႇၶူဝ်းၶွင်၊ မၢၵ်ႇမိုဝ်ႉၸိုၼ်းယၢမ်းလႄႈ ႁႅင်းၵူၼ်းသိုၵ်းမၢၼ်ႈ သူင်ႇၸူးတီႈတပ်ႉပၢင်သဝ်းၶဝ် တီႈဝၢၼ်ႈၶၢင် ပၢင်ႁႅဝ် ၼႂ်းၵႄႈ မိူင်းယေႃ – မိူင်းၵႅတ်ႈ။
သၢင်ႇၸၢႆးသၢမ် ၵူၼ်းမိူင်းၵႅတ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ဝၼ်းတီႈ 28 ၼႆႉ ၶဝ်မႃးယွၼ်းၶျေႃးဢဝ်ၵႂႃႇ ထေႃႈၵူၼ်းဝၢၼ်ႈ ထႅင်ႈသွင်လမ်းၶႃႈယဝ်ႉ။ ပဵၼ်တူဝ်သိုၵ်းမၢၼ်ႈၶဝ် မႃးၸႂ်ႉၵႄႇဝၢၼ်ႈယွၼ်းထေႃႈသွင်လမ်း၊ ထေႃႈၵူၼ်းမိူင်း ဢၼ်ထုၵ်ႇ ၶၢၼ်းၵႂႃႇၼၼ်ႉ ဢမ်ႇလႆႈၵႃႈၼမ်ႉမၼ်းသေပျႃး။ ၸႂ်ႉၵိၼ်ႁႅင်းလၢႆၵူၺ်း။ လႆႈတေႃႉသူင်ႇပၼ်ၶဝ် တၢင်ႇၶူဝ်းၵိၼ်ယႅမ်ႉ၊ မၢၵ်ႇမိုဝ်ႉ ၸိုၼ်းယၢမ်းလႄႈ တူဝ်ၵူၼ်းသိုၵ်းၶဝ် ၵႂႃႇသူင်ႇတီႈတပ်ႉပၢင်သဝ်း ပၢင်ႁႅဝ်ၼၼ်ႉၶႃႈယဝ်ႉ။ ၸဝ်ႈထေႃႈ တင်း ထေႃႈတႄႉ ၶဝ်ပွႆႇပွၵ်ႈမႃးၶိုၼ်းၼႂ်းဝၼ်းတီႈ 28 ၼၼ်ႉၶိုၼ်းယူႇ” ဝႃႈၼႆ။
တင်ႈဢဝ်ႁၢင်ပီ ပီၵၢႆပူၼ်ႉမႃး တပ်ႉသိုၵ်းလူင်ပွင်ၸိုင်ႈၶၢၼ်းႁႅင်းၵူၼ်းႁႅင်းရူတ်ႉၵႃး၊ ထေႃႈလႃႈၵျီႈပီႈၼွင်ႉၵူၼ်းမိူင်းၵႅတ်ႈ ဢမ်ႇထၢတ်ႇ၊ ၵူၼ်းမိူင်းသမ်ႉပေႃးဢမ်ႇၸၢင်ႈလႆႈႁဵတ်းၵၢၼ်ႁႃၵိၼ်လဵင်ႉတွင်ႉလီလီ ဝႃႈၼႆ။
ဢိင်ၼိူဝ်လွင်ႈၵူၼ်းမိူင်းၸိုင်ႈတႆး လႆႈထုၵ်ႇၺႃးသိုၵ်းလူင်ပွင်ၸိုင်ႈမၢၼ်ႈ တဵၵ်းတဵင် ၶၢၼ်းၸႂ်ႉႁႅင်းလၢႆ ၸိူင်ႉၼႆ ပဵၼ် လၢႆး ပူၼ်ႉပႅၼ်မိူၵ်ႈမႂ်ႈ ၶွင်တပ်ႉသိုၵ်းမၢၼ်ႈ ဢၼ်ဢမ်ႇယွမ်းမူၼ်ႉမႄးတူဝ်ၸႂ် ၸၢႆးႁေႃသႅင် ၽူႈၶၢၼ်ပၢၵ်ႇၵဝ်ႉငဝ်ႈသုၼ်ႇလႆႈ ၵူၼ်း ၸိုင်ႈတႆးလၢတ်ႈ။
“လွင်ႈဢၼ်သိုၵ်းမၢၼ်ႈၶဝ်ႁဵတ်းၼႆႉ မၼ်းပဵၼ်ၵၢၼ်ပူၼ်ႉပႅၼ်လၢႆးမိူၵ်ႈမႂ်ႈ သိုၵ်းမၢၼ်ႈဢၼ်ဢမ်ႇမေႃယွမ်း လႅၵ်ႈလၢႆႈ လၢႆးႁဵတ်းလၢႆးသၢင်ႈၶဝ် ၸဵမ်လႂ်မႃးလႂ်ၵေႃႈ တိုၵ်ႉတဵၵ်းၸႂ်ႉၵူၼ်းဝၢၼ်ႈၵူၼ်းမိူင်းၸိူင်ႉၼႆ ဢဝ်ၵူၼ်းမိူင်းႁဵတ်းပဵၼ်ၶီႈၶႃႈၶဝ်သေ ၸႂ်ႉၵႃႈဝႃႈ ၵႃႈပဵၼ် ၶႂ်ႈဢဝ်တၢႆၵေႃႈဢဝ်တၢႆသေ ပေႃးယူႇတီႈၵူၼ်းမီးၸႂ်မဵတ်ႉတႃႇသေတူၺ်းတႄႉ မၼ်းပူၼ်ႉပႅၼ် သုၼ်ႇလႆႈသုၼ်ႇပဵၼ်ၵူၼ်းႁၢဝ်ႈႁႅင်းၼၼ်ႉယဝ်ႉ။ ပေႃးတူၺ်းၶဝ်ႁဵတ်းမႃး ပၢၼ်သိုပ်ႇပၢၼ် တဵၵ်းတဵင်ၵူၼ်းမိူင်းတႆးမႃး ဢမ်ႇယဝ်ႉ ဢမ်ႇဝၢႆးလႆႈသေပွၵ်ႈ ပွင်ႇဝႃႈ ၶဝ်မီးၸႂ်မိူၵ်ႈလိူင်းၶႂ်ႈပေႉၵိၼ်ၵူၼ်းမိူင်းၵူၺ်း” ဝႃႈၼႆ။
ဝၼ်းတီႈ 28 ပူၼ်ႉမႃးၼႆႉၵူၺ်း သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ်ထႅင်ႈ တၢင်းပၢင်ဢုင် ႁိမ်းဝၢၼ်ႈပၢင်ႇလေႃႉ ၼႂ်းထုင်ႉဝၢၼ်ႈမၢၵ်ႇ ၸႄႈဝဵင်းလႃႈသဵဝ်ႈ။
သၢင်ႇၸၢႆးသၢမ် မိူင်းၵႅတ်ႈ လၢတ်ႈဝႃႈ “ မိူဝ်ႈဝၼ်းတီႈ 28 ၼၼ်ႉ သိုၵ်းမၢၼ်ႈတီႈတပ်ႉမိူင်းၵႅတ်ႈၼႆႉ ၸႂ်ႉၶိူင်ႈၵွင်ႈလူင် ယိုဝ်းၵႂႃႇတၢင်းဝၢၼ်ႈပၢင်ဢုင်ၼၼ်ႉလုၵ်ႈၼိုင်ႈၶႃႈ။ ဢၼ်ၶဝ်ပဵၼ်ပၢင်တိုၵ်းၵၼ်ၼၼ်ႉ တင်းႁိုင်တေမီး မွၵ်ႈ 30 မိၼိတ်ႉၼႆႉၵူၺ်း” ဝႃႈၼႆ။
ၵဵဝ်ႇၵပ်းလွင်ႈ ပၢင်တိုၵ်းၼႆႉသေဢမ်ႇပႆႇမီးၵူၼ်းမိူင်းပၢႆႈၽေးသိုၵ်းသင် ၼင်ႇၵဝ်ႇ။
သိုၵ်းလူင်ပွင်ၸိုင်ႈမၢၼ်ႈဢၼ်ၵႆႉပဵၼ်ပၢင်တိုၵ်းၵၼ် သွၵ်ႈတဝ်ယႃႉ ၵဝ်းယူႇၸွမ်းၼႂ်းထုင်ႉမိူင်းၵႅတ်ႈ မိူင်းယေႃ ၸိူဝ်းၼႆႉ ပဵၼ်တပ်ႉမ 99 တင်း တပ်ႉၶမယ 365 ။
ဝၢႆးလင် ၵမ်းၵမ်းၶဝ်ႈသွၵ်ႈတပ်ႉငဝ်ႈငုၼ်းပျီႇတူႉၸိတ်ႉၵွင်းၶႃးယဝ်ႉ တင်ႈဢဝ်ႁူဝ်လိူၼ်ဢေႊပရိူဝ်ႊၼႆႉမႃး တပ်ႉသိုၵ်းလူင်ပွင်ၸိုင်ႈမၢၼ်ႈႁႅၼ်းသိုၵ်းၶိုၼ်ႈမိူဝ်းတၢင်းမိူင်းယေႃ – မိူင်းၵႅတ်ႈ။ မိူဝ်းပုတ်ႈတႅၼ်းယူႇတီႈတပ်ႉပၢင်သဝ်းပျီႇတူႉၸိတ်ႉၵွင်းၶႃးၸိူဝ်းမီးထုင်ႉၼၼ်ႉမူတ်း ၵူၼ်းမိူင်းယေႃမိူင်းၵႅတ်ႈ လၢတ်ႈၼင်ႇၼႆ။
