Thursday, March 28, 2024

SSPP/SSA ပိုၼ်ၽၢဝ်ႇဝႃႈ ဢမ်ႇၵဵဝ်ႇၶွင်ႈၸွမ်း ႁူင်းပၢႆးမၢၵ်ႈမီးပျီႇတူႉၸိတ်ႉၺႃးယိုဝ်းတီႈမူႇၸေႊ – မၢၵ်ႇတူၵ်း ၵႂႃႇတၢင်း ၸေႊၵဝ်ႇလႄႈ ႁဵတ်းႁႂ်ႈၶႄႇၸႂ်လမ်

Must read

ႁူင်းၵၢၼ်ပၢႆးမၢၵ်ႈမီး ၸုမ်းပျီႇတူႉၸိတ်ႉ ပၢၼ်းသေး ဢၼ်မီးတီႈ ပွၵ်ႉၸွၼ်ႊၸူဝ်ႊ ႁူဝ်ဝဵင်းမူႊၸေႊ တၢင်းၵႂႃႇ ၼမ်ႉၶမ်း ၼၼ်ႉ ၺႃးၸုမ်းဢမ်ႇႁူႉၾၢႆႇ ၸုမ်းၼိုင်ႈလူမ်ႇယိုဝ်း – မၢၵ်ႇတူၵ်းၵႂႃႇၾၢႆႇၸေႊၵဝ်ႇ မိူင်းၶႄႇၼၼ်ႉ SSPP/SSA ပိုၼ်ၽၢဝ်ႇဝႃႈ လွင်ႈၼႆႉ ဢမ်ႇလႆႈၵဵဝ်ႇၶွင်ႈႁူႉႁၼ်ၸွမ်းသင် ဝႃႈၼႆ။

Photo by – SSPP/ လိၵ်ႈပိုၼ်ၽၢဝ်ႇ SSPP မိူဝ်ႈဝၼ်းတီႈ 25/4/2020

ဝၼ်းတီႈ 23/4/2020 ယၢမ်းၵၢင်ၶမ်ႈ မွၵ်ႈ 7 မူင်းၶိုင်ႈၼၼ်ႉ ၸုမ်းဢမ်ႇႁူႉၾၢႆႇ လူမ်ႇယိုဝ်း ႁူင်းပၢႆးမၢၵ်ႈမီး ၶွင်ၸုမ်းပျီႇတူႉၸိတ်ႉပၢၼ်းသေး ဢၼ်ၶဝ်ႈပႃး ၼႂ်းပွၵ်ႉၸွၼ်ႊၸူဝ်ႊ ဝဵင်းမူႇၸေႊ၊ ဢၼ်လူမ်ႇယိုဝ်းၼၼ်ႉ ႁဵတ်းႁႂ်ႈမၢၵ်ႇလူင်တူၵ်းၵႂႃႇတၢင်း ၸေႊၵဝ်ႇ 3 လုၵ်ႈ။ လွင်ႈၼႆႉ ႁဵတ်းႁႂ်ႈမိူင်းၶႄႇ ၸႂ်လမ်။ ၵဵဝ်ႇၵပ်းလွင်ႈၼႆႉသေ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢွၵ်ႇလိၵ်ႈ ပိုၼ်ၽၢဝ်ႇ ဝၼ်းတီႈ 25/4/2020 ဝႃႈ ဢမ်ႇၵဵဝ်ႇသင် တင်း တပ်ႉသိုၵ်းၸိုင်ႈတႆး ဝႃႈၼႆ။

- Subscription -

ၸဝ်ႈႁၢၼ် တၢၼ်းဢွင်ႇ ၽူႈၶၢၼ်ပၢၵ်ႇ SSPP/SSA လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ပဵၼ်ၵႂႃႇၼႆႉ မၼ်း ဢမ်ႇၵဵဝ်ႇ ၶွင်ႈမုၵ်ႉၸုမ်းႁဝ်း။ ဢၼ်ဢမ်ႇၵဵဝ်ႇၶွင်ႈတင်းမုၵ်ႉၸုမ်းႁဝ်းၼႆႉ ႁႂ်ႈမၼ်းၸႅင်ႈလႅင်းၼႆ ႁဝ်းၶႃႈၵေႃႈ လႆႈဢွၵ်ႇလိၵ်ႈမွၵ်ႈၼႆႉၵူၺ်း။ ၾၢႆႇၼိုင်ႈၵေႃႈ လူင်ပွင်ၸိုင်ႈၶႄႇ ၵေႃႈလၢတ်ႈဝႃႈ ပေႃးမၼ်း ဢမ်ႇၵဵဝ်ႇၶွင်ႈသူၵေႃႈ ဢွၵ်ႇလိၵ်ႈပိုၼ်ၽၢဝ်ႇၼႆလႄႈ ႁဝ်းၶႃႈၵေႃႈ ဢွၵ်ႇလိၵ်ႈပိုၼ်ၽၢဝ်ႇ”- ဝႃႈၼႆ။

ဢၼ်လူမ်ႇယိုဝ်း ႁူင်းပၢႆးမၢၵ်ႈမီး ၸုမ်းပျီႇတူႉၸိတ်ႉၼၼ်ႉ ဢမ်ႇတုမ်ႉတိူဝ်ႉ သင်သေတႃႉ မၢၵ်ႇလူင် ဢၼ်တူၵ်းၵႂႃႇတၢင်း ၾၢႆႇၸေႊၵဝ်ႇၼၼ်ႉ ပဵၼ်လွင်ႈလူလၢႆၼႃႈတႃ မိူင်းၶႄႇ ၊ ႁဵတ်းႁႂ်ႈလူင်ပွင်ၸိုင်ႈ မိူင်းၶႄႇၸႂ်လမ် ယွၼ်ႉသၢၼ်ၶတ်း ဢၼ်ၶႄႇတမ်းဝၢင်းဝႆႉ ႁႂ်ႈသၢပ်ႇၼမ်ႉလႅၼ်လိၼ် မိူင်းၶႄႇ ၵတ်းယဵၼ် ၼိမ်သဝ်းၼႆၼၼ်ႉလႄႈ ၾၢႆႇမိူင်းၶႄႇၵေႃႈ တူၵ်ႇတၵ်ႉ လူင်ပွင်ၸိုင်ႈမၢၼ်ႈ ႁႂ်ႈၵူတ်ႇထတ်း ပၼ်လွင်ႈၼႆႉ ဝႃႈၼႆ။

SSPP ၵေႃႈဝႃႈ ယၢမ်းလဵဝ် ပဵၼ်ၶၢဝ်းၶတ်းၸႂ် ၵေႃႇသၢင်ႈလွင်ႈငမ်းယဵၼ်၊ ဝၢၼ်ႈမိူင်းမီးပၼ်ႁႃ သင်မႃးၵေႃႈ တေဢဝ်လွၵ်းလၢႆးႁူပ်ႉထူပ်းဢုပ်ႇဢူဝ်းၵၼ်သေ ၵႄႈလိတ်ႈၵႂႃႇ တႃႇလႅၼ်လိၼ် ၸိုင်ႈတႆး တေ ၵတ်းယဵၼ်ၼိမ်သဝ်းၼၼ်ႉ ယူႇတီႈ SSPP ၵေႃႈ တိုၼ်းဝႆႉၼမ်ႉၼၵ်း၊ ဝႆႉပဵၼ်လွင်ႈယႂ်ႇမႃးတႃႇသေႇ ဝႃႈၼႆ။

ၼႂ်းၸႄႈဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်းလႅၼ်လိၼ်၊ ပဵၼ်ဝဵင်းၵႃႉၶၢႆ ပၢႆးမၢၵ်ႈမီးၶႅမ်ႉ၊ ပဵၼ်သဵၼ်ႈတၢင်းလူင် ဢၼ်မီးၽၵ်းတူမိူင်း ၶဝ်ႈဢွၵ်ႇၵႃႉၶၢႆ ဝူင်ႈၵၢင် မိူင်းၶႄႇ၊ မိူင်းႁူမ်ႈတုမ်။ ၸုမ်းယိပ်းၵွင်ႈၵၢင်ႇဢၼ်ၵႂႃႇမႃးတူင်ႉၼိုင် မီးလၢႆၸုမ်း၊ ၼႂ်းဝဵင်းတႄႉ ၸုမ်းပျီႇတူႉၸိတ်ႉပိုတ်ႇတူဝ် ႁဵတ်းၵၢၼ်ပၢႆးမၢၵ်ႈမီးၼမ်။

ႁူဝ်ပီၼႆႉ ၾၢႆႇသိုၵ်းမၢၼ်ႈ ၸီႉသင်ႇ ႁႂ်ႈပျီႇတူႉၸိတ်ႉဢွၵ်ႇယၢၼ် ဝဵင်းမူႇၸေႊသေ မိူဝ်းယူႇ တီႈၽႂ်တီႈမၼ်း။ ႁူင်းဢၼ် ၺႃးယိုဝ်းၼႆႉၵေႃႈ ယင်းမီး ၸုမ်းပျီႇတူႉၸိတ်ႉယိပ်းၵွင်ႈပႂ်ႉယၢမ်းယူႇ – ၵူၼ်းမူႊၸေႊလၢတ်ႈၼႄ ၼင်ႇၼႆ။

မိူဝ်ႈပီ 2018 လိူၼ်မေႊၼၼ်ႉ ႁူင်းပၢႆးမၢၵ်ႈမီး ၶွင်ၸုမ်းပျီႇတူႉၸိတ်ႉပၢၼ်းသေး တီႈၼႆႈၼႆႉ ၺႃးၸုမ်းယိပ်းၵွင်ႈလူမ်ႇယိုဝ်း ႁဵတ်းႁႂ်ႈၵူၼ်းမိူင်းလူႉတၢႆ 19 ၵေႃႉ၊ ၸုမ်းသိုၵ်းလူင်ပွင်ၸိုင်ႈ ၵမ်ႈၼမ် ပဵၼ်ၵူၼ်းၸုမ်းပျီႇတူႉၸိတ်ႉ တၢႆ 32 ၵေႃႉ၊ ဢၼ်လူမ်ႇယိုဝ်းၵမ်းၼၼ်ႉ ၾၢႆႇၸုမ်းသိုၵ်းတဢၢင်း TNLA ပိုတ်ႇလၢတ်ႈတႅၵ်ႇလႅင်းဝႃႈ ပဵၼ်ၶဝ်ၶဝ်ႈယိုဝ်း၊ ၵမ်းၼႆႉတႄႉဝႃႈ ပဵၼ်ၶၢဝ်းတၢင်းပဵၼ်ၶူဝ်ႊဝိတ်ႉၽႄႈ ၵူၼ်းမိူင်းမႆႈၸႂ်လႄႈ လွင်ႈၼႆႉ ဢမ်ႇၸႂ်ႈၶဝ်ႁဵတ်း ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း