ၵူၼ်းဝၢၼ်ႈႁူဝ်သိူဝ် ထုင်ႉမိူင်းယေႃ ၾၢႆႇဢွၵ်ႇ ဝဵင်းလႃႈသဵဝ်ႈဝႃႈ သိုၵ်းလူင်ပွင်ၸိုင်ႈမၢၼ်ႈ ယိုဝ်း ၵူၼ်းၺႃးၵူၼ်းဝၢၼ်ႈၶဝ်တၢႆၵေႃႉၼိုင်ႈ ၽွင်းမၼ်းၸၢႆး တိုၵ်ႉၵႂႃႇႁႃဝူဝ်း ပွၵ်ႈၶိုၼ်းႁိူၼ်း ။
သိုၵ်းလူင်ပွင်ၸိုင်ႈမၢၼ်ႈ တပ်ႉငဝ်ႈသိုၵ်း တပ်ႉမ 99 ၵႂႃႇတူင်ႉၼိုင် တၢင်းၾၢႆႇဢွၵ်ႇဝဵင်းလႃႈသဵဝ်ႈ၊ တၢင်းထုင်ႉ ဝၢၼ်ႈမၢၵ်ႇ မိူင်းယေႃ မိူင်းၵႅတ်ႈ ။ ဝၼ်းတီႈ 24/4/2020 ဢၢႆႈသူၺ်ႇ ဢႃႇယု 30 ပၢႆ ၵူၼ်းဝၢၼ်ႈႁူဝ်သိူဝ် ၵႂႃႇႁႃဝူဝ်း သေပွၵ်ႈႁိူၼ်း ၶိုၼ်း ယၢမ်းႁူဝ်ၶမ်ႈ ႁိမ်း 7 မူင်းၼၼ်ႉ ၺႃးသိုၵ်းလူင်ပွင်ၸိုင်ႈမၢၼ်ႈ ယိုဝ်းတၢႆ ၾၢႆႇၸၢၼ်းဝၢၼ်ႈ ယၢၼ်မွၵ်ႈၼိုင်ႈလၵ်း။
လုင်းဢၢႆႈၶမ်း ၵူၼ်းႁူဝ်သိူဝ် လၢတ်ႈတီႈၽူႈတွႆႇႁွၵ်ႈဝႃႈ – “ၸၢႆးသူၺ်ႇၼႆႉ ၵႂႃႇႁႃဝူဝ်း/ ၵႂၢႆးသေပွၵ်ႈၶိုၼ်း ႁိူၼ်း။ ၽွင်းၼၼ်ႉ ထႅဝ်သိုၵ်းမၢၼ်ႈသမ်ႉလုၵ်ႉၼႂ်းဝၢၼ်ႈဢွၵ်ႇၵႂႃႇ။ လႅပ်ႈတေၵႂႃႇႁိုၵ်ႉၺႃးၵၼ်သေ ထဵတ်ႈထၢမ်ပေႃႉထုပ်ႉယဝ်ႉ ၸင်ႇယိုဝ်းတၢႆ။ တီႈၸၢႆးသူၺ်ႇၺႃးယိုဝ်းၼၼ်ႉ ယၢၼ်ၵႆဝၢၼ်ႈ မွၵ်ႈ 1 လၵ်းၵူၺ်း”- ဝႃႈၼႆ။
ဝၢၼ်ႈႁူဝ်သိူဝ် ဢိူင်ႇႁူဝ်သိူဝ်၊ မီးၾၢႆႇဢွၵ်ႇဢိူင်ႇမိူင်းယေႃ ယၢၼ်မွၵ်ႈ 20 လၵ်း၊ ယၢၼ်တူဝ် ဝဵင်းလႃႈသဵဝ်ႈ မွၵ်ႈ 50 လၵ်း ။ ၵဵဝ်ႇၵပ်းလွင်ႈၼႆႉ ၽူႈတွႆႇႁွၵ်ႈ ၵပ်းသိုပ်ႇၸူး ၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA ၵေႃႈ သိုပ်ႇဢမ်ႇလႆႈ၊ ၾၢႆႇသိုၵ်းလူင်ပွင်ၸိုင်ႈမၢၼ်ႈၵေႃႈ ဢမ်ႇႁပ်ႉတွပ်ႇ။
ၼၢင်းလူၺ်းၶျိသငႃး ၸုမ်းၼၢင်းယိင်းတဢၢင်းတႄႉလၢတ်ႈတီႈၽူႈတွႆႇႁွၵ်ႈဝႃႈ -“ ႁဝ်းၶႃႈၵေႃႈလႆႈ ငိၼ်းယူႇ။ ၵူၺ်း တိတ်းတေႃႇၸူးၵူၼ်းထုင်ႉၼၼ်ႉယၢပ်ႇၼႃႇ။ သၢႆၾူၼ်းၵေႃႈ ဢမ်ႇလႆႈလီလီ။ သိုၵ်းလူင်ပွင် ၸိုင်ႈၸိူဝ်း ၵႂႃႇတူင်ႉတၢင်းၼၼ်ႉ ၵႆႉၵႆႉယိုဝ်းၵူၼ်းဝၢၼ်ႈတၢႆ။ ပေႃးယိုဝ်းတၢႆယဝ်ႉ ဢမ်ႇတွၼ်ႉသႂ်ႇ ၸႂ်ၸွႆႈႁႃပၼ် တၢင်းၽိတ်းၵူၼ်းပူၼ်ႉပႅၼ်သေပွၵ်ႈ။ ဢၼ်ၼႆႉထုၵ်ႇလီႁၼ်ထိုင် ၵၢင်ၸႂ် ပေႃႈမႄႈပီႈၼွင်ႉၵူၼ်းႁိူၼ်း ၵေႃႉၺႃးယိုဝ်းတၢႆၼၼ်ႉသေ ၶိုင်ပွင်ပၼ်ႁႂ်ႈလႆႈလွင်ႈ ၽဵင်ႇပဵင်းယူႇ”- ဝႃႈၼႆ။
မိူဝ်ႈပီ 2016 လိူၼ်ၵျုၼ်ႊ ၼၼ်ႉၵေႃႈ ၽွင်းတပ်ႉသိုၵ်းလူင်ပွင်ၸိုင်ႈ ၶမယတပ်ႉ 362 ဢဵၼ်ႁႅင်း ၵူၼ်းမွၵ်ႈ 100 လုၵ်ႉတၢင်းမိူင်းယၢင်းၶိုၼ်ႈၸူးမိူင်းယေႃ။ မိူဝ်းႁူပ်ႉၵူၼ်းမိူင်းႁဵတ်း သူၼ်ႁဵတ်းႁႆႈ ႁိမ်းတၢင်းၶဝ်ႈမိူင်းယေႃ။ သိုၵ်းလူင်ပွင်ၸိုင်ႈ ယိုဝ်းၵူၼ်းဝၢၼ်ႈတၢႆထင်တီႈ 2 ၵေႃႉ(ၵူၼ်းဢီႇၼၢႆး လုၵ်ႉလႃႈသဵဝ်ႈ ၶီႇရူတ်ႉၶိူင်ႈသွၼ်ႉၵၼ်မိူဝ်းတၢင်းမိူင်းယေႃ။ ဝၼ်းၼၼ်ႉ တီႉၵူၼ်းဝၢၼ်ႈ ႁဵတ်းသူၼ် ၶဝ်ႈၵၢပ်ႇ ဢဝ်ၵႂႃႇႁႅမ်တၢႆ ပႅတ်ႈ 5 ၵေႃႉ – ပၼ်ႁႃၼႆႉ ပဵၼ်ၶၢဝ်ႇယႂ်ႇတူဝ်ႈလုမ်ႈၾႃႉလႄႈ ထိုင်တီႈပေႃးလႆႈ ပၼ်တူတ်ႈတၢမ်ႇ/ပူတ်းပႅတ်ႈ ၽူႈၵွၼ်းတပ်ႉၸုမ်း တပ်ႉၵွင် ပႅတ်ႈလၢႆလၢႆၵေႃႉ။
