လူင်ပွင်ၸိုင်ႈမိူင်းတႆး ပိုၼ်ၽၢဝ်ႇဝႃႈ ၼႂ်းၵၢတ်ႇလူင် ၵူႈၸႄႈဝဵင်း ၼႂ်းမိူင်းတႆးပတ်းပိုၼ်ႉၼၼ်ႉ ပၼ်ၶႂၢင်ႉပိုတ်ႇ ႁၢၼ်ႉၶၢႆ ၶွင်ၵိၼ် ယႅမ်ႉလႄႈ ႁၢၼ်ႉယႃႈယႃ ၸိူဝ်းၼႆႉၵူၺ်း ၶူဝ်းၵုၼ်ႇသိၼ်ၵႃႉ တၢင်ႇၸိူဝ်း ပႆႇပၼ်ၶၢႆသင်၊ ယိုတ်ႈၶၢဝ်းယၢမ်းၶိုၵ်ႉၶၵ်ႉထႅင်ႈ 18 ဝၼ်း။
ဝၼ်းတီႈ 27/4/2020 ယူႇတီႈႁွင်ႈၵၢၼ်ၾၢႆႇလိူမ်ႈလႆႇ ၸႄႈမိူင်းတႆး ဢွၵ်ႇလိၵ်ႈပိုၼ်ၽၢဝ်ႇ ၸီႉသင်ႇ ၾၢႆႇၽွင်း ငမ်းၵူႈၸႄႈဝဵင်း ပတ်းပိုၼ်ႉမိူင်းတႆးဝႃႈ ၼႂ်းၵၢတ်ႇလူင် ၵူႈဝဵင်းဝဵင်းၼၼ်ႉ ပၼ်ၶႂၢင်ႉ ၸဝ်ႈတၢင်းၶၢႆ တၢင်းၵိၼ် တၢင်းယမ်ႉ လႄႈ ယႃႈယႃ ၵူၺ်း။ တၢင်းပဵၼ် ၸိူဝ်ႉမႅင်းၶူဝ်ႊဝိတ်ႉ 19 ပႆႇႁၢႆလႄႈ ယိုတ်ႈၶၢဝ်းယၢမ်း ၶိုၵ်ႉၶၵ်ႉ ထႅင်ႈ 18 ဝၼ်း ၊ ၶူဝ်းၵုၼ်ႇ တၢင်ႇၸိူဝ်ႉတၢင်ႇပိူင် တိုၼ်းပႆႇပၼ်ၶၢႆသင် ။
ၸၢႆးၵွင်ၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ မႅၼ်ႈယဝ်ႉၶႃႈ လိၵ်ႈပိုၼ်ၽၢဝ်ႇၼႆႉ တွၼ်ႈတႃႇၼႂ်းမိူင်းတႆးပတ်းပိုၼ်ႉၶႃႈ ။ တႄႇဢဝ် ဝၼ်းတီႈ 28/4/2020 ၼႆႉၵႂႃႇ တႃႇၶၢဝ်းတၢင်း 18 ဝၼ်း။ တီႈၼႂ်းၵၢတ်ႇလူင်ၼၼ်ႉ ပႆႇပၼ်ပိုတ်ႇၶၢႆၶူဝ်းၵုၼ်ႇ။ တၢင်းၼွၵ်ႈၵၢတ်ႇဝႃႇ ၶၢႆၵိုၵ်းႁိူၼ်းဝႃႇ ၸိူဝ်းၼႆႉတႄႉ ဢမ်ႇဝႃႈသင် ” ဝႃႈၼႆ။
တင်ႈတႄႇ ႁူဝ်လိူၼ်ဢေႊပရိူဝ်ႊမႃး ၵၢၼ်ၵႂႃႇၵၢၼ်ပႆ ၵႃးတၢင်ႇၵူၼ်း တေႃႉသူင်ႇ ဢမ်ႇၵႂႃႇဢမ်ႇမႃး၊ ၵူၼ်းမိူင်းယူႇႁိူၼ်းယူႇယေးၵၼ် ၶၢဝ်းတၢင်း 14 ဝၼ်းၵူႈႁိူၼ်း၊ ဢၼ်ဢွၵ်ႇတၢင်းၼွၵ်ႈၵမ်ႈဢေႇ၊ လူင်ပွင်ၸိုင်ႈၵေႃႈ ပိုၼ်ၽၢဝ်ႇ ႁၢမ်ႈဢွၵ်ႇၵၢင်ၶိုၼ်းဝႆႉပႃး။ ၸိူဝ်းၼႆႉ ႁူပ်ႉတၢင်းယၢပ်ႇ တႃႇၵူၼ်းႁႃ ၸဝ်ႉၵိၼ်ၶမ်ႈ။
ၸၢႆးၶမ်းပီး ပွၵ်ႈပၢင်ဢုတ်ႇ ဝဵင်းလႃႈသဵဝ်ႈလၢတ်ႈဝႃႈ – “တီႈဝဵင်းလႃႈသဵဝ်ႈႁဝ်းၼႆႉ ဝၢႆးသၢင်းၵျၢၼ်ႇယဝ်ႉ ပေႃးမီး ၵူၼ်းၵႂႃႇၼင်ႈၵိၼ်ၶဝ်ႈသွႆး ၼမ်ႉၼဵင်ႈယဝ်ႉ။ ၵူၼ်းႁႃၵိၼ်ၸၢင်ႈ ႁဵတ်းၵၢၼ် ၵေႃႈ ၵႂႃႇမႃးယဝ်ႉ။ ၵၢင်ဝဵင်း တီႈၵူၼ်းၶွၼ်ႈၵိုၼ်း ၵေႃႈ မီးၵူၼ်းမႃးၶိုၼ်းယဝ်ႉ။ ပေႃးဢမ်ႇၵႂႃႇ ဢမ်ႇႁႃ သေဢိတ်းၵေႃႈ မၼ်းယၢပ်ႇတွၼ်ႈတႃႇၵူၼ်းႁႃၸဝ်ႉၵိၼ်ၶမ်ႈ၊ ၵူၼ်းယူႇၼႂ်းဝဵင်းၼႆႉ မၼ်းဢမ်ႇမိူၼ် ၵူၼ်းမီးႁႆႈ မီးၼႃး မီးသူၼ်မီးႁိူၵ်ႈၼႃႇၼေႃႈ” – ဝႃႈၼႆ။
ႁွင်ႈၵၢၼ်ၾၢႆႇယူႇလီ တႄႉ လၢမ်းၶၢတ်ႈဝႆႉဝႃႈ တီႈဢေႇသုတ်း တေႃႇထိုင် လိူၼ်မေႊ ဝၼ်းတီႈ 15 ၼႆႉ ၸင်ႇတေဝၢင်းၸႂ်၊ သိုပ်ႇယိူၼ်ႉသေ ယူႇႁိူၼ်းယူႇယေး ၽႂ်မၼ်းထႅင်ႈ လီသေပိူၼ်ႈ၊ ၵူၼ်းၵႂႃႇႁဵတ်းၵၢၼ် တၢင်ႇမိူင်းၵေႃႈ တိုၵ်ႉဢွၼ်ၵၼ်ၶဝ်ႈမႃး ယူႇတိၵ်းတိၵ်းလႄႈ တိုၵ်ႉလႆႈမႆႈၸႂ်ယူႇ ဝႃႈၼႆ။
ဝၼ်းမိူဝ်ႈၼႆႉ ပတ်းပိုၼ်ႉလုမ်ႈၾႃႉ ၵူၼ်းၸပ်းတၢင်းပဵၼ် မီးထိုင် 3 လၢၼ်ႉပၢႆ ၊ တၢႆ 2 သႅၼ်ဢဵတ်းပၢႆ ၊ မိူင်းႁူမ်ႈတုမ် မၢၼ်ႈ ၵေႃႈ ဝၼ်းမိူဝ်ႈၼႆႉ တိုၵ်ႉမီးၵူၼ်းၸပ်းတၢင်းပဵၼ်ထႅင်ႈ 3 ၵေႃႉ လႄႈ ၵူၼ်းပဵၼ်မီးၵႂႃႇ 149 ၵေႃႉ။ မိူင်းတႆးပွတ်းႁွင်ႇမီး 2 ၵေႃႉ ၊ ၼႂ်းမိူင်းတႆးပွတ်းၸၢၼ်း ယႃၶႅၼ်းၵေႃႉၼိုင်ႈ ၵိုတ်းၵေႃႉၼိုင်ႈ၊ မိူင်းတႆး ပွတ်းဢွၵ်ႇၵေႃႈ မီးၵူၼ်းၸပ်းတၢင်းပဵၼ် 3 ၵေႃႉ။
