ၵူၼ်းမိူင်းၼႂ်းဝၢၼ်ႈတွၼ်းၼႄႇ ၸႄႈဝဵင်းလႃႈသဵဝ်ႈ ထုၵ်ႇၶၢၼ်းၸႂ်ႉတဵင်ႇၶဝ်ႈသူင်ႇပၼ် တီႈတပ်ႉပၢင်သဝ်း သိုၵ်း ပျီႇတူႉၸိတ်ႉမၢၼ်ႈပၢင်ႇ ဢၼ်ပၵ်းသဝ်းဝႆႉတီႈ လွႆပၢင်လူမ်း ၸႄႈဝဵင်းလႃႈသဵဝ်ႈ ဝႃႈၼႆ။

ဝၼ်းတီႈ 24/01/2018 ယၢမ်းၵၢင်ၼႂ် ၵူၼ်းမိူင်း 8 ၵေႃႉ ၼႂ်းဝၢၼ်ႈတွၼ်းၼႄႇ ဢိူင်ႇၼႃးၼၢင်း ထုၵ်ႇသိုၵ်းပျီႇ တူႉၸိတ်ႉ မၢၼ်ႈ ပၢင်ႇ တဵၵ်းၸႂ်ႉႁႂ်ႈသူင်ႇၶဝ်ႈပၼ် တီႈတပ်ႉပၢင်သဝ်း လွႆပၢင်လူမ်း ဢၼ်မီးၾၢႆႇႁွင်ႇ ဝၢၼ်ႈတွၼ်း ၼႄႇ ယၢၼ်ၵႆ မွၵ်ႈ 3 ၸူဝ်ႈမူင်း မီးၼႂ်းၵႄႈ ထုင်ႉၼမ်ႉပွင်ႈတင်း ထုင်ႉမိူင်းယေႃ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ဝႃႈၼႆ။

ၽူႈပွင်ၵၢၼ် ပႃႇတီႇႁူဝ်သိူဝ် ၼႂ်းၸႄႈဝဵင်းလႃႈသဵဝ်ႈ ၵေႃႉၼိုင်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈဝႃး ဝၼ်းတီႈ 23 ၵူၼ်းမိူင်းၼႂ်းဝၢၼ်ႈတွၼ်းၼႄႇ ၶဝ်လိူၵ်ႈၵၼ်ၽႂ်တေၵႂႃႇသူင်ႇပၼ် ၵူၺ်းၵႃႈ တူၵ်းၼႃႈႁိူၼ်းၽႂ် လၢႆလၢႆတႄႉၵေႃႈ ပႆႇႁူႉ။ ဢၼ်ၶၢၼ်းၵူၼ်းမိူင်းၵႂႃႇသူင်ႇၶဝ်ႈပၼ်ၶဝ်သမ်ႉ တႃႇၵူၼ်း 8 ၵေႃႉ။ ၼိုင်ႈၵေႃႉလႂ် လႆႈ တဵင်ႇၶဝ်ႈၶိုၼ်ႈလွႆ 6 ပေႇ။ ပေႃးႁူၵ်းၵေႃႉၵေႃႈ ပဵၼ်ၵႂႃႇ 48 ပေႇၶႃႈယဝ်ႉ” ဝႃႈၼႆ။

ၵူၼ်းဝၢၼ်ႈတွၼ်းၼႄႇ ၵေႃႉၼိုင်ႈလၢတ်ႈဝႃႈ “ လွင်ႈသူင်ႇၶဝ်ႈၼမ်ႉတၢင်းၵိၼ် ပၼ်ပျီႇတူႉၸိတ်ႉၼႆႉ ၶဝ်ဢမ်ႇ မၵ်း မၼ်ႈၶၢဝ်းယၢမ်းမၼ်း သင်ဝႃႈၶဝ်ႈၼမ်ႉတၢင်းၵိၼ်ၶဝ်မူတ်းမိူဝ်ႈလႂ်ၵေႃႈ သင်ႇလူင်းမႃးၼႂ်းဢိူင်ႇဝၢၼ်ႈ။ တူဝ်တႅၼ်းၶဝ် သမ်ႉ ၸႂ်ႉၵူၼ်းဝၢၼ်ႈမိူဝ်းသူင်ႇပၼ်ၶဝ်။ လီဢိမ်ႇ ၼႃႇၶႃႈ ဢၼ်ၶဝ်ႁဵတ်းပၼ်ႁဝ်းၶႃႈၵူၼ်းမိူင်းၸိူင်ႉၼႆ ၵမ်ႉယွၼ်း ၼႆႉယွၼ်းၼၼ်ႉ ယွၼ်းယဝ်ႉသေဢမ်ႇၵႃး သမ်ႉလႆႈသူင်ႇပၼ်ၶဝ်ထႅင်ႈ။ ဢၼ်ၶဝ်ၵဵပ်းၼၼ်ႉ ၵဵပ်းၶွၼ်ႇပဵၼ်ပီ ယဝ်ႉၵေႃႈ ၶွၼ်ႇယွႆႈၶွၼ်ႇယႅမ်း ၸိူဝ်းၼႆႉၵေႃႈ ၵဵပ်းထႅင်ႈ။ ႁဝ်းၶႃႈ ၵူၼ်းမိူင်းတႄႉ ၵပ်ႉၵိၼ်းၶၢၼ်ၸႂ်တႄႉၶႃႈ” ဝႃႈၼႆ။

လိူဝ်သေၼၼ်ႉ ၵူၼ်းမိူင်းၼႂ်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈၵေႃႈ ၺႃးသိုၵ်းပျီႇတူႉၸိတ်ႉမၢၼ်ႈပၢင်ႇၼႆႉၵူၺ်း ၼင်ႇၵဝ်ႇ ၸီႇသင်ႇႁႂ်ႈၵူၼ်းဝၢၼ်ႈ ၵဵပ်းငိုၼ်းသူင်ႇပၼ်ၶဝ် တႃႇငိုၼ်း 50 သႅၼ်ပျႃး ၼႂ်းဝၼ်းတီႈ 24 ၼႆႉ ဝႆႉပဵၼ်ဝၼ်း လိုၼ်းသုတ်း ႁႂ်ႈလႆႈၵႂႃႇမွပ်ႈပၼ်ၶဝ် ဝႃႈၼႆ။

ၼႂ်းဢိူင်ႇမိူင်းၵႅတ်ႈၼႆႉ မီး 13 ဝၢၼ်ႈ ဢၼ်ၸုမ်းသိုၵ်းပျီႇတူႉၸိတ်ႉမၢၼ်ႈပၢင်ႇၵဵပ်းငိုၼ်း ႁႂ်ႈသႂ်ႇပၼ်ၶဝ် ၼႂ်းပီ 2018 ၼႆႉပဵၼ်ပွၵ်ႈဢွၼ်တၢင်းသုတ်း။