SSPP ဢွၵ်ႇလိၵ်ႈပိုၼ်ၽၢဝ်ႇ ႁပ်ႉတွၼ်ႈ ၵူၼ်းမိူင်း ၸိူဝ်းတေလုၵ်ႉတီႈၵႆ ပွၵ်ႈၶိုၼ်းဝၢၼ်ႈၵဝ်ႇမိူင်းလင် ၊ တိုၵ်းသူၼ်း ႁႂ်ႈ ပွင်ႇၶၢဝ်ႇၸူး ၸဝ်ႈၼႃႈတီႈၵူႈၵေႃႉ ဝႃႈၼႆ။
မိူဝ်ႈၼႆႉ ဝၼ်းတီႈ 24/4/2020 ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢွၵ်ႇလိၵ်ႈပိုၼ် ၽၢဝ်ႇ ယိၼ်းလီႁပ်ႉတွၼ်ႈပေႃႈမႄႈၵူၼ်းမိူင်း ၸိူဝ်းၵႂႃႇႁဵတ်းၵၢၼ် တၢင်းမိူင်းထႆး၊ မိူင်းၶႄႇ ၊ ၸွမ်းလႅၼ်လိၼ်တႆး- ထႆး-ၶႄႇ လႄႈ ၼႂ်းၶူးၼႂ်းဝဵင်းယႂ်ႇလူင် ၸိူဝ်းၼၼ်ႉ။ ယွၼ်ႉမီးၶၢဝ်ႇဝႃႈ တေဢွၼ်ၵၼ်ပွၵ်ႈၶိုၼ်းႁႃမုင်ႉႁေႃ ႁိူၼ်းၽႂ်မၼ်းတင်းၼမ် လၢႆ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ဢိင်ၼိူဝ်ၶေႃႈပိုၼ်ၽၢဝ်ႇ ၸုမ်းပၢႆးယူႇလီလုမ်ႈၾႃႉ WHO ၼၼ်ႉသေ ပေႃးၵူၼ်း လုၵ်ႉတီႈၵႆပႆတီႈယၢဝ်းၶိုၼ်းမႃးၸူးမုင်ႉႁေႃႁိူၼ်း ဢူႈမႄႈပီႈၼွင်ႉတူဝ်ၵဝ်ႇၼၼ်ႉ တေလႆႈယူႇၼွၵ်ႈဝၢၼ်ႈ 26 ဝၼ်းသေ ပေႃးဢမ်ႇတိတ်းၸပ်း တၢင်းပဵၼ်ၶူဝ်ႊဝိတ်ႉ – 19 ၸိုင် ၸင်ႇတေလႆႈၶဝ်ႈဝၢၼ်ႈယူႇၸွမ်းမုင်ႉႁေႃႁိူၼ်းၸဝ်ႈၵဝ်ႇ” ဝႃႈၼႆ။
ၸဝ်ႈႁၢၼ် တၢၼ်းဢွင်ႇ ၽူႈၶၢၼ်ပၢၵ်ႇ SSPP လၢတ်ႈတီႈၽူႈတွႆႇႁွၵ်ႈဝႃႈ “ တီႈၼႂ်းၼႃႈတီႈႁဝ်းၶႃႈၵုမ်းၵမ်ဝႆႉၼႆႉ ယူႇတီႈ ဢိူင်ႇလႂ် ဢိူင်ႇၼၼ်ႉ ႁဵတ်းဝႆႉတီႈယူႇ တီႈသဝ်း တႃႇၵူၼ်းလုၵ်ႉတီႈၵႆပႆတီႈယၢဝ်းၶဝ်ႈမႃး ယူႇၸူဝ်ႈၶၢဝ်း ႁၢင်ႈႁႅၼ်းဝႆႉယူႇၶႃႈ။ ၵူၺ်းၵႃႈ မိူဝ်ႈၸုပ်ႈဢွၼ်တၢင်းပူၼ်ႉမႃးၼႆႉ ၶဝ်ဢမ်ႇၸွမ်းပၵ်းပိူင်သေ မႃးမူၵ်းလၵ်ႉယူႇဝႆႉၸွမ်းႁိူၼ်းယေး ပီႈၼွင်ႉၽႂ်မၼ်း ၵေႃႈ ဢမ်ႇမႃးပွင်ႇၶၢဝ်ႇလၢတ်ႈတီႈၽူႈမီးပုၼ်ႈၽွၼ်းၶဝ် ၸိူဝ်းၼၼ်ႉၵေႃႈမီး” ဝႃႈၼႆ။
သိုပ်ႇလၢတ်ႈဝႃႈ “ ဢၼ်ၶႂ်ႈဝႃႈတႄႉ တၢင်းပဵၼ်ၼႆႉ ယႃႇပေဝႆႉမဝ်မၢင် လွင်ႈတီႈဢၼ်လႆႈမႃးယူႇၼွၵ်ႈဝၢၼ်ႈၸူဝ်ႈၵႅပ်ႉ ၸူဝ်ႈ ၶၢဝ်းၸိူဝ်းၼႆႉ မၼ်းပဵၼ်ၽွၼ်းလီတႃႇၵႅတ်ႇၶႄႁႄႉၵင်ႈၸိူဝ်ႉၸၢတ်ႈဝၢၼ်ႈမိူင်း ပီႈၼွင်ႉဢူႈမႄႈႁဝ်း ၸိူင်ႉၼၼ်ၵူၺ်း ဢမ်ႇၸႂ်ႈဝႃႈ ပၼ်တၢမ်ႇၵၼ်သေ ၸႂ်ႉယူႇၼွၵ်ႈဝၢၼ်ႈၸိူင်ႉၼၼ် ၶႂ်ႈႁႂ်ႈၵူၼ်းမိူင်းႁဝ်း ၸိူဝ်းတေလုၵ်ႉတီႈၵႆ ပႆတီႈယၢဝ်းပွၵ်ႈ မႃးၼၼ်ႉ ၶႂ်ႈႁႂ်ႈပွင်ႇၸႂ်ၸိူင်ႉၼႆၶႃႈ”ဝႃႈၼႆ။
လိူဝ်ၼၼ်ႉ ၵူၼ်းမိူင်း ဢၼ်တေပွၵ်ႈၶိုၼ်းဝၢၼ်ႈၵဝ်ႇမိူင်းလင်ၼၼ်ႉ တေလႆႈပွင်ႇၸႂ်ႁၼ်ထိုင် ၸိူဝ်ႉၸၢတ်ႈၸၢဝ်းၶိူဝ်းလႄႈ ပေႃႈမႄႈပီႈၼွင်ႉၽႂ်မၼ်း ၼင်ႇႁိုဝ် တၢင်းပဵၼ်ၶူဝ်ႊဝိတ်ႉ – 19 ၼႆႉ တေဢမ်ႇၽႄႈတိူၼ်းထိုင်ၼႂ်းပွၵ်ႉယွမ်ႇဝၢၼ်ႈသူၼ်ၼႃႈ ႁိူၼ်းၸဝ်ႈၵဝ်ႇၼၼ်ႉ တေလႆႈပွင်ႇၶၢဝ်ႇထိုင် တီႈၽူႈမီးပုၼ်ႈၽွၼ်း ဝၢၼ်ႈ၊ ဢိူင်ႇ၊ ၸုမ်းသေ ယွမ်းႁပ်ႉႁဵတ်းၸွမ်း ၼင်ႇ ၶေႃႈ ၾၢင်ႉ WHO ပိုၼ်ၽၢဝ်ႇ တေလႆႈယူႇၼွၵ်ႈဝၢၼ်ႈ တီႈဢၼ်ၽူႈမီးပုၼ်ႈၽွၼ်းတမ်းဝၢင်းပၼ် ၶၢဝ်းတၢင်း 26 ဝၼ်း ႁႂ်ႈႁူႉငဝ်းလၢႆးပၢႆးယူႇလီတူဝ်ၵဝ်ႇယဝ်ႉၸင်ႇၶဝ်ႈဝၢၼ်ႈ ဝႃႈၼႆ။
ယဝ်ႉၵေႃႈ တႃႇၵႅတ်ႇၶႄ တၢင်းပဵၼ်ၶူဝ်ႊဝိတ်ႉ -19 ၼႆႉ ၵူၼ်းၵူႈၵေႃႉ မီးပုၼ်ႈၽွၼ်းလႄႈ တေလႆႈတႄႇတီႈတၢင်းႁူႉ တူဝ် ၵဝ်ႇသေ ႁဵတ်းသၢင်ႈၵႂႃႇ သင်ဝႃႈ မီးၵူၼ်းၶဝ်ႈမႃး/ ဢွၵ်ႇ ဢမ်ႇမွၵ်ႇလၢတ်ႈၸိုင် ၵဵဝ်ႇၶွင်ႈတီႈၽႂ်တီႈလႂ်ၵေႃႈလီ ယူႇတီႈၽူႈ မီးပုၼ်ႈၽွၼ်း ၾၢႆႇဢုပ်ႉပိူင်ႇ SSPP/SSA ၵူႈၸၼ်ႉၸၼ်ႉ မီးသုၼ်ႇလႆႈဢဝ်လိူင်ႈၵၼ်ၵႂႃႇၵမ်းသိုဝ်ႈ ၼႂ်းလိၵ်ႈပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။
တေႃႈလဵဝ် ႁိမ်းႁွမ်းဝၢၼ်ႈႁႆးလႄႈ ၼႃႈတီႈဢၼ်ၵုမ်းၵမ်ဝႆႉၸိူဝ်းၼၼ်ႉ လႆႈႁဵတ်းဢွင်ႈတီႈတႃႇၵူၼ်းပွၵ်ႈမိူင်းၵႆမႃး တင်း မူတ်း မီး 6 တီႈ။ မိူဝ်ႈပူၼ်ႉမႃး ၵူၼ်းမိူင်းပွၵ်ႈၶဝ်ႈမႃးၼႂ်းၼႃႈတီႈ SSPP ၵုမ်းၵမ်ဝႆႉၼႆႉ ၸွမ်းၼင်ႇ ယိုၼ်းထိုင်လႆႈသဵၼ်ႈမၢႆမီး 3 ပုၼ်ႈ 1 ပုၼ်ႈၵူၺ်း ။ တႃႇ 2 ပုၼ်ႈတႄႉ ဢမ်ႇလႆႈသဵၼ်ႈမၢႆ။ ပဵၼ်ဢၼ်လီမႆႈ ၸႂ်တႄႉတႄႉ ယွၼ်ႉၼၼ် ႁႂ်ႈဢွၼ်ၵၼ်ပွင်ႇၶၢဝ်ႇၸူး တီႈၽူႈမီးပုၼ်ႈၽွၼ်း ပွၵ်ႉ၊ ဢိူင်ႇ၊ ၸုမ်း တီႈၸဝ်ႈၵဝ်ႇယူႇၼၼ်ႉသေၵမ်း ၸဝ်ႈႁၢၼ် တၢၼ်းဢွင်ႇ လၢတ်ႈၼႄၼင်ႇၼႆ။
