ၸုမ်းတူင်ႉၼိုင်တူင်ႇဝူင်းၵူၼ်းလႄႈ ပလိၵ်ႈဝဵင်းၼမ်ႉတူႈ ႁူမ်ႈၵၼ် တီႉၺွပ်းၵူၼ်းသိုဝ်ႉၶၢႆ သူႇသမ်းၵိၼ်ယႃႈမဝ်းၵမ် 30 ပၢႆ ။
ဝၼ်းတီႈ 18/4/2020 ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆး – တဢၢင်း၊ ၽူႈၵွၼ်းပွၵ်ႉ/ ဢိူင်ႇလႄႈ ပလိၵ်ႈၾၢႆႇၽဵဝ်ႈ မူၺ်ႉယႃႈမဝ်းၵမ် ႁူမ်ႈၵၼ်သေ လူင်းပိုၼ်ႉတီႈၵူတ်ႇထတ်းတီႉၺွပ်း ၵူၼ်းၵႃႉၶၢႆသူႇသမ်းၵိၼ်ယႃႈမဝ်းၵမ် ၼႂ်းၸႄႈဝဵင်း ၼမ်ႉတူႈ ၸိုင်ႈတႆးပွတ်းႁွင်ႇ တီႉၺွပ်းလႆႈတင်းမူတ်း 30 ပၢႆ ဝႃႈၼႆ။
လုင်းပႃႉၺၢၼ်ႇ ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၼႂ်းၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈယဝ်ႉ ပဵၼ်ပီႈ ၼွင်ႉၵူၼ်းတၢင်းဝၢၼ်ႈၼွၵ်ႈၼႃးပၢင်ႇႁဝ်း တႆးၵေႃႈပႃး လွႆၵေႃႈပႃး ၵေႃႇရၶႃး ၵေႃႈပႃးၶႃႈ။ ပဵၼ်ၵူၼ်းဝၢၼ်ႈ လၢႆလၢႆ ဢိူင်ႇဝႆႉၶႃႈဢေႃႈၼၼ်ႉ တင်းမူတ်းတီႉလႆႈ 30 ပၢႆ” ဝႃႈၼႆ။
ၼႂ်းပီၼႆႉမႃး ၵူၼ်းသူႇသမ်းၵႃႉၶၢႆယႃႈမဝ်းၵမ်းၼႂ်းၸိုင်ႈတႆးပွတ်းႁွင်ႇ ၺႃးမူႇၸုမ်းၼႂ်းဢိူင်ႇၼႂ်းဝၢၼ်ႈ ႁႃတီႉၺွပ်း သေပၼ်တူတ်ႈတၢမ်ႇ။ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းဢဝ်ၵႂႃႇပူၵ်းပွင်မူၼ်ႉမႄးတူဝ်ၸႂ်ပၼ်။
လုင်းပႃႉၺၢၼ်ႇလၢတ်ႈဝႃႈ -“တီႈၼမ်ႉတူႈႁဝ်းၶႃႈၼႆႉ ၵူၼ်းၵႃႉၶၢႆသူႇသမ်းၵိၼ်ယႃႈမဝ်းၵမ်ၼႆႉ မၼ်းတိုၼ်းၼမ်။ ၾၢႆႇၼိုင်ႈ တီႈႁဝ်းၶႃႈၼႆႉ ၸုမ်းယိပ်းၵွင်ႈၵၢင်ႇလၢႆမူႇလၢႆၸုမ်းၵေႃႈတူင်ႉၼိုင်ၵႂႃႇမႃး။ ၵူၼ်းၸိူဝ်းၵႃႉၶၢႆ သူႇသမ်းယႃႈၵိၼ်ၼၼ်ႉ ပေႃးပဵၼ်ပွတ်းဝၢၼ်ႈပွတ်းထိူၼ်ႇၼႆ ၶဝ်ၺႃးၸုမ်းယိပ်းၵွင်ႈၵၢင်ႇတီႉၺွပ်း။ ၵွပ်ႈၼႆလႄႈၶဝ်ဢမ်ႇယူႇလႆႈသေ ဢွၼ်ၵၼ်ပၢႆႈမႃး ” – ဝႃႈၼႆ။
ၵူၼ်းၵႃႉၶၢႆသူႇသမ်းၵိၼ်ယႃႈမဝ်းၵမ် ဢၼ်တီႉလႆႈ 30 ပၢႆၼႆႉ ယူႇတီႈၸုမ်းတူင်ႇဝူင်းၸၢဝ်းၶိူဝ်းၽႂ်မၼ်း ဢဝ်ပုၼ်ႈၽွၼ်း သူင်ႇပွၵ်ႈ ၶိုၼ်းမိူဝ်း ယူႇဝၢၼ်ႈၽႂ်မၼ်းၶိုၼ်းသေ ႁႂ်ႈမူၼ်ႉမႄးတူဝ်ၸႂ်ၸဝ်ႈၵဝ်ႇ ဝႃႈၼႆ။
ၼႂ်းၸႄႈဝဵင်းၼမ်ႉတူႈၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ယူႇဝႆႉ မိူၼ်ၼင်ႇ တပ်ႉသိုၵ်းမၢၼ်ႈ၊ တပ်ႉသိုၵ်းတဢၢင်း၊ တပ်ႉ သိုၵ်းၶၢင်၊ တပ်ႉသိုၵ်းတႆး ပွတ်းၸၢၼ်းလႄႈ ပွတ်းႁွင်ႇ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ