လူမ်းလူင်ၽတ်ႉပဝ်ႇ ၼႂ်းၸႄႈဝဵင်းမူႇၸေႊ လင်ၶႃးမုင်းႁိူၼ်းၵူၼ်းဝၢၼ်ႈ ၵွၵ်းပိဝ်လူႉၵွႆ တင်းၼမ် ။
ဝၼ်းတီႈ 21/4/2020 ယၢမ်းၵၢင်ၶိုၼ်း မွၵ်ႈ 10 မူင်းပၢႆ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၾူၼ်လူင်လူမ်း လူင်ၽတ်ႉႁႅင်း လင်ၶႃးႁိူၼ်းၵူၼ်းဝၢၼ်ႈ တင်းပွၵ်ႉႁူဝ်မူၼ်ႇ၊ ပွၵ်ႉၸၢၼ်း၊ ပွၵ်ႉၵၢတ်ႇ၊ ပွၵ်ႉၼိူဝ် ၵွင်းလွႆ 45 လႄႈ ႁူဝ်ၼႃး ၸိူဝ်းၼႆႉ ၵွၵ်းပိဝ်ၸွမ်းလူမ်း လူႉၵွႆ တင်းၼမ်။
ၸၢႆးၵျေႃႇတဵင်း ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈယဝ်ႉ။ လူမ်းၽတ်ႉႁႅင်းၶႃႈဢေႃႈ မိူဝ်ႈဝႃးၼႆႉ။ ႁိူၼ်းၵူၼ်းဝၢၼ်ႈ တီႈပွၵ်ႉႁူဝ်မူၼ်ႇတႄႉ လင်ၶႃးႁိူၼ်း လူႉၵွႆ တေမီး 4-5 လင်။ ၵမ်ႈၼမ် ပဵၼ်ႁိူၼ်း ၸိူဝ်းယူႇၸွမ်းပၢၼ်းတၢပ်ႈလွႆ ။ လူမ်းၼႆႉ လုၵ်ႉတၢင်းၾင်ႇၼမ်ႉမၢဝ်းသေ ၶိုၼ်ႈမႃး။ တေႃႈလဵဝ် ယူႇတီႈၾၢႆႇလူင်ပွင်ၸိုင်ႈ လူင်းၵႂႃႇတူၺ်း/ ၸွႆႈယူႇ ” ဝႃႈၼႆ။
ပူၼ်ႉမႃးဝၼ်းတီႈ 24/3/2020 ယၢမ်းႁူဝ်ၶမ်ႈ မွၵ်ႈ 5 မူင်းၼၼ်ႉၵေႃႈ ၾူၼ်မၢၵ်ႇႁဵပ်းတူၵ်းသႂ်ႇ ႁိူၼ်းၵူၼ်းဝၢၼ်ႈ တၢင်း ပွတ်းၸေႊလၢၼ်ႉ၊ မၢၼ်ႈသၢႆးၶၢဝ်၊ မၢၼ်ႈၸၢၼ်းသႃႇ၊ မၢၼ်ႈတူၼ်ႈႁုင်းၶဵဝ် ၸိူဝ်းၼႆႉ ၼင်ႇၵဝ်ႇ။ ၽွင်းၼၼ်ႉ လဵၵ်း မုင်းႁိူၼ်းပွင်ႇၵူၺ်းဢမ်ႇၵႃး တုမ်ႉတိူဝ်ႉပႃး သူၼ်ၶဝ်ႈၵၢပ်ႇ၊ သူၼ်မၢၵ်ႇပၵ်ႉလႄႈ ၶဝ်ႈၵျုင်ႇ ၸိူဝ်းၼႆႉ ထႅင်ႈတင်းၼမ် ဝႃႈၼႆ။
ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ၶမ်ႈဝႃးၼႆႉတႄႉ လင်ၶႃးမုင်းႁိူၼ်း လူႉၵွႆၸွမ်း လၢႆလင် ဢၼ်ဝႃႈၼၼ်ႉတႄႉ ပႆႇလႆႈၼပ်ႉတူၺ်းၶႃႈ။ ၵူၼ်းမၢတ်ႇၸဵပ်းလူႉတၢႆၸွမ်းၵေႃႈဢမ်ႇမီးၶႃႈ ” ဝႃႈၼႆ။
မိူဝ်ႈဝၼ်းတီႈ 2/4/2020 ယၢမ်းၵၢင်ဝၼ်း 12:10 မူင်းၼၼ်ႉ လူမ်းလူင် ၽတ်ႉပဝ်ႇ ၼႂ်းၸႄႈဝဵင်းလွႆလႅမ်၊ တီႈဝၢၼ်ႈၵုင်းၼႃးသၢႆး ဢိူင်ႇၼွင်လႅင် ဝဵင်းပၢင်လူင်ၼၼ်ႉ လင်ၶႃးဝတ်ႉၵေႃႈပိဝ်၊ ၸရွပ်ႈၵေႃႈ ၵွႆသွင်လင်၊ ႁိူၼ်းယေး ၵူၼ်းဝၢၼ်ႈၵေႃႈ ၺႃး ပႃးၸွမ်း။ တီႈဝတ်ႉ တင်း ၸရွပ်ႈၵူၺ်း လူႉၵွႆ ဢမ်ႇယွမ်းမွၵ်ႈ 15 သႅၼ်ပျႃး ၵူၼ်းဝၢၼ်ႈ လၢတ်ႈၼႄၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ