ၾႆးမႆႈႁွင်ႈၵဵပ်းၶူဝ်းၶွင် တီႈမူႇၸေႊ

ၾႆးမႆႈႁွင်ႈၵဵပ်းၶူဝ်းၶွင် တီႈမူႇၸေႊ လင်ၼိုင်ႈ မီးလွင်ႈလူႉသုမ်းတင်းၼမ်လၢႆ လွင်ႈၵူၼ်းမၢတ်ႇၸဵပ်းလူႉတၢႆ ဢမ်ႇမီး။

ဝၼ်းတီႈ 21/4/2020 ယၢမ်းၵၢင်ၶိုၼ်းမွၵ်ႈ 9 မူင်းၼႆႉ ၾႆးမႆႈ တီႈႁွင်ႈၵဵပ်းၶူဝ်းၶွင် (ၵူဝ်ႇတွင်ႇ) တီႈမၢၼ်ႈၵွင်းမူးလွႆ ပွၵ်ႉၵွင်း မူးတူင်ႈ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၶူဝ်းၶွင်လႆႈမႆႈၵႂႃႇၸွမ်းၾႆးတင်းၼမ်လၢႆ ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ၾႆးမႆႈ ႁွင်ႈၵဵပ်းၶူဝ်းၶွင်ၶႃႈ။ ၵႂၢင်ႈႁွင်ႈတေမီးမွၵ်ႈ 100 ထတ်းပၼ်ႇမူၼ်းၼႆႉ တေမီး 2 ႁွင်ႈ။ တႃႇႁွင်ႈၼိုင်ႈ မီးဝႆႉၶူဝ်းဢိတ်းၼိုင်ႈ။ တႃႇႁွင်ႈၼိုင်ႈ တႄႉ ၶူဝ်းတဵမ်လူင်ဝႆႉၶႃႈ။ လွင်ႈလူႉသုမ်းတႄႉ ပႆႇလႆႈႁူႉ ဝႃႈလူႉသုမ်းမွၵ်ႈၵႃႈႁိုဝ် ဢၼ်ဝႃႈၼၼ်ႉ” ဝႃႈၼႆ။

လွင်ႈၾႆးမႆႈၼႆႉ လႆႈႁူႉဝႃႈပဵၼ်ၾႆးၾႃႉသျွတ်ႉ။ ၶူဝ်းၶွင်ဢၼ်လႆႈမႆႈၵႂႃႇၼၼ်ႉ ၵမ်ႈၼမ်ပဵၼ်ၼူၼ်းၵုၺ်။ ပဵၼ်ၼူၼ်းၵုၺ် ဢၼ်တေႃႉဢဝ်မႃးတၢင်းမိူင်းမၢၼ်ႈသေ တေသူင်ႇၸူးတၢင်းမိူင်းၶႄႇ။ တင်းမူတ်းမီး 400 တၼ်ႊပၢႆ 1 တၼ်ႊသမ်ႉ တူၵ်းမႅၼ်ႈငိုၼ်းၶႄႇ 10,000 ယႂၼ်ပၢႆ ၸဝ်ႈၶွင်မၼ်းတႄႉ ပဵၼ်ၸၢဝ်းၶႄႇ လႆႈႁူႉၼင်ႇၼႆ။

ၸၢႆးႁိၼ်လဵၵ်း လၢတ်ႈဝႃႈ “ ၵူၼ်းႁိမ်းႁွမ်းလၢတ်ႈၼႄဝႃႈ သၢႆၾႆးဢၼ်လတ်း တၢင်းၼိူဝ် လင်မုင်းၵူဝ်ႇတွင်ႇၼၼ်ႉ ယွၼ်ႉ လူမ်းၽတ်ႉႁၢဝ်ႈႁႅင်းသေ သၢႆၾႆးၽတ်ႉတိူဝ်ႉသႂ်ႇလဵၵ်းၽိူၵ်ႇဢၼ်မုင်းၼၼ်ႉသေ ၸင်ႇပဵၼ်ၾႆးသျွတ်ႉလၢမ်းမႆႈၼႆဝႃႇ” ဝႃႈၼႆ။

တေႃႈလဵဝ်ၼႆႉ ၾၢႆႇလႂ်ၵေႃႈ ပိၵ်ႉဢိုတ်းဝႆႉလႄႈ ယင်းပႆႇၸၢင်ႈသူင်ႇၵႂႃႇတၢင်း မိူင်းၶႄႇ။ ၵွပ်ႈၼႆ ၸင်ႇလႆႈမႃး ၶွၼ်ႈၵၼ်ဝႆႉ တီႈႁွင်ႈၵဵပ်းၶူဝ်းၶွင်ၼႆႉ။ ႁွင်ႈၵဵပ်းၶူဝ်း (ၵူဝ်ႇတွင်ႇ) ၼႆႉ သၢင်ႈမႃးပႆႇႁိုင်သင် ၵူၼ်းပိုၼ်ႉတီႈ ႁိမ်းႁွမ်းၸိူဝ်းၼၼ်ႉ လၢတ်ႈ ၼႄၼင်ႇၼႆ။

ဢိင်ၼိူဝ် လွင်ႈၾႆးမႆႈၼႆႉသေ ယူႇတီႈၸုမ်းၶႄၾႆး ၼႂ်းၸႄႈဝဵင်းမူႇၸေႊ ၵူႈပႃႈၵူႈၾၢႆႇ ႁူမ်ႈၵၼ်သေ ၵႂႃႇၸွႆႈၶႄၾႆး ။