ပၢင်ၵုမ်ငဝ်ႈငုၼ်း ပႃႇတီႇႁူဝ်သိူဝ် SNLD ဢၼ်ၸတ်းႁဵတ်းတီႈၸႄႈဝဵင်းလႃႈသဵဝ်ႈၼၼ်ႉ ဢုပ်ႇဢူဝ်းတႅပ်းတတ်းဝႃႈ တေၶဝ်ႈၶႅင်ႇ ၼႂ်းပၢင်လိူၵ်ႈတင်ႈသွမ်ႈ 2 တီႈၼင်ႈ ဢၼ်လုတ်ႈႁၢမ်းပဝ်ႇဝႆႉ ၼႂ်းမိူင်းတႆး ၸႄႈဝဵင်းလၢႆးၶႃႈၼိုင်ႈတီႈ ၼင်ႈလႄႈ ၽွင်းလူင်ၾၢႆႇၸၢဝ်းၶိူဝ်းတႆး ၼိုင်ႈတီႈၼင်ႈ ၼႂ်းတိူင်းတႃႈလိူဝ်ႇ ဝႃႈၼႆ။

ဝၼ်းတီႈ 20-21/01/2018 ပၢင်ၵုမ်ငဝ်ႈငုၼ်း ပႃႇတီႇ တီႇမူဝ်ႇၶရေႇၸီႇ ၸိူဝ်ႉၶိူဝ်းတႆး(ႁိုဝ်) ပႃႇတီႇႁူဝ်သိူဝ် SNLD ၸတ်းႁဵတ်းတီႈႁူင်းႁႅမ်း SkyView ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ဢုပ်ႇဢူဝ်းထတ်းသၢင်လွင်ႈ ၼႃႈၵၢၼ် တႃငၢၼ်း ဢၼ်လႆႈႁဵတ်းသၢင်ႈမႃး လွင်ႈယူပ်ႈယွမ်း၊ လွင်ႈၶိုပ်ႈၼႃႈ၊ ဝၢင်းၽႅၼ်ၵၢၼ်ငၢၼ်း တၢင်းၼႃႈ ၸဵမ် ၸိူဝ်းၼႆႉ။ လိူဝ်ၼၼ်ႉ ဢုပ်ႇဢူဝ်းတႅပ်းတတ်းပႃးထႅင်ႈ လွင်ႈတေၶဝ်ႈၶႅင်ႇ ပၢင်လိူၵ်ႈတင်ႈသွမ်ႈ ဢၼ်တေ ၸတ်းႁဵတ်း ၼႂ်းၵၢင်ပီ 2018 ၼႆႉ ဝႃႈၼႆ။

ၼၢင်းမျႃႉထူၺ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းလွႆလႅမ် လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ “ ၼႂ်းပၢင်ၵုမ်ၼႆႉ ဢုပ်ႇဢူဝ်းတႅပ်းတတ်းၵၼ်ဝႃႈ ပၢင်လိူၵ်ႈတင်ႈသွမ်ႈဢၼ်တေထိုင်ၼႆႉ တေၶဝ်ႈၶႅင်ႇ 2 တီႈၼင်ႈ ပဵၼ်ၼႂ်းၸႄႈဝဵင်းလၢႆးၶႃႈ ၼိုင်ႈတီႈၼင်ႈလႄႈ တိူင်းဝဵင်းလိူဝ်ႇ ၼိုင်ႈတီႈၼင်ႈ။ တီႈၼႂ်းၸႄႈဝဵင်း လၢႆးၶႃႈ ၼၼ်ႉ ပဵၼ်တီႈယူႇလုင်းၸၢႆးမူၼ်း ၽူႈတႅၼ်းသၽႃးၵူၼ်းမိူင်းၸႄႈဝဵင်းလၢႆးၶႃႈၼၼ်ႉ လုတ်ႈႁၢမ်းဝႆႉ ယွၼ်ႉဝႃႈ လုင်းၸၢႆးမူၼ်း လႆႈသဵင်ႈၵၢမ်ႇသုတ်းမုၼ်ၵႂႃႇတႃႇၼိုင်ႈတီႈၼင်ႈ။ တီႈတိူင်းဝဵင်းလိူဝ်ႇသမ်ႉ ပဵၼ်တီႈၼင်ႈ ၽွင်းလူင် ၾၢႆႇၸၢဝ်းၶိူဝ်းတႆး ဢူးၵျေႃႇၸေႃး ဢၼ်တၢႆၵႂႃႇၼၼ်ႉ ၼိုင်ႈတီႈၼင်ႈ ” ဝႃႈၼႆ။

တီႈၼင်ႈတင်းသွင်တီႈၼင်ႈၼႆႉ တေပဵၼ်ၽႂ်ၶဝ်ႈၶႅင်ႇ ဢမ်ႇတႅပ်းတတ်ပႃး။ ၸႄႈဝဵင်းဢၼ်ၵဵဝ်ႇၸိူဝ်းၼၼ်ႉ တေတၢင်ႇသၢႆမၢႆၸိုဝ်ႈသဵင်မႃးၵူၺ်း ဝႃႈၼႆ။

ၼႂ်း 2018 ၼႆႉ ယူႇတီႈၶွမ်ႊမသျိၼ်ႊမိူင်းႁူမ်ႈတုမ် တေၸတ်းႁဵတ်းပၢင်လိူၵ်ႈတင်ႈသွမ်ႈ ၸိူဝ်းတီႈၼင်ႈဢၼ် လုတ်ႈႁၢမ်းပဝ်ႇ ၼႂ်းၸႄႈမိူင်းလႄႈတိူင်း တင်းမူတ်း မီး 9 တီႈၼင်ႈ။ ၼႂ်းၼၼ်ႉ ပႃးမိူင်းတႆး ၸႄႈဝဵင်းလၢႆးၶႃး ၼိုင်ႈတီႈၼင်ႈ ဝႃႈၼႆ။

မိူဝ်ႈပၢင်လိူၵ်ႈတင်ႈသွမ်ႈ 1 April 2017 ပီၵၢႆၼၼ်ႉ ၼႂ်းမိူင်းတႆး ပဝ်ႇ 8 တီႈၼင်ႈ။ ပႃႇတီႇႁူဝ်သိူဝ်ၶဝ်ႈၶႅင်ႇပေႉ 6 တီႈၼင်ႈ။ မိူဝ်ႈပၢင်လိူၵ်ႈတင်ႈပတ်းပိုၼ်ႉတူဝ်ႈမိူင်း 8 November 2015 ၼၼ်ႉ သမ်ႉ ပႃႇတီႇႁူဝ်သိူဝ် လႆႈတီႈၼင်ႈဝႆႉ 40 တီႈၼင်ႈ ဝႃႈၼႆ။