ၶၢဝ်းသွၼ်းၼမ်ႉလိူၼ်ႁႃႈသၢင်းၵျၢၼ်ႇပီၼႆႉ လူင်ပွင်ၸိုင်ႈထႆးပိုၼ်ၽၢဝ်ႇ ႁၢမ်ႈၶွၼ်ႈတုမ်ၵၼ်၊ ႁၢမ်ႈတင်ႈဝူင်းပၢင်လဝ်ႈၵၼ် ၼႆသေတႃႉ မီးႁႅင်းၵၢၼ်တႆး ၸိူဝ်းႁဵတ်းၵၢၼ် ၼႂ်းၵဵင်းမႆႇ ဢမ်ႇႁဵတ်းၸွမ်း ပၵ်းပိူင်မၢႆမီႈဝၢၼ်ႈမိူင်းလႄႈ ၺႃးတီႉၺွပ်းၶင်ၶွၵ်ႈ ဝႃႈၼႆ။

ဝၼ်းတီႈ 13/4/2020 ယၢမ်းၵၢင်ၶိုၼ်း မွၵ်ႈ 9 မူင်းၶိုင်ႈ ၸဝ်ႈၼႃႈတီႈပလိၵ်ႈထႆး ၶဝ်ႈၵူတ်ႇထတ်းတီႉၺွပ်း ႁႅင်းၵၢၼ် တႆး ၽွင်းတိုၵ်ႉၼင်ႈၵုမ်းၵိၼ်လဝ်ႈၵၼ် တီႈႁွင်ႈၵဵပ်းၶူဝ်းၶွင် ထႅဝ်ဝင်းသိင်ၶမ်း သွႆး 1 ဢိူင်ႇၸၢင်ႉမွႆႈ ၸႄႈဝဵင်းၵဵင်းမႆႇ ၸိုင်ႈထႆး တင်းမူတ်း 5 ၵေႃႉ ယွၼ်ႉပူၼ်ႉပႅၼ် ပၵ်းပိူင်မတ်ႉတႃ ဢၼ်လူင်ပွင်ၸိုင်ႈထႆး ပိုၼ်ၽၢဝ်ႇဝႆႉ ႁၢမ်ႈၶွၼ်ႈတုမ်ၵၼ် တႃႇႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ဢမ်ႇၽႄႈၸပ်းၵၼ်ၼၼ်ႉ ဝႃႈၼႆ။

ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM 99 MHz မုလ်ၼိထိမႅပ်ႇ ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၶၢဝ်း တၢင်းဝူင်ႈဝၢင်ႈၼႆႉ ပီႈၼွင်ႉႁႅင်းၵၢၼ်တႆးႁဝ်း ၵုမ်းၵၼ်ၵိၼ်လဝ်ႈ၊ ၵိၼ်ၵျေႃႇၸိူဝ်းၼႆႉ မၼ်းဢမ်ႇလီႁဵတ်း။ ႁဝ်းၶႃႈတေလႆႈ ယူႇၸွမ်းပၵ်းပိူင်။ ၵွပ်ႈပိူဝ်ႈႁဝ်းၶႃႈ ယူႇၼႂ်းတူင်ႇဝူင်းၼႂ်းမိူင်းထႆး။ လွင်ႈပၵ်းပိူင်ၼႆႉ ႁဝ်းတေလႆႈပွင်ႇၸႂ်ဝႃႈ မၼ်းဢမ်ႇၸႂ်ႈ တႃႇၵဵင်းမႆႇ မိူင်းထႆးၵူၺ်း ဢမ်ႇၸႂ်ႈတႃႇပီႈၼွင်ႉတႆးၵူၺ်း၊ ပဵၼ်တႃႇႁႂ်ႈတၢင်းပဵၼ် တေဢမ်ႇၽႄႈတင်းၵမ်ႇၽႃႇၶႃႈယဝ်ႉ” ဝႃႈၼႆ။

ဢိင်ၼိူဝ်လွင်ႈၼႆႉ ယူႇတီႈလူင်ပွင်ၸိုင်ႈ မိူင်းထႆး ပိုၼ်ၽၢဝ်ႇဢွၵ်ႇဝႆႉ ႁၢမ်ႈၵူၼ်းမိူင်းၶွၼ်ႈတုမ်ၵၼ်လႄႈ ႁၢမ်ႈၸတ်းႁဵတ်းပွႆး ၾိင်ႈႁိတ်ႈႁွႆးသွၼ်းၼမ်ႉ။ လိူဝ်ၼၼ်ႉ လူင်ပွင်ၸိုင်ႈယင်းပိုၼ်ၽၢဝ်ႇ ၸႂ်ႉမၢႆမီႈ ႁၢမ်ႈၵူၼ်းမိူင်းဢွၵ်ႇႁိူၼ်း တင်ႈတႄႇ 10 မူင်း (ၵၢင်ၶိုၼ်း) တေႃႇ ၵၢင်ၼႂ်ၸဝ်ႉ 4 မူင်း။

လိူဝ်ၼၼ်ႉ လူင်ပွင်ၸိုင်ႈထႆးယင်းပိုၼ်ၽၢဝ်ႇဝႆႉဝႃႈ တႄႇဢဝ် ဝၼ်းတီႈ 10-20/4/2020 ႁၢမ်ႈသိုဝ်ႉၶၢႆလဝ်ႈ 24 ၸူဝ်ႈမူင်း၊ ႁၢမ်ႈၵူၼ်းၶွၼ်ႈတုမ်ၵၼ်လႄႈ ယဝ်ႉၵေႃႈ ႁၢမ်ႈၸတ်းပွႆးသွၼ်းၼမ်ႉ သၢင်းၵျၢၼ်ႇ ၸိူဝ်းၼႆႉ ပူင်ၵႂၢမ်းၼၵ်းၼၵ်းၼႃၼႃ ဝႆႉ။

ၸၢႆးသႅင်မိူင်း မင်းၵွၼ်း လၢတ်ႈဝႃႈ “ တေႃႈလဵဝ်ၼႆႉ သင်ဢမ်ႇႁဵတ်းၸွမ်းပၵ်းပိူင်မၢႆမီႈ ဢၼ်တမ်းဝၢင်းဝႆႉ သင်တီႉလႆႈၸိုင် တေၺႃးတၢမ်ႇၶွၵ်ႈ 1 ပီ၊ တၢမ်ႇငိုၼ်း 4 မိုၼ်ႇဝၢတ်ႇ။ ဢမ်ႇၼၼ် တၢမ်ႇၶွၵ်ႈ တင်း တၢမ်ႇငိုၼ်း ၺႃးၸွမ်းၵၼ် တင်းသွင် ဢၼ်” ဝႃႈၼႆ။

မိူဝ်ႈဝၼ်းတီႈ 13/4/2020 ယၢမ်းၵၢင်ၶမ်ႈ 9 မူင်း ယူႇတီႈၸဝ်ႈၼႃႈတီႈပလိၵ်ႈထႆး ၶဝ်ႈၵူတ်ႇထတ်း ၼႂ်းႁၢၼ်ႉၶၢႆလဝ်ႈ တီႈႁိမ်းၸၢင်ႉၽိူၵ်ႇ ၼႂ်းၵဵင်းမႆႇ ႁၢၼ်ႉၼိုင်ႈ ပဵၼ်ႁၢၼ်ႉၶၢႆလဝ်ႈပီႈၼွင်ႉတႆး ထုၵ်ႇၺႃးတီႉၺွပ်းၵႂႃႇ ၵေႃႉၼိုင်ႈ။ ၼႂ်းဝၼ်းတီႈ 13 ၵူၺ်းၼင်ႇၵဝ်ႇ ၶဝ်ႈတီႉၺွပ်းႁႅင်းၵၢၼ်တႆး ၼင်ႈၵုမ်းလဝ်ႈၵၼ် တီႈတၢင်း မူႇတီႈ 13 ဢိူင်ႇၼွင်ႁၢၼ် ၸႄႈဝဵင်းသၼ်သၢႆး ၸႄႈတွၼ်ႈၵဵင်းမႆႇထႅင်ႈ တင်းမူတ်း 5 ၵေႃႉ ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ်ၸိူဝ်ႉမႅင်း ၶူဝ်ႊဝိတ်ႉ 19 ၼႂ်းၸႄႈတွၼ်ႈၵဵင်းမႆႇ ၸိုင်ႈထႆးၼၼ်ႉ တင်းမူတ်းမီး 40 ၵေႃႉ၊ တၢႆ 1 ၵေႃႉ၊ ယႃၶႅၼ်း 23 ၵေႃႉ။ ၼႂ်းမိူင်းထႆး ပတ်းပိုၼ်ႉတႄႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 2,643 ၵေႃႉ၊ တၢႆ 43 ၵေႃႉ၊ ယႃၶႅၼ်း 1,497 ၵေႃႉ လူင်ပွင် ၸိုင်ႈမိူင်းထႆး ပိုၼ်ၽၢဝ်ႇဢွၵ်ႇဝႆႉ။