Friday, March 29, 2024

ၵူၼ်းမိူင်းၵျွၵ်ႉမႄး ၸိူဝ်းလုၵ်ႉတၢင်ႇတီႈပွၵ်ႈႁိူၼ်းၺႃးၵုမ်းတူဝ် 14 ဝၼ်းတဵမ် လႆႈမိူဝ်းႁိူၼ်းပၢၵ်ႇပၢႆ

Must read

ၵူၼ်းမိူင်းၵျွၵ်ႉမႄး ၸိူဝ်းလုၵ်ႉတၢင်ႇတီႈသီႇလႅၼ် ပွၵ်ႈၶိုၼ်းႁိူၼ်း ၺႃးၵုမ်းၵမ်တူဝ် ထတ်းပၢႆးယူႇလီ ၶူဝ်ႊဝိတ်ႉ 19 တႃႇ 14 ဝၼ်းၼၼ်ႉ မိူဝ်ႈၼႆႉ ၽူႈမီးပုၼ်ႈၽွၼ်း ႁပ်ႉႁွင်းပၼ်ပၢႆးယူႇလီသေ လႆႈပွၵ်ႈမိူဝ်း ၸူးႁိူၼ်းၽႂ်ႁိူၼ်းမၼ်း ပၢၵ်ႇပၢႆယဝ်ႉ ဝႃႈၼႆ။

Photo by – ၵူၼ်းမိူင်းၵျွၵ်ႉမႄး/ ပၢႆႉၶဝ်ႈဢွၵ်ႇဝဵင်းၵျွၵ်ႉမႄး

ဝၼ်းတီႈ 12/4/2020 ၵူၼ်းၸိူဝ်းၵႂႃႇႁဵတ်းၵၢၼ်တၢင်းမိူင်းထႆး၊ မိူင်းၶႄႇ ၊ ၵူၼ်းၸိူဝ်းလုၵ်ႉတၢင်ႇတီႈသီႇ လႅၼ်ပွၵ်ႈၶိုၼ်း ၵျွၵ်ႉမႄး ၺႃးၵုမ်းတူဝ်ပႂ်ႉတူၺ်း တၢင်းပဵၼ်ၶူဝ်ႊဝိတ်ႉ 19 တီႈႁူင်းႁဵၼ်းၸၼ်ႉသုင်မၢႆ (1) ၊ မၢႆ (3) တင်း တီႈႁူင်းလဵၼ်ႈဢဵၼ်ႁႅင်း တင်းမူတ်း ႁူဝ်ၵူၼ်းမီး 270 ၵေႃႉ။ ၼႂ်းၼၼ်ႉ တႃႇၵူၼ်း 160 ၵေႃႉ တဵမ် 14 ဝၼ်း၊ ဢမ်ႇႁၼ်ၾၢင်ႁၢင်ႈတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 လႄႈ လႆႈပွၵ်ႈမိူဝ်းႁိူၼ်းယေး ၽႂ်မၼ်း။

- Subscription -

လုင်းၸၢႆးၵူး ၸုမ်း ၶႅၵ်ႇလီပၢင်ၸႃႉ “ၼမ်ႉၶူင်း” ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈလႆႈ သင်ႇဝႆႉ တီႈၸိူဝ်းၵူၼ်းတေပွၵ်ႈမိူဝ်းၼၼ်ႉ ပေႃးပွၵ်ႈမိူဝ်းၵႂႃႇၼႆ ႁႂ်ႈလႆႈယူႇၼႂ်းပၵ်းပိူင် ၽႂ်မၼ်းသေ ယႃႇၼႅတ်ႈၵိုင်ႉၵၢင်ႉၵႂႃႇၸူမ်းပီႈပီႈၼွင်ႉၼွင်ႉ။ ၵွပ်ႈပိူဝ်ႈဝႃႈ တၢင်းပဵၼ်ဢၼ်ၼႆႉ တဵမ် 14 ဝၼ်းၵေႃႈ ပႆႇလႆႈတမ်းၸႂ်ၼႆၶႃႈလႄႈ ပေႃးဝႃႈမိူဝ်းၵႂႃႇၼႆၵေႃႈ ယႃႇပေၸူမ်းသိူဝ်းႁႅင်းၽႅဝ်။ ပဵၼ်လႆႈတႄႉ ႁႂ်ႈယၢၼ်ၵႆၵၼ် မွၵ်ႈ 3 ထတ်း/ ပေႇ (မွၵ်ႈ 2 သွၵ်ႇ) ၼႆႉ။ လိူဝ်ၼၼ်ႉ ထႅင်ႈလွင်ႈၼိုင်ႈ မၢင်ၵေႃႉ ယူႇႁိုင် မွၵ်ႈ 24 ဝၼ်း ၸင်ႇတေႁၼ်တၢင်းပဵၼ်မႃးၵေႃႈမီး” ဝႃႈၼႆ။

ၵူၼ်းမိူင်း ဢၼ်လႆႈၶႂၢင်ႉသေ ပွၵ်ႈမိူဝ်းၼႆႉ ၵမ်ႈၼမ် ပဵၼ်ၵူၼ်းဝၢၼ်ႈ တၢင်းတေႃႉၽေႇ၊ ၵုၼ်ၵွၵ်ႇ၊ တေႃႉသၢင်ႇ၊ မင်းၵုင်း ၸိူဝ်းၼႆႉ။ ၵူၼ်းၼႂ်းဢိူင်ႇၶူဝ်မုင်း ဢၼ်တိတ်းၸိူဝ်ႉမႅင်းၼၼ်ႉတႄႉ သူင်ႇယူတ်းယႃတူဝ်ဝႆႉတီႈဝဵင်းလႃႈသဵဝ်ႈသေ ယၢမ်းလဵဝ် ပၢႆးယူႇလီ ယင်းၶႅမ်ႉလႅပ်ႈလီယူႇဝႃႈၼႆ။

ဝၼ်းတီႈ 12/4/2020 ၼႆႉ ၼႂ်းမိူင်းႁူမ်ႈတုမ်ပတ်းပိုၼ်ႉ မီးၵူၼ်းၸပ်းတၢင်းပဵၼ် 38 ၵေႃႉ။ တၢႆၵႂႃႇ 3 ၵေႃႉ။ ယႃၶႅၼ်း 2 ၵေႃႉ။ ဝၼ်းမိူဝ်ႈၼႆႉ 12/4/2020 ယၢမ်းၵၢင်ဝၼ်းတဵင်ႈ worldometers.info ပိုၼ်ၽၢဝ်ႇဝႃႈ ပတ်းပိုၼ်ႉလုမ်ႈၾႃႉ ၽႄႈၸပ်း 210 မိူင်း၊ ၵူၼ်းတိတ်းၸပ်းမီး 1,780,315 ၵေႃႉ၊ တၢႆ 108,828 ၵေႃႉ၊ ဢၼ်ယႃၶႅၼ်း မီး 4 သႅၼ်ပၢႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း