ၽွင်းလူင်ၾၢႆႇသိင်ႇဝႅတ်ႉလွမ်ႉ လႄႈ ၶူဝ်းႁႄႈ ၸုမ်းလူင်ပွင်ၸိုင်ႈမိူင်းတႆး တႅမ်ႈတၢင်ႇတီႈ Facebook သုၼ်ႇ တူဝ်မၼ်းၸၢႆးဝႃႈ ၵူၼ်းလၢင်းၶိူဝ်း ၸႅၵ်ႇၶိူဝ်းၵူၼ်း သေ တမ်းၶၼ်ၶဝ်ႈသွႆး ၼႆၼၼ်ႉ တုမ်ႉယွၼ်ႈ ၼႂ်းတူင်ႇဝူင်းတႆး။

ဝၼ်းတီႈ 11/4/2020 ၼႆႉ ၽွင်းလူင် သိင်ႇဝႅတ်ႉလွမ်ႉ လူင်ပွင်ၸိုင်ႈမိူင်းတႆး တွၵ်ႊတိူဝ်ႊ ၺီႇၺီႇဢွင်ႇ တၢင်ႇဝႆႉတီႈၾေႉသ်ပုၵ်ႉသုၼ်ႇတူဝ်မၼ်းၸၢႆးဝႃႈ – ၵူၼ်းၶၢႆၶဝ်ႈသွႆးတႆး တီႈလၢင်းၶိူဝ်းၼႆႉ ပေႃးပဵၼ်တႆး ၶၢႆ႞ဝၢၼ်ႇ 500 ပျႃး ပေႃးပဵၼ်ၸၢဝ်းၶိူဝ်းမၢၼ်ႈ လႄႈတၢင်ႇၸၢဝ်းၶိူဝ်းသမ်ႉ ၶၢႆပၼ် ႞ ဝၢၼ်ႇ 800 ပျႃး။ လွင်ႈၸႅၵ်ႇယႅၵ်ႈၸၢဝ်းၶိူဝ်းၼႆႉ ႁဵတ်းႁႂ်ႈ ၶူင်းၵၢင်လူႉ။  လွင်ႈၸႅၵ်ႇယႅၵ်ႈၸၢဝ်းၶိူဝ်းၼႆႉ ပဵၼ်ဢၼ်လီဢၢႆ လူင်လၢင် ၼႂ်းလုမ်ႈၾႃႉ  ။ ပေႃးၶႂ်ႈႁႂ်ႈၶိုတ်းၸၼ်ႉလုမ်ႈၾႃႉတႄႉ လူဝ်ႇလႆႈမႄးၼမ်ႉၸႂ်ၵၼ်ဝႆးဝႆး- ဝႃႈၼႆဝႆႉ။

ၸၢႆးလဵၵ်ႉ ၽူႈၼမ်းၼမ်းပႃႇတီႇႁူဝ်သိူဝ် SNLD ၵေႃႈၸႂ်ႈ ၽူႈၶၢၼ်ပၢၵ်ႇၵေႃႈၸႂ်ႈ လၢတ်ႈတီႈၽူႈတွႆႇ ႁွၵ်ႈဝႃႈ-  “ၵေႃႉတႅမ်ႈတၢင်ႇလွင်ႈၼႆႉ ဢမ်ႇၸႂ်ႈၵူၼ်းၽၵ်းၵႃႇ ၸၢဝ်းဝၢၼ်ႈၵေႃႉၼိုင်ႈ ။ မၼ်းပဵၼ် ၽူႈမီးပုၼ်ႈၽွၼ်းၼႂ်းၸုမ်းလူင်ပွင်ၸိုင်ႈမိူင်းတႆးၵေႃႉၼိုင်ႈလႄႈ ဢၼ်မၼ်းလႃႈလီႈတႅမ်ႈတၢင်ႇၸိူင်ႉၼႆ ႁဝ်းၶႃႈ ဢမ်ႇႁၼ်လီၸွမ်းၶႃႈ။ ၸွမ်းၼင်ႇၵႂၢမ်းထုင်းမီးဝႃႈ  ၾႆးမႆႈယုၵ်းယၢၵ်း ၸၢင်ႈလၢမ်းထိုင်ႁေႃၶမ်း ၼႆၼၼ်ႉၶႃႈယဝ်ႉ။ ၶေႃႈၵႂၢမ်းမၼ်းၼႆႉ ၸၢင်ႈႁဵတ်းႁႂ်ႈပဵၼ်ပၼ်ႁႃၸၢဝ်းၶိူဝ်း ပၼ်ႁႃၶိူဝ်းၵူၼ်းသေဢမ်ႇၵႃး  ၶွင်ႉၵၢႆႇၽိတ်းပၵ်းပိူင် မၢႆမီႈပႃးထႅင်ႈ။ ”– ဝႃႈၼႆ။

ၽွင်းလူင် တွၵ်ႊတိူဝ်ႊ ၺီႇၺီႇဢွင်ႇ ၼႆႉတၢင်တူဝ်လူင်ပွင်ၸိုင်ႈမိူင်းတႆးသေလူင်းပိုၼ်ႉတီႈ ၼႂ်းၸိုင်ႈတႆး ပွတ်းၸၢၼ်းလၢႆလၢႆ ၸႄႈဝဵင်း  ။ တႃႇၵမ်ႉၸွႆႈၶဝ်ႈၼမ်ႉတၢင်းၵိၼ်ပၼ် ၵူၼ်းမိူင်း ၸွမ်းၽႅၼ်ၵၢၼ်ၸွႆႈထႅမ် ၽွင်းၶၢဝ်းၶူဝ်ႊဝိတ်ႉ 19 ။

ၸၢႆးသိူဝ်ႁၢၼ် ႁူဝ်ပဝ်ႈ ၵေႃပူၵ်းပွင် ၸဝ်ႈႁႆႈၸဝ်ႈၼႃးၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ ၵဵဝ်ႇၵပ်းၶေႃႈၵႂၢမ်းတွၵ်ႊတိူဝ်ႊၺီႇၺီႇဢွင်ႇ လၢတ်ႈမႃးၼႆႉ ႁဵတ်းႁႂ်ႈၸၢင်ႈပဵၼ်ပၼ်ႁႃၸၢဝ်းၶိူဝ်းလႄႈ ၽိတ်းတၢင်းမၢႆမီႈၸိုင်ႈမိူင်း ဝႃႈၼႆ။

“ဢၼ်ဝႃႈ ၵႃႈၶဝ်ႈသွႆး 800 ဝႃႇ 500 ဝႃႇၼၼ်ႉတႄႉ ဢမ်ႇၵႃႈႁိုဝ်။ ၶေႃႈၵႂၢမ်းမၼ်းဝႃႈဝႆႉ ပေႃးၶႂ်ႈၶိုတ်း ၸၼ်ႉၵမ်ႇၽႃႇၼၼ်ႉ တေလႆႈမူၼ်ႉမေးၼမ်ႉၸႂ် ၼႆၼၼ်ႉ မိူၼ်တၢင်းလူလၢႆ ပီႈၼွင်ႉလၢင်းၶိူဝ်းသေ ဢမ်ၵႃး မိူၼ်တၢင်းလူလၢႆၸိူဝ်ႉၶိူဝ်းတႆး တင်းသဵင်ႈယဝ်ႉ။  ၶေႃႈၵႂၢမ်းမၼ်းၵဵဝ်ႇၵပ်းၸၢဝ်းၶိူဝ်းၼၼ်ႉ ၽိတ်း မၢႆမီႈၸိုင်ႈမိူင်း ၶေႃႈ/မတ်ႉတႃ 24 ၵဵဝ်ႇၵပ်းသုၼ်ႇလႆႈၸၢဝ်းၶိူဝ်းၶႃႈဢေႃႈ။ ၵွပ်ႈၼႆလႄႈ မၼ်းလူဝ်ႇလႆႈ ယွၼ်းၼွမ်းထိုင်ၵူၼ်းမိူင်းတႆးၶိုၼ်းႁႂ်ႈၵူၼ်းမိူင်းပေႃးႁၢၼ်ႉၸႂ်ၶႃႈဢေႃႈ” – ၸၢႆးသိူဝ်ႁၢၼ်လၢတ်ႈၼင်ႇၼႆ။

ၶၢဝ်းတၢင်းၽွင်းလူင်မႃးလၢင်းၶိူဝ်းၼႆႉ ပဵၼ်ၶူင်းၵၢၼ်လူင်ပွင်ၸိုင်ႈလႄႈ ၽူႈမီးပုၼ်ႈၽွၼ်း တီႈလၢင်းၶိူဝ်း ဢွၼ်ၵၼ်တူၺ်းလူလုမ်းလႃးပၼ် ၶဝ်ႈၼမ်ႉတၢင်းၵိၼ် ဢမ်ႇႁႂ်ႈလုတ်ႈႁၢမ်းသေပိူင်၊လွင်ႈၼႆႉၽွင်းလူင် လူလၢႆ  ၵူၼ်းလၢင်းၶိူဝ်း  ၵူၺ်း – ၵူၼ်းလၢင်းၶိူဝ်းလၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၼၢင်းယိင်းႁၵ်ႉ ၽူႈတူင်ႉၼိုင်လွင်ႈၵူၼ်းၼုမ်ႇ လၢင်းၶိူဝ်းလၢတ်ႈဝႃႈ- ပီႈၼွင်ႉလၢင်းၶိူဝ်း ဢမ်ႇမီးၸႂ်ၸႅၵ်ႇယႅၵ်ႈၸၢဝ်းၶိူဝ်းၶႃႈ။ ဢၼ်ၽွင်းလူင်လၢတ်ႈၼၼ်ႉ မိူၼ်တင်းဝႃႈတူဝ်ၽွင်းလူင် ၸႅၵ်ႇ ယႅၵ်ႈ ၸၢဝ်းၶိူဝ်းၼေႁဝ်းၵူၺ်းၶႃႈဢေႃႈ။ ပိူင်ၼိုင်ႈၵေႃႈ လၢင်းၶိူဝ်းၼႆႉယွၼ်ႉမၼ်းပဵၼ် ဝဵင်းဢၼ်ပၵ်း လုမ်းၸႄႈတွၼ်ႈ။ ၽွင်းလူင်သမ်ႉမႃးၸွမ်းၵၢၼ်လူင်ပွင်ၸိုင်ႈၼႆလႄႈ မီးၸုမ်းပႂ်ႉတူၺ်းလုမ်းလႃးၶဝ်ယူႇ ယဝ်ႉ။  လွင်ႈၶဝ်ႈသွႆးၼၼ်ႉမၼ်းတေပဵၼ်ၶဝ်ႈသွႆးတႆး ဝၢၼ်ႇလဵၵ်ႉ ဝၢၼ်ႇယႂ်ႇ ၵႃႈမၼ်းဢမ်ႇပဵင်းၵၼ်သေ ၶဝ်ၶဝ်ႈၸႂ် ပွင်ႇၸႂ်ၽိတ်းၵူၺ်းၶႃႈဢေႃႈၼၼ်ႉ။ လွင်ႈၼႆႉၶႂ်ႈႁႂ်ႈ ၽွင်းလူင် ၵႄႈလိတ်ႈပၼ်ၶိုၼ်းဝႆးဝႆး – ဝႃႈၼႆ။

ယွၼ်ႉပိူဝ်ႈ မီးၵူၼ်းသျႄး ပွင်ႉထႃႉလႃႇၸွမ်း ၽူဝ်ႉသ် ၶေႃႈၵႂၢမ်းၼမ်ၼႃႇလႄႈ ၽွင်းလူင် တွၵ်ႊတိူဝ်ႊ ၺီႇၺီႇဢွင်ႇ  ၶိုၼ်းလူပ်းပႅတ်ႈ ၽူဝ်ႉသ်မၼ်း မိူဝ်ႈယၢမ်းဝၢႆးဝၼ်းမွၵ်ႈ 3 မူင်းၼႆႉ။

ၵဵဝ်ႇၵပ်းလွင်ႈၼႆႉ ၸၢႆးလဵၵ်ႉ လၢတ်ႈဝႃႈ – “မၼ်းၸၢႆး လူပ်းပႅတ်ႈမွတ်ႇပႅတ်ႈၽူဝ်ႉသ် မၼ်းၶိုၼ်း ယဵၼ်ယဵၼ် ၸိူင်ႉၼႆၵူၺ်းတႄႉ မၼ်းဢမ်ႇလႆႈ။ ယွၼ်ႉပိူဝ်ႉပူၼ်ႉပႅၼ်တေႃႇၵူၼ်းမိူင်းတႆးဝႆႉလႄႈ တၵ်းလႆႈယွမ်းၼွမ်း တွင်းပၢၼ်ႇထိုင် ၵူၼ်းလၢင်းၶိူဝ်းၵူၺ်းဢမ်ႇၵႃး တၵ်းလႆႈ ယွၼ်းၼွမ်းထိုင် ၵူၼ်းမိူင်းတႆးပတ်းပိုၼ်ႉ ယွၼ်ႉမၼ်းလူလၢႆပူၼ်ႉပႅၼ်လၢတ်ႈၸႃဝႆႉၼၼ်ႉ ” – ဝႃႈၼႆ။

ၽွင်းလူင် ၾၢႆႇႁၵ်ႉသႃသိင်ႇဝႅတ်ႉလွမ်ႉလႄႈ ႁိၼ်ႁႄႈ လူင်ပွင်ၸိုင်ႈမိူင်းတႆး တွၵ်ႊတိူဝ်ႊ ၺီႇၺီႇဢွင်ႇ   ၼႆႉ လုၵ်ႉတီႈ ၽွင်းတႅၼ်းသၽႃးၸေႈမိူင်း ပႃႇတီႇ NLD ၸႄႈဝဵင်းၼွင်ၶဵဝ် သေၶိုၼ်ႈမႃးပဵၼ် ၽွင်းလူင် ၼႂ်းၸုမ်းလူင်ပွင်ၸိုင်ႈမိူင်းတႆးဝႆႉ။