ၾၢႆႇပၢႆးယူႇလီ RCSS လူင်းၵူတ်ႇထတ်းပၢႆးယူႇလီလႄႈ ပၼ်ပိုၼ်ႉႁူႉ ၵူၼ်းမိူင်း ၵဵဝ်ႇၵပ်းတၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းမိူင်းပၼ်ႇၼၼ်ႉ ၺႃးတပ်ႉသိုၵ်းလူင်ပွင်ၸိုင်ႈမၢၼ်ႈႁၢမ်ႈႁႄႉ။

ဝၼ်းတီႈ 7/4/2020 ၼႆႉ ၾၢႆႇပၢႆးယူႇလီမေႃယႃ ၶွင်ႇသီႇဢဝ် ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လူင်းပိုၼ်ႉတီႈ ၵူတ်ႇထတ်းပၢႆးယူႇလီပၼ်ၵူၼ်းမိူင်း ၵဵဝ်ႇၵပ်းတၢင်းပဵၼ်ၶူဝ်ႊဝိတ်ႉ 19 တၢင်းပွတ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ၺႃးတပ်ႉသိုၵ်းလူင်ပွင်ၸိုင်ႈ ႁၢမ်ႈႁႄႉ။ ယင်းပၢႆတဵင်ၵႂၢမ်းၼၵ်းၸူးၵူၼ်းဝၢၼ်ႈဢိူင်ႇၼႃးမွၼ်ဝႃႈ တေဢမ်ႇလႆႈပၼ် RCSS မႃးၵူတ်ႇထတ်းပၢႆးယူႇလီ ဝႃႈၼႆ။

ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ ငိၼ်းဝႃႈသိုၵ်းမၢၼ်ႈၶဝ် ႁႄႉဢမ်ႇပၼ်ၵႂႃႇတီႈ ဝၢၼ်ႈမႆႉပူၵ်ႇ၊ ပၢင်ပီႉ ၼႂ်းဢိူင်ႇၼႃးမွၼ် ၸိူဝ်းၼၼ်ႉ။ လွင်ႈၼႆႉ ပေႃးဢဝ်ပၢႆးယူႇလီၵူၼ်းမိူင်းတူၺ်းတႄႉ မၼ်းဢမ်ႇထုၵ်ႇ မႅၼ်ႈသေဢိတ်း ဢမ်ႇထုၵ်ႇလီႁႄႉႁၢမ်ႈ။ ပေႃးဝႃႈ သိုၵ်းမၢၼ်ႈမီးလွင်ႈထၢင်ႇထိူမ်ၼိူဝ်ႁဝ်းၼႆ ႁူမ်ႈမိုဝ်းၵၼ် တင်းႁဝ်းၶႃႈ သေ ၵႂႃႇၸွမ်းၵၼ်၊ မႃးၸွမ်းၵၼ် ၶႂ်ႈထတ်း ၵၼ်ၸိူင်ႉႁိုဝ်ၵေႃႈ လႆႈၶႃႈလူး” ဝႃႈၼႆ။

ယူႇတီႈႁွင်ႈၵၢၼ် ပိုၼ်ၽၢဝ်ႇ RCSS တႆးလွတ်ႈလႅဝ်းဢွၵ်ႇဝႆႉဝႃႈ “ သိုၵ်းမၢၼ်ႈဢၼ်ယူႇပႃႈတႂ်ႈၵုမ်းၵမ် ၽႅၼ်ၵၢၼ်ယၼ်ႇ သိုၵ်း (ၸၵၶ) 17 ငဝ်ႈငုၼ်းတိူင်းသိုၵ်း ဝၼ်းဢွၵ်ႇၵၢင် (ယလၶ) ၶူဝ်လမ် ၶတ်းၶႂၢင်ႁႄႉႁၢမ်ႈ ဢမ်ႇပၼ်မေႃ ယႃၾၢႆႇ ပၢႆးယူႇ လီ ၶွင်ႇသီႇဢဝ်ၶိုၼ်းၸိုင်ႈတႆး ၵႂႃႇၵူတ်ႇထတ်းပၼ်ပၢႆးယူႇလီ လႄႈ ပၼ်ပိုၼ်ႉႁူႉၵူၼ်းမိူင်း ၵဵဝ်ႇလူၺ်ႈၽေး COVID -19 ဢၼ်ၽႄႈလၢမ်း ၸွတ်ႇတူဝ်ႈၼႂ်းလုမ်ႈၾႃႉယူႇယၢမ်းလဵဝ် ။”

“လိူဝ်ၼၼ်ႉ ပၢႆတဵင်ၵႂၢမ်းၼၵ်းၸူးၵူၼ်းဝၢၼ်ႈၼႂ်းဢိူင်ႇၼႃးမွၼ်ဝႃႈ တေဢမ်ႇလႆႈပၼ် RCSS ၵူတ်ႇထတ်းပၼ်ပၢႆးယူႇလီလႄႈ ပၼ်ပိုၼ်ႉႁူႉ ၸိူဝ်းၼႆႉ။ သင်ဝႃႈ ႁူႉၶၢဝ်ႇ ႁၼ်မႅၼ်ႈၸိုင် တေတီႉၺွပ်းသႂ်ႇၶွၵ်ႈ ” – ဝႃႈၼႆ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တႄႇလူင်းပိုၼ်ႉတီႈ ၼႂ်းၼႃႈတီႈၵုမ်းၵမ် ၵူတ်ႇထတ်းပၢႆး ယူႇလီ လႄႈ ပၼ်ပိုၼ်ႉႁူႉလွၵ်းလၢႆးႁႄႉၵင်ႈ ၶူဝ်ႊဝိတ်ႉ 19 ၸဵမ်မိူဝ်ႈႁၢင်လိူၼ်မၢတ်ႉၶျ် ၸဝ်ႈသိုၵ်း ဢုမ်ႈၶိူဝ်းလၢတ်ႈၼႄ ၼင်ႇၼႆ။

ဢိူင်ႇၼႃးမွၼ်ၼႆႉ ယၢၼ်ၵႆဝဵင်းမိူင်းပၼ်ႇ မွၵ်ႈ 25 လၵ်း မီးၸုမ်းယိပ်းၵွင်ႈၵင်ႇ မိူၼ်ၼင်ႇ တပ်ႉသိုၵ်းမၢၼ်ႈ၊ သိုၵ်းပဢူဝ်း လႄႈ သိုၵ်းတႆး RCSS တူင်ႉၼိုင်ၵႂႃႇမႃး ယူႇတႃႇသေႇ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉ တူဝ်ႈမိူင်း NCA ဝႆႉ ။