ႁႅင်းၵၢၼ်မိူင်းႁူမ်ႈတုမ် ဢၼ်ၺႃးၵုမ်းတူဝ်ဝႆႉ ၼႂ်းၶွၵ်ႈ မိူင်းမၢဝ်း ႁိမ်းပၢၵ်ႇၵေႃႉၼၼ်ႉ ၾၢႆႇမိူင်းၶႄႇ သူင်ႇတူဝ်ၶဝ် မွပ်ႈပၼ် ၾၢႆႇၽူႈမီးပုၼ်ႈၽွၼ်းလႅၼ်လိၼ် ၸႄႈတွၼ်ႈမူႇၸေႊ။
တင်ႈတႄႇ ဝၼ်းတီႈ 7 တေႃႇ 9/4/2020 ၼႆႉ ၸဝ်ႈၼႃႈတီႈၾၢႆႇၶႄႇ ဢဝ်ႁႅင်းၵၢၼ်မိူင်းႁူမ်ႈတုမ် ဢၼ် ၺႃးၵုမ်းတူဝ်တဵမ် ၶၢဝ်းတၢင်း 14 ဝၼ်းၼၼ်ႉ မွပ်ႈပၼ် ၽူႈမီးပုၼ်ႈၽွၼ်း ၾၢႆႇမိူင်းႁူမ်ႈတုမ်မၢၼ်ႈ မီး 80 ၵေႃႉပၢႆ – ဝႃႈၼႆ။
ၸၢႆးႁိၼ်လဵၵ်း မူႇၸေႊ ၸုမ်းပၵ်းတႃ ပႂ်ႉတူၺ်းၶၢဝ်ႇငၢဝ်းထုင်ႉမၢဝ်း “ၸုမ်း – ထုင်ႉႁူၺ်ႈလီ” လၢတ်ႈတီႈ ၽူႈတွႆႇႁွၵ်ႈဝႃႈ – “ မီးၵူႈဝၼ်းယဝ်ႉ ၼမ်လႄႈဢေႇ ဢၼ်ၾၢႆႇၶႄႇ သူင်ႇမႃး။ ၵမ်ႈၼမ် ပဵၼ်မၢၼ်ႈ တူင်ႈပဵင်းလွၼ်ႉလွၼ်ႉဢေႃႈ။ တင်ႈတႄႇဝၼ်းတီႈ 1/4/2020 မႃး ဢမ်ႇလႆႈၵုမ်းတူဝ်ၶဝ်ဝႆႉ တီႈမူႇၸေႊယဝ်ႉ။ ထတ်းတူၺ်းပၢႆးယူႇလီၶဝ်သေ ပၼ်ပွၵ်ႈမိူဝ်း မိူင်းၽႂ် မိူင်းမၼ်းၵမ်းလဵဝ်ဢေႃႈ။ ၵူၼ်းဢၼ်ၶဝ်တိုၵ်ႉပွႆႇမႃး 80 ၼႆႉတႄႉ တိုၵ်ႉဢုပ်ႇၵၼ်ယူႇ၊ တေၵုမ်းတူဝ်ၶဝ် ပႂ်ႉတူၺ်း 14 ဝၼ်းၼႄႇ ဢမ်ႇပႂ်ႉဢၼ်ဝႃႈၼၼ်ႉ” ဝႃႈၼႆ။
ဝၼ်းတီႈ 1/4/2020 ပူၼ်ႉမႃးၼႆႉ ၶႄႇ တင်း မၢၼ်ႈ တူၵ်းလူင်းပိၵ်ႉၽၵ်းတူလူင်/ၽၵ်းတူမိူင်း မူႇၸေႊ – ၸေႊၵဝ်ႇ (ၽၵ်းတူမၢၼ်ႈဝဵင်း၊ ၽၵ်းတူၸၢင်ႉၽိူၵ်ႇ၊ ၽၵ်းတူႁေႃၶမ်း – 3 တီႈ) ။ သဵၼ်ႈတၢင်းလႅၼ်လိၼ်ဝၢၼ်ႈတေႃႇဝၢၼ်ႈတႄႉ ၵူၼ်းၸႃႇတိၶဝ်ႈဢွၵ်ႇ ၵႂႃႇမႃး လႆႈယူႇၽွင်ႈသေတႃႉ ၽၵ်းတူလႅၼ်လိၼ်ဢၼ်ပဵၼ်တၢင်းၵၢၼ် ဢၼ်မီးၼႂ်း မူႇၸေႊ ၊ ၼမ်ႉၶမ်း ၵမ်ႈၼမ် သင်ႇဢိုတ်းဝႆႉမူတ်း။
