ၵေႃၵမ်ၵၢၼ် ပွင်သၢင်ႈလွင်ႈငမ်းယဵၼ် PMC ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး ဢွၼ်ႁူဝ်သေ လူင်းပိုၼ်ႉတီႈ ၸွႆႈထႅမ် ၶိူင်ႈၶူဝ်းၸႂ်ႉတိုဝ်းတႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းတႆး လၢႆၸႄႈဝဵင်း။

မိူဝ်ႈၼႆႉ ဝၼ်းတီႈ 9/4/2020 ယူႇတီႈၵေႃၵမ်ၵၢၼ် ပွင်သၢင်ႈလွင်ႈငမ်းယဵၼ် PMC ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်း ၸိုင်ႈတႆး RCSS/SSA ဢွၼ်ႁူဝ်ၸုမ်းတူင်ႉၼိုင်တူင်ႇဝူင်းၵူၼ်း လၢႆလၢႆၸုမ်း မိူၼ်ၼင်ႇ ၸုမ်းၵူၼ်းၼုမ်ႇတႆး TYO၊ ႁွင်ႈ ၵၢၼ်လူင်ပၢႆးယူႇလီ လႄႈ ၸုမ်းမွၵ်ႇၵွၼ် ၸိူဝ်းၼႆႉ လူင်းပိုၼ်ႉတီႈ ၸွႆႈထႅမ် ၶိူင်ႈၵမ်ႉၵႅမ် တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းတႆး တႃႇ 20 ၸႄႈဝဵင်း။

ၶုၼ်သိုၵ်းလူင် ၸၢႆးၶမ်းသိူဝ်း ၽူႈဢွၼ်ႁူဝ် လူင်းပိုၼ်ႉတီႈၸွႆႈထႅမ် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆးႁဝ်းၶႃႈ ဢွၼ်ႁူဝ်သေ လူင်းပိုၼ်ႉတီႈၸွႆႈထႅမ် ၶိူင်ႈၵမ်ႉၵႅမ် တႃႇႁႄႉၵင်ႈတၢင်းပဵၼ် ၶူဝ်ႊဝိတ်ႉ 19 ၼႆႉ ၽႅၼ်ဝႆႉတႃႇ 20 ၸႄႈဝဵင်းၶႃႈ။ ယိူင်းဢၢၼ်းတႄႉ ၶႂ်ႈၸွႆႈၵူႈၸႄႈဝဵင်းၼႂ်းမိူင်းတႆးယူႇ ၵွပ်ႈပိူဝ်ႈၶိူင်ႈၶူဝ်းႁဝ်းၶႃႈ မၼ်းပႆႇၵုမ်ႇထူၼ်ႈလီလႄႈ မိူဝ်ႈလဵဝ် လႆႈၽႅၼ်တႃႇ 20 ၸႄႈဝဵင်းၼႆႉ ဝႆႉဢွၼ်တၢင်းၵွၼ်ႇၶႃႈ” ဝႃႈၼႆ။

ၶိူင်ႈၵမ်ႉၵႅမ် တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ဢၼ်လူင်းပိုၼ်ႉတီႈသေ ၸွႆႈထႅမ်ၼၼ်ႉ မိူၼ်ၼင်ႇ ၶူဝ်း PPE (သိူဝ်ႈၶူဝ်းႁႄႉၵင်ႈၸိူဝ်ႉမႅင်း)၊ ၽႃႈတူမ်းသူပ်း(Mask)၊ ၼမ်ႉယႃလၢင်ႉမိုဝ်း ယဝ်ႉၵေႃႈ ပုင်းၼမ်ႉသိတ်းယႃႈၶႃႈမႅင်း ဢိၵ်ႇထႅင်ႈၶိူင်ႈၵမ်ႉၵႅမ်ထႅင်ႈလၢႆလၢႆဢၼ် ဝႃႈၼႆ။

ၶုၼ်သိုၵ်းလူင် ၸၢႆးၶမ်းသိူဝ်း လၢတ်ႈဝႃႈ “ လွင်ႈၶိူင်ႈၵမ်ႉၵႅမ်ၸိူဝ်းၼႆႉ ႁဝ်းၶႃႈတေၵႂႃႇၸွႆႈဝႆႉပၼ်တီႈၶွမ်ႊမတီႊၸႄႈဝဵင်း ဢၼ်ၶွတ်ႇၽွတ်ႈဝႆႉ တႃႇၵႅတ်ႇၶႄႁႄႉၵင်ႈၶူဝ်ႊဝိတ်ႉ 19 ၵူႈဝဵင်းဝဵင်းၼၼ်ႉ။ သင်ဝႃႈ ၸႄႈဝဵင်းလႂ် ဢမ်ႇမီးၼႆၵေႃႈ ႁဝ်းၶႃႈ တေဢဝ်ၾၢၵ်ႇဢၢပ်ႈဝႆႉတီႈ ပေႃႈၾႃႉမႄႈမိူင်းၶဝ်ၼႄႇ၊ ၽူႈၵွၼ်းဢိူင်ႇ ပွၵ်ႉၶဝ်ၼႄႇ တီႈႁူင်းယႃၼႄႇ ၸိူဝ်းၼႆႉ ႁႂ်ႈၶဝ်သိုပ်ႇသူင်ႇပၼ်ၵႂႃႇ တီႈဢၼ်လူဝ်ႇၸႂ်ႉတိုဝ်းၼၼ်ႉ” ဝႃႈၼႆ။

20 ဝဵင်းဢၼ်တေၵမ်ႉၸွႆႈၼႆႉပဵၼ် ၸႄႈဝဵင်းမိူင်းပွၼ်၊ လွႆလႅမ်၊ ၼမ်ႉၸၢင်၊ ၶူဝ်လမ်၊ မိူင်းၼွင်၊ ဝၢၼ်ႈၸိင်း၊ မိူင်းသူႈ၊ ၵေးသီး၊ မိူင်းၵိုင်၊ လၢႆးၶႃႈ၊ လၢင်းၶိူဝ်း၊ မိူင်းပၼ်ႇ၊ မွၵ်ႇမႆႇ ဢိၵ်ႇထႅင်ႈလၢႆလၢႆၸႄႈဝဵင်း ဝႃႈၼႆ။

“ ယိူင်းဢၢၼ်းတႄႉ ယူႇတီႈမုၵ်ႉၸုမ်းႁဝ်းၶႃႈ ႁၼ်ထိုင်ဝႃႈ တၢင်းပဵၼ်ၼႆႉ မၼ်းၸၢင်ႈတုမ်ႉတိူဝ်ႉၸိူဝ်ႉၸၢတ်ႈႁဝ်းၶႃႈ တၢင်း ၶိူဝ်းတၢင်းမိူင်းလႄႈ တၢင်းမိူင်းႁူမ်ႈတုမ်ၼႆသေ ယွၼ်ႉဝႃႈ လွင်ႈၼႆႉၵေႃႈမၼ်းယူႇဝႆႉၾၢႆႇတႂ်ႈလွင်ႈႁူမ်ႇလူမ်ႈၸိူဝ်ႉၸၢတ်ႈ။ ၵွပ်ႈပိူဝ်ႈၼႆလႄႈ ယူႇတီႈမုၵ်ႉၸုမ်းႁဝ်းၶႃႈ ပဵၼ်ဢၼ်မႆႈၸႂ် ၵူၼ်းမိူင်းႁဝ်းၶႃႈတႄႉတႄႉ။ ႁဝ်းၶႃႈဢမ်ႇၸႂ်ႈလူင်ပွင်ၸိုင်ႈသေတႃႉ ၵေႃႈ ၸွမ်းၼင်ႇဢဵၼ်ႁႅင်းႁဝ်းၶႃႈမီးၼၼ်ႉ ႁဝ်းၶႃႈ ယွၼ်းႁူမ်ႈမိုဝ်း ပေႃႈမႄႈပီႈၼွင်ႉ၊ ၽူႈမီးၼမ်ႉၸႂ်ၸေႇတၼႃႇ၊ ၽူႈမၢၵ်ႈမီးသေ ႁဝ်းၶႃႈၸွႆႈပၼ် ၸွမ်းၼင်ႇႁဝ်းၶႃႈပွင်ပဵၼ်လႆႈ” ၶုၼ်သိုၵ်းလူင် ၸၢႆးၶမ်းသိူဝ်းလၢတ်ႈၼႄၼင်ႇၼႆ။

တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ် တင်းမူတ်းမီး 22 ၵေႃႉ၊ လူႉတၢႆၵႂႃႇ 3 ၵေႃႉ ။ ၼႂ်းၵူၼ်း မီးၸိူဝ်ႉမႅင်းၼၼ်ႉ ပႃးၵူၼ်းၵျွၵ်ႉမႄး ဝႆႉၵေႃႉၼိုင်ႈ။