SNLD ၸႄႈဝဵင်းတၢင်ႉယၢၼ်း လူင်းပိုၼ်ႉတီႈ ၸႅၵ်ႇယိုၼ်ႈဝႂ်ပိဝ် (ၽိုၼ်လိၵ်ႈ) ပၼ်တၢင်းႁူႉၵဵဝ်ႇၵပ်းလွၵ်းလၢႆးႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ။

တႄႇဢဝ် ဝၼ်းတီႈ 5/4/2020 ၼႆႉမႃး ယူႇတီႈပႃႇတီႇႁူဝ်သိူဝ် SNLD ၸႄႈဝဵင်းတၢင်ႉယၢၼ်း လူင်းပိုၼ်ႉတီႈ ၸႅၵ်ႇဝႂ်ပိဝ်၊ ပူဝ်ႊသတိူဝ်ႊ ၵဵဝ်ႇၵပ်းလွၵ်းလၢႆးႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႂ်းဝဵင်းတၢင်ႉယၢၼ်း ။ ၸႅၵ်ႇယိုၼ်ႈပၼ်ၵူၼ်းမိူင်း ၼႂ်းပိုၼ်ႉတီႈ ၸွမ်းႁၢၼ်ႉၶၢႆၼမ်ႉမၼ်း၊ ၵၢတ်ႇ၊ ႁၢၼ်ႉၶၢႆတၢင်းၵိၼ်၊ ႁူင်းႁဵၼ်းလႄႈ ဝတ်ႉဝႃး ၸဵမ်ၸိူဝ်းၼႆႉ။

ၸၢႆးသၢင်ႇၸၢမ်ႇ ၵႅမ်ၽူႈၼမ်းၼႂ်း ပႃႇတီႇႁူဝ်သိူဝ် တၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လႆႈတႄႇ မိူဝ်ႈ ဝၼ်းတီႈ 5-6-7 မႃး လႆႈယိုၼ်ႈပၼ်ဝႂ်ပိဝ်၊ ပိူဝ်ႊသတိူဝ်ႊ ၸိူဝ်းၼႆႉ။ဢၼ်သႂ်ႇသဵင်သေ ပၢဝ်ႇၸွမ်းၼႂ်းၵိဝ်ႇပွၵ်ႉယွမ်ႇတႄႉ တိုၵ်ႉတႄႇဝၼ်းတီႈ 8 ယၢမ်းၵၢင်ၶမ်ႈၼႆႉမႃးၵူၺ်းၶႃႈ” ဝႃႈၼႆ။

လိူဝ်ၼၼ်ႉ ယူႇတီႈၸၢႆးလႅင် ၽူႈၼမ်းၼႂ်း ၸုမ်းပွင်ၵၢၼ်ၸႄႈဝဵင်းၵေႃႈ လႆႈၸတ်းဝႂ်ပိဝ်/ ပူဝ်ႊသတိူဝ်ႊ သူင်ႇထိုင် တၢင်းဝိ ႁၢရ်လူင်မူႉ၊ ႁူင်းႁဵၼ်းပၵ ၵျွင်းလူင်ဢွင်ႇမင်ႇၵလႃႇ၊ ၼႂ်းပွၵ်ႉၼႂ်းၾၢႆႇ၊ ဢိူင်ႇမိူင်းၵၢဝ်၊ ဢိူင်ႇလွႆၸေး၊ ဢိူင်ႇႁူဝ်မင်း၊ ဢိူင်ႇ လူင်မူင်ႈ၊ ဢိူင်ႇဝဵင်းမႂ်ႇ၊ ဢိူင်ႇၼႃးႁုၵ်ႇ၊ ဢိူင်ႇဝၢၼ်ႈၵၢတ်ႇလႄႈ ၾၢႆႇၶႄၾႆး ၸိူဝ်းၼႆႉ ဝႃႈၼႆ။

လွင်ႈၼႆႉတေဢၢၼ်းတူင်ႉၼိုင်ၸႅၵ်ႇပၼ်ႁႂ်ႈပေႃးၸွတ်ႇတူဝ်ႈ ၼႂ်းဝဵင်းတၢင်ႉယၢၼ်း ပွၵ်ႉ 1 ထိုင် ပွၵ်ႉ 10 ဝႃႈၼႆ။

ၸၢႆးသၢင်ႇၸၢမ်ႇ လၢတ်ႈဝႃႈ “ ပွၵ်ႉဢၼ်ၵႂၢင်ႈမၼ်းၼၼ်ႉ ႁဝ်းၶႃႈတေဢႅဝ်ႇပၢဝ်ႇယူႇ မွၵ်ႈ 3 ၶိုၼ်းၼႆႉ၊ ပေႃးပွၵ်ႉဢၼ်ဢမ်ႇ ပေႃးၵႂၢင်ႈ မၼ်းၸိူဝ်းၼၼ်ႉ တေဢႅဝ်ႇမွၵ်ႈ 1 ၶိုၼ်းတေႃႇ 2 ၶိုၼ်း ။ ၶႃႈၶဝ် တေဢွၵ်ႇပၢဝ်ႇ ၵူႈၶမ်ႈ ပွၵ်ႉၼိုင်ႈယဝ်ႉပွၵ်ႉ ၼိုင်ႈ တေၶပ်ႉတၢမ်းၵၼ်ၵႂႃႇၸိူင်ႉၼၼ်” ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ် တင်းမူတ်းမီး 22 ၵေႃႉ၊ လူႉတၢႆၵႂႃႇ 3 ၵေႃႉ။ ၼႂ်းၵူၼ်းမီးၸိူဝ်ႉမႅင်းၼၼ်ႉ ပႃးၵူၼ်းၵျွၵ်ႉမႄး ဝႆႉၵေႃႉၼိုင်ႈ ။

တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တၢင်းလုမ်ႈၾႃႉၼႆႉ မီး 1,518,719 ၵေႃႉ၊ တၢႆ 88,502 ၵေႃႉလႄႈ ယႃ ၶႅၼ်း 330,589 ၵေႃႉ ယူႇတီႈႁွင်ႈၵၢၼ်ပၢႆးယူႇလီလုမ်ႈၾႃႉ worldometers ဢွၵ်ႇဝႆႉ။