ၵူၼ်းဝၢၼ်ႈ 5 ၵေႃႉ ၺႃးယိုဝ်းတၢႆတီႈႁိမ်းဝၢၼ်ႈၵုင်းမူင်ႈ ၸႄႈဝဵင်းသီႇပေႃႉ ပဵၼ် ၽႂ်ယိုဝ်း ဢမ်ႇႁူႉ။
မိူဝ်ႈၼႆႉ ဝၼ်းတီႈ 9/4/2020 ယၢမ်းၵၢင်ၼႂ် ၵူၼ်းဝၢၼ်ႈ 5 ၵေႃႉ (ၽူႈၸၢႆး 2 ၵေႃႉ ၼၢင်းယိင်း 2 ၵေႃႉလႄႈ လုၵ်ႈဢွၼ်ႇ ဢႃယု 12 ပီ (ၵူၼ်းၸၢႆးဢွၼ်ႇ) ၵေႃႉၼိုင်ႈ ) ၺႃးယိုဝ်းတၢႆဝႆႉ တီႈဢွင်ႈႁိူၼ်းလင်ၼိုင်ႈ ႁိမ်းဝၢၼ်ႈၵုင်းမူင်ႈ ၸႄႈဝဵင်းသီႇ ပေႃႉ ၸိုင်ႈတႆးပွတ်းႁွင်ႇ။ ယွၼ်ႉသင်လႄႈၺႃးယိုဝ်း ပဵၼ်ၽႂ်ၸုမ်းလႂ်ယိုဝ်း ဢမ်ႇလႆႈႁူႉ။
ၵူဝ်ႇမဵဝ်း ၸုမ်းၸွႆႈထႅမ် ဢမ်ႇမီးၶွပ်ႇလႅၼ် ပရႁိတ သီႇပေႃႉ ( နယ်စည်းမခြား ပရဟိတ သီပေါ) လၢတ်ႈတီႈ ၽူႈတွႆႇ ႁွၵ်ႈဝႃႈ “ မိူဝ်ႈၼႆႉ ယၢမ်းၵၢင်ၼႂ် 9 မူင်း ပလိၵ်ႈသိုပ်ႇၾူၼ်းမႃး ႁႂ်ႈႁဝ်းၶႃႈ ၵႂႃႇၵဵပ်းတူဝ်တၢႆၼႆလႄႈ ႁဝ်းၶႃႈၵႂႃႇ။ ၵူၼ်းတၢႆၼၼ်ႉ လႅပ်ႈပဵၼ်ၵူၼ်းႁိူၼ်းလဵဝ်ၵၼ်။ မီးႁွႆးမၢၵ်ႇၵွင်ႈဝႆႉၵူႈၵေႃႉၶႃႈ ” ဝႃႈၼႆ။
ၸိူဝ်းၶဝ် 5 ၵေႃႉၼၼ်ႉ ၺႃးယိုဝ်း တၢႆၸဵမ်မိူဝ်ႈၶၢဝ်းလႂ်တႄႉဢမ်ႇလႆႈႁူႉတႅတ်ႈတေႃး ဝႃႈၼႆ။
ၵူဝ်ႇမဵဝ်း လၢတ်ႈဝႃႈ “ ၼႂ်းႁၢင်ပီမႃးတေႃႇယၢမ်းလဵဝ် ယူႇတီႈႁဝ်းၶႃႈ လႆႈမႃးၵဵပ်းတူဝ်ၵူၼ်းတၢႆ ယွၼ်ႉၺႃးယိုဝ်း တီႈဝၢၼ်ႈၵုင်းမူင်ႈၼႆႉ တင်းမူတ်းမီး 18 ၵေႃႉယဝ်ႉ” ဝႃႈၼႆ။
ႁိမ်းဝၢၼ်ႈၵုင်းမူင်ႈၼႆႉ ၵူၼ်းသူႇသမ်းၵိၼ်ယႃႈမဝ်းၵမ်လိူင်ႇ၊ မႃးသိုဝ်ႉၶၢႆၵၼ်ႁိမ်းဝၢၼ်ႈၼႆႉၵေႃႈၼမ် ဝႃႈၼႆ။
ဢၢႆႈၸၢႆး ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၸွမ်းၸိူဝ်းႁိမ်းႁွမ်းဝၢၼ်ႈၼၼ်ႉ ပေႃးပဵၼ်ၵူၼ်းယူဝ်းယူဝ်းတႄႉ ဢမ်ႇႁတ်းၵႂႃႇမႃးၶႃႈလူင်။ ၵူၼ်းဝၢၼ်ႈထုင်ႉၼၼ်ႉၵေႃႈ တုၵ်းယွၼ်း ႁႂ်ႈၽူႈမီးပုၼ်ႈၽွၼ်း ၵႂႃႇၵႂၢတ်ႇလၢင်ႉပၼ်ၼႆ လႆႈတုၵ်းယွၼ်းမႃးလၢႆလၢႆၵမ်းယဝ်ႉ” ဝႃႈၼႆ။
တီႈႁိမ်းဝၢၼ်ႈၵုင်းမူင်ႈၼၼ်ႉ ၵႆႉမီးလွင်ႈယိုဝ်းၵၼ်တၢႆ ၵူၺ်းၵႃႈ ဢမ်ႇတွၼ်ႉတီႉလႆႈတူဝ်ၵူၼ်းႁၢႆႉ မႃးသေပွၵ်ႈ ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇ တီႈႁူင်းပလိၵ်ႈသီႇပေႃႉၵေႃႈ ဢမ်ႇလႆႈ ။
တီႈႁိမ်းဝၢၼ်ႈၵုင်းမူင်ႈၼႆႉ မိူဝ်ႈဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ 2020 ၼၼ်ႉၵေႃႈ ၽူႈၸၢႆး 2 ၵေႃႉ ထုၵ်ႇယိုဝ်းတၢႆ၊ မိူဝ်ႈဝၼ်းတီႈ 24 လိူၼ်ၾႅပ်ႊၿိဝ်ႊရီႊၼၼ်ႉၵေႃႈ ၽူႈၸၢႆးထႅင်ႈ 2 ၵေႃႉ ထုၵ်ႇယိုဝ်းတၢႆ။
တီႈၼႆႈၵူၺ်းၼင်ႇၵဝ်ႇ မိူဝ်ႈဝၼ်းတီႈ 28/12/2019 ၼၼ်ႉၵေႃႈ ၽူႈၸၢႆး 3 ၵေႃႉ ထုၵ်ႇယိုဝ်းတၢႆ ။
ၼႂ်းၸႄႈဝဵင်းသီႇပေႃႉၼႆႉ ၸုမ်းယိပ်းၵွင်ႈၵၢင်ႇၵေႃႈၼမ် မိူၼ်ၼင်ႇ တပ်ႉသိုၵ်းလူင်ပွင်ၸိုင်ႈမၢၼ်ႈ၊ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း လႄႈ ပျီႇတူႉၸိတ်ႉ ၸဵမ်ၸိူဝ်းၼႆႉ တူင်ႉၼိုင်ၵႂႃႇမႃးယူႇတႃႇသေႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ