ရူတ်ႉၵႃး ၽႃႇၵၼ် ၾၢႆႇႁွင်ႇဝဵင်းပၢင်လူင် ရူတ်ႉၵႃးလမ်းၼိုင်ႈ ၵူၼ်းႁေႃႈမၢတ်ႇၸဵပ်းႁူဝ်တႅၵ်ႇ၊ ထႅင်ႈလမ်းၼိုင်ႈႁေႃႈပၢႆႈ ။
မိူဝ်ႈၼႆႉ ဝၼ်းတီႈ 8/4/2020 ယၢမ်းၵၢင်ဝၼ်း မွၵ်ႈ 11 မူင်းပၢႆၼႆႉ ၵႃးႁပ်ႉၸၢင်ႈတၢင်ႇၵူၼ်း ၵေးသီး – တူၼ်ႈတီး တင်း ၵႃး လူင် (တွႆးၵႃး) လမ်းၼိုင်း ၽႃႇၵၼ် ၼိူဝ်သဵၼ်ႈတၢင်းလူင် ပၢင်လူင် – လၢႆးၶႃႈ တီႈၵုင်းသူမ်ႈၶွၼ် ၾၢႆႇႁွင်ႇပၢင်လူင် ယၢၼ် ဝဵင်း မွၵ်ႈ 4 လၵ်း ။ ၸဝ်ႈရူတ်ႉၵႃးလႅင်း ၵေးသီး – တူၼ်ႈတီးၼၼ်ႉ လႆႈမၢတ်ႇၸဵပ်းႁူဝ်တႅၵ်ႇသေ လႆႈသူင်ႇႁူင်းယႃ တီႈ ပၢင်လူင်ဝႆႉ။
ၸၢႆးဢွင်ႇၶမ်း ၽူႈၵွၼ်းဢိူင်ႇၼွင်လႅင် လၢတ်ႈတီႈၽူႈတွႆႇႁွၵ်ႈဝႃႈ “ ၵႃးၽႃႇၵၼ်ၶႃႈဢေႃႈ။ ၾႆးတိုၵ်ႉမႆႈႁူဝ်ၵႃးၶဝ်ယူႇ ႁဝ်း ၶႃႈလူင်းၶႄၸွႆႈ။ ပဵၼ်ၵႃးတၢင်ႇၵူၼ်း ၵေးသီး – တူၼ်ႈတီးၶႃႈဢေႃႈ။ ၸဝ်ႈၵႃးတႄႉ ၼႃႈၽၢၵ်ႇတႅၵ်ႇ 2-3 ႁွႆး၊ ပဵၼ်လိူတ်ႈ ပဵၼ်ယၢင်ဢွၵ်ႇၼမ်ဢေႃႈ။ မၼ်းပေႃးၶႂ်ႈမဝ်း ၶႂ်ႈလိုမ်းတူဝ်လႄႈ ၼႅတ်ႈဢဝ်သူင်ႇၵႂႃႇ ႁူင်းယႃ ပၢင်လူင်ၶႃႈဢေႃႈ ” ဝႃႈၼႆ။
ၵႃးလႅင်း ၵေးသီးတႃး (ကျေးသီးသား) ၼၼ်ႉ လုၵ်ႉတၢင်းၵေးသီး တေၶိုၼ်ႈတူၼ်ႈတီး။ ၵူၺ်းၵႃႈ ဢမ်ႇတၢင်ႇၵူၼ်း မႃးၸွမ်းသေၵေႃႉ- ဝႃႈၼႆ။ ၵႃးလူင် (တွႆးၵႃး) ၼၼ်ႉသမ်ႉ လုၵ်ႉတၢင်းတူၼ်ႈတီးမႃးပၢင်လူင် တေၵႂႃႇတၢင်းလၢႆးၶႃႈ ။
ၸၢႆးဢွင်ႇၶမ်း လၢတ်ႈဝႃႈ “ ၸဝ်ႈၵႃးၵေးသီးၼၼ်ႉ လၢတ်ႈၼႄႁဝ်းၶႃႈတႄႉ ၵႃးဢၼ်မႃးၽႃႇၼၼ်ႉ ပဵၼ်ၵႃးတွႆးသီလႅင်၊ လုၵ်ႉတၢင်းတူၼ်ႈတီးမႃး ။ ၵူၺ်းၵႃႈ ၵႃးလူင် (တွႆးၵႃး) သီလႅင်ၼၼ်ႉ ၵူၼ်းႁေႃႈၵႃးၼၼ်ႉ ႁေႃႈၵႃးလႅၼ်ႈပၢႆႈ ၶႃႈဢေႃႈ” ဝႃႈၼႆ။
ပၢင်လူင်-လၢႆးၶႃႈၼႆႉ ႁၢင်ႇၵၼ် 26 လၵ်း ။ ၵူၺ်းၵႃႈ ပဵၼ်တၢင်းၶိုၼ်ႈလူင်းလွႆလႄႈ သဵၼ်ႈတႃႈသၢႆတၢင်းၵူတ်ႉငွၵ်း၊ ၸၼ်း။ ယၢမ်းလဵဝ် သဵၼ်ႈတၢင်းၶႅမ်ႉ၊ ၵႂၢင်ႈမႃးယဝ်ႉလႄႈ ၸဝ်ႈရူတ်ႉၵႃးၶပ်းႁေႃႈဝႆး။ တၵ်းလႆႈၾၢင်ႉၵၼ်ယႂ်ႇၼမ် ၵူၼ်းလၢႆးၶႃႈ လၢတ်ႈၼင်ႇၼႆ။
