ၾႆးမႆႈ ဝတ်ႉဝိႁၢရ်ႁူဝ်ဝဵင်း ၼမ်ႉလၼ်ႈ ၶူဝ်းၶွင်ၼႂ်းဝတ်ႉ မႆႈၸွမ်းၾႆးတင်းၼမ် လွင်ႈၵူၼ်းမၢတ်ႇၸဵပ်းလူႉတၢႆ ဢမ်ႇမီး။
မိူဝ်ႈၼႆႉ 8/4/2020 ယၢမ်းၵၢင်ၼႂ် 2 မူင်း ၾႆးမႆႈ ဝတ်ႉဝိႁၢရ် ပရိယတ်ႉတိႁူဝ်ဝဵင်း ၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ယွၼ်ႉၾႆးၾႃႉသျွတ်ႉသေ လၢမ်းမႆႈ ဝႃႈၼႆ။
လုင်းၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။ ၶူဝ်းၶွင်ၼႂ်းဝတ်ႉ ဢမ်ႇတၼ်းလႆႈသင်။ တႄႇမႆႈမိူဝ်ႈၼႆႉ ယၢမ်းၵၢင်ၼႂ်ၸဝ်ႉ မွၵ်ႈ 2 မူင်း ထိုင် 4 မူင်းပၢႆၼႆႉ ၾႆးၸင်ႇတေမွတ်ႇ” ဝႃႈၼႆ။
ဝတ်ႉဝိႁၢရ်ႁူဝ်ဝဵင်းၼႆႉ ပဵၼ်ဝတ်ႉဢုတ်ႇ သွင်ၸၼ်ႉ၊ ပဵၼ်ဝတ်ႉၵျွင်းပရိယတ်ႉတိ ဢၼ်မီးဢႃယုၵဝ်ႇၵႄႇထိုင် 29 ပီ။ တင်းမူတ်းမီးသင်ၶၸဝ်ႈယူႇ မွၵ်ႈ 30 တူၼ်ပၢႆ ။ ၵႃႈၶၼ်ၶူဝ်းဢၼ်လႆႈလူႉသုမ်းၸွမ်းၾႆးတႄႉ ပႆႇလႆႈႁူႉၸွမ်း။
ၸၢႆးၸၢမ်ႇလႅင်း ႁူဝ်ပဝ်ႈ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး ဝဵင်းၼမ်ႉလၼ်ႈလၢတ်ႈတီႈၽူႈတွႆႇႁွၵ်ႈဝႃႈ “ တီႈၼိူဝ်ၵျွင်းၼၼ်ႉတႄႉ ဢမ်ႇသူႈတႆႈတဵၼ်း။ ၾႆးလုၵ်ႉႁႅင်းတီႈဝႆႉ မီႊတိူဝ်ႊပွၵ်ႉသ် ၼၼ်ႉလႄႈ လႅပ်ႈတေပဵၼ် ၾႆးၾႃႉသျွတ်ႉၵူၺ်းၶႃႈ”- ဝႃႈၼႆ။
မိူဝ်ႈဝၼ်းတီႈ 31/3/2020 ယၢမ်းဝၢႆးဝၼ်း မွၵ်ႈ 2:40 မူင်း ၾႆးသႅင်လႅတ်ႇသျွတ်ႉသေ မႆႈဝတ်ႉဝိႁၢရ် ၽၵ်းႁီႉ ဢိူင်ႇၵုင်း သေႃႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၾႆးမႆႈဝတ်ႉဝိႁၢရ်တၢင်းလင် ၶူဝ်းၶွင်ၼႂ်းဝတ်ႉ ဢမ်ႇတၼ်းလႆႈ လွင်ႈၵူၼ်း မၢတ်ႇ ၸဵပ်း လူႉတၢႆ ဢမ်ႇမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ