ဝၼ်းတီႈ 6/4/2020 ယၢမ်းၵၢင်ၼႂ် မွၵ်ႈ 10 မူင်းပၢႆၼၼ်ႉ ၽူႈၸၢႆးၵေႃႉၼိုင်ႈ ဢဝ်ၾႆးၽဝ်ႁိူၼ်းယေး ၸဝ်ႈၵဝ်ႇၶိုၼ်းသေလႅၼ်ႈပၢႆႈ တီႈဝၢၼ်ႈၼမ်ႉပွင်ႈ ဢိူင်ႇၼမ်ႉပွင်ႈ ၸႄႈဝဵင်းလႃႈသဵဝ်ႈ ။
ၵူၼ်းၼုမ်ႇၼမ်ႉပွင်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ လႆႈႁူႉဝႃႈ မၼ်းၸၢႆး ၵိၼ်ယႃႈမႃႉၼမ်သေ ဢဝ် ႁူဝ်ၸႂ် ဢမ်ႇပေႃးလီ၊ ယွင်ႇမႃႈသေ ၸုတ်ႇၽဝ်ႁိူၼ်းၸဝ်ႈၵဝ်ႇၶိုၼ်းၼႆဝႃႇ။ တေမီးဢႃယု မွၵ်ႈ 30 ပၢႆၼႆႉ။ ၵတ်ႉၵႃႈ ႁိူၼ်းယေး ဢၼ် မၼ်းၽဝ်ၼၼ်ႉ ပဵၼ်ႁိူၼ်းၵေႃႇဢုတ်ႇ ၵူၺ်းဢမ်ႇတၼ်းမႆႈမူတ်း” ဝႃႈၼႆ။
ၵဵဝ်ႇၵပ်းလွင်ႈၾႆးမႆႈၼႆႉသေ ၵူၼ်းဝၢၼ်ႈ ၸိူဝ်းယူႇႁိမ်းႁွမ်းၼၼ်ႉ ဢွၼ်ၵၼ်ၸွႆႈၶႄႁူတ်းၾႆး တၼ်းၶိုၼ်းသေ ဢမ်ႇ တၼ်းမႆႈမူတ်း ဝႃႈၼႆ။
“တီႈထုင်ႉၼမ်ႉပွင်ႈႁဝ်းၶႃႈၼႆႉ ယႃႈမႃႉလိူင်ႇၼႃႇၶႃႈ။ ၵူၼ်းသူႇသမ်းၵိၼ်ၵေႃႈၼမ်ၼႃႇ။ ၸုမ်းယိပ်းၵွင်ႈၵၢင်ႇၵေႃႈ မီးပဵၼ် လၢႆမူႇလၢႆၸုမ်း ၾၢႆႇလူင်ပွင်ၸိုင်ႈၵေႃႈ ဢမ်ႇႁဵတ်းၵၢၼ်ထိုင်တီႈထိုင်လႅၼ်မၼ်း။ ပိူင်လူင်မၼ်းတႄႉ ယူႇတီႈၾၢႆႇဢုပ်ႉပိူင်ႇၽွင်းငမ်းၶဝ်ၼၼ်ႉဢိူဝ်ႈ လူဝ်ႇထိုင်တီႈမၼ်း” ၵူၼ်းမိူင်းၼမ်ႉပွင်ႈ လၢတ်ႈၼင်ႇၼႆ။
ၼမ်ႉပွင်ႈၼႆႉမီးၾၢႆႇၸၢၼ်းဝဵင်းလႃႈသဵဝ်ႈ ၊ မိူဝ်ႈပီပူၼ်ႉမႃး ၵူၼ်းၼုမ်ႇၼႂ်းထုင်ႉၼမ်ႉပွင်ႈၵႆႉၵႆႉလူင်းၵူတ်ႇထတ်း တီႉၺွပ်းၵူၼ်းသူႇသမ်းၵိၼ် ၵႃႉယႃႈမႃႉ ယႃႈမဝ်းၵမ်ယူႇ။