တူဝ်တၢႆၽူႈၸၢႆးၵေႃႉၼိုင်ႈ တီႈႁိမ်းၾင်ႇၼမ်ႉမၢဝ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ပဵၼ်ၽႂ်လုၵ်ႉလႂ်မႃး ဢမ်ႇႁူႉ ၸၵ်းလႄႈ ၸုမ်းၸွႆႈထႅမ်ၽဝ်ပၼ်ၶၢပ်ႈတူဝ်မၼ်းၸၢႆးယဝ်ႉ။

ဝၼ်းတီႈ 6/4/2020 ယၢမ်းဝၢႆးဝၼ်း မွၵ်ႈ 1 မူင်းၼၼ်ႉ ယူႇတီႈၸုမ်းၸွႆႈထႅမ်ၵရုၼႃႇ မူႇၸေႊ လႆႈၵႂႃႇႁပ်ႉဢဝ် တူဝ်တၢႆ ၽူႈၸၢႆးၵေႃႉၼိုင်ႈ တီႈႁိမ်းၾင်ႇၼမ်ႉမၢဝ်း တၢင်းၸေႊလၢၼ်ႉ ၾၢႆႇၼႃႈတႃႈႁိူဝ်းၼွင်မူၼ်း ၼႂ်းဢိူင်ႇ 19 မၢၼ်ႈ ၸႄႈဝဵင်း မူႇၸေႊ ၸိုင်ႈတႆးပွတ်းႁွင်ႇ။

ဢူးတွင်းထုၼ်း ၸုမ်းၸွႆႈထႅမ်ၵရုၼႃႇ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းၶႃႈလႆႈႁပ်ႉငိၼ်းၶၢဝ်ႇသေ လႆႈၵႂႃႇႁပ်ႉဢဝ် တူဝ်တၢႆ တီႈၾင်ႇၼမ်ႉမၢဝ်းၼၼ်ႉ မွၵ်ႈယၢမ်းဝၢႆးဝၼ်း 1 မူင်းၼႆႉ။ ယူႇတီႈၽူႈမီးပုၼ်ႈၽွၼ်းၶဝ် လၢတ်ႈတႄႉဝႃႈ ယွၼ်ႉယႃႈမဝ်းၵမ်။ ႁဝ်းၶႃႈၽဝ်ပၼ်ၶၢပ်ႈတူဝ်မၼ်း မိူဝ်ႈဝႃး ဝၼ်းတီႈ 6/4/2020 ယဝ်ႉ။ ၽူႈၸၢႆး ဢၼ်လႆႈလူႉတၢႆၵႂႃႇၼၼ်ႉ ပဵၼ်ၽႂ် ၸိုဝ်ႈဝႃႈႁိုဝ် ဢၼ်ဝႃႈၼၼ်ႉဢမ်ႇလႆႈႁူႉ”ဝႃႈၼႆ။

ဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်းလႅၼ်လိၼ် တႆး – ၶႄႇ ဝဵင်းၼိုင်ႈသေ ၸုမ်းယိပ်းၵွင်ႈၵၢင်ႇ ယူႇသဝ်းတူင်ႉၼိုင် ၵေႃႈၼမ်။ ယႃႈမဝ်းၵမ်ၵေႃႈလိူင်ႇ။ ယဝ်ႉၵေႃႈ လွင်ႈၶႃႈႁႅမ်ၵၼ်ၵေႃႈၵႆႉမီး၊ လွင်ႈလၵ်ႉ၊ လွင်ႈၸူၼ်ၵၼ် ၸဵမ်ၸိူဝ်းၼႆႉၵေႃႈ ၵႆႉမီးယူႇတႃႇသေႇ ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်းၶဝ် ဢမ်ႇတွၼ်ႉတီႉလႆႈတူဝ်ၵူၼ်းႁၢႆႉ လႆႈသေပွၵ်ႈ ၵူၼ်း ပိုၼ်ႉတီႈမူႇၸေႊလၢတ်ႈၼႄၼင်ႇၼႆ။