ဢွၼ်ႇယိင်း 2 ၵေႃႉ ပီႈၼွင်ႉ ၸူမ်ၼမ်ႉတူႈ တီႈသီႇပေႃႉ တေႃႇထိုင်ယၢမ်းလဵဝ် ပႆႇထူပ်းႁၼ်တူဝ် ။
ဝၼ်းတီႈ 5/4/2020 ယၢမ်းႁူဝ်ၶမ်ႈမွၵ်ႈ 5 မူင်းၼၼ်ႉ လုၵ်ႈဢွၼ်ႇ 4 ၵေႃႉ လူင်းလဵၼ်ႈၼမ်ႉတူႈ တီႈတႂ်ႈၶူဝ်ၵဝ်ႇ သီႇပေႃႉ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ပဵၼ်လုၵ်ႈ ဢွၼ်ႇၸၢႆး 2 ၵေႃႉလႄႈ လုၵ်ႈဢွၼ်ႇယိင်း 2 ၵေႃႉ ။ ၸိူဝ်းၶဝ်လွင်ႈလႆၸွမ်းၼမ်ႉတင်း 4 ၵေႃႉ။ လုၵ်ႈဢွၼ်ႇၸၢႆး 2 ၵေႃႉၼၼ်ႉ တၼ်းၸွႆႈလႆႈ လွတ်ႈတၢႆ။ ၵူၺ်းၵႃႈ ဢွၼ်ႇယိင်း 2 ၵေႃႉပီႈၼွင်ႉၼၼ်ႉတႄႉ ပႆႇထူပ်းႁၼ် တူဝ်ၶႃတင်းသွင်ၵေႃႉတေႃႇထိုင်မိူဝ်ႈၼႆႉ ဝႃႈၼႆ။
ၸၢႆးလၢဝ်သႅင် ၽူႈၶဝ်ႈၸုမ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်လုၵ်ႈဢွၼ်ႇ 4 ၵေႃႉ။ ပဵၼ်ၵူၼ်းပွၵ်ႉၸၢင်ႈၶမ်းၸၢၼ်း။ ၽွင်းၶဝ်လွင်ႈလႆၸွမ်းၼမ်ႉၼၼ်ႉ သိုၵ်းမၢၼ်ႈဢၼ်မီးယူႇ ႁိမ်းၶူဝ်ၼၼ်ႉ ႁၼ်ၶဝ်သေ ၼႅတ်ႈလူင်းၵႂႃႇၸွႆႈ တၼ်းလႆႈၽူႈၸၢႆးဢွၼ်ႇ 2 ၵေႃႉဢွၵ်ႇမႃးၵူၺ်း ” ဝႃႈၼႆ။
ယူႇတီႈၽူႈမီးပုၼ်ႈၽွၼ်း ၸုမ်းတူင်ႇဝူင်း ၼႂ်းသီႇပေႃႉၵေႃႈႁူမ်ႈၵၼ် သွၵ်ႈႁႃ တူဝ်ဢွၼ်ႇယိင်း 2 ၵေႃႉၼၼ်ႉ ၸွမ်းသၢႆၼမ်ႉတူႈယူႇ ဝႃႈၼႆ။
ဢွၼ်ႇၸၢႆး သွင်ၵေႃႉၼၼ်ႉ ပဵၼ်လုၵ်ႈႁဵၼ်းၸၼ်ႉ 4 တင်း ၸၼ်ႉ 5 ။ ဢွၼ်ႇယိင်း သွင်ၵေႃႉၼၼ်ႉသမ်ႉ ပဵၼ်လုၵ်ႈ ႁဵၼ်းၸၼ်ႉ 4 ၵေႃႉၼိုင်ႈလႄႈ တွပ်ႇဝႆႉၸၼ်ႉ 10 ၵေႃႉၼိုင်ႈ ပဵၼ်ပီႈၼွင်ႉၵၼ် ၾဵတ်ႉပုၵ်ႉ Hsipaw Hot News ဢွၵ်ႇဝႆႉ ၼင်ႇၼႆ။
မိူဝ်ႈဝၼ်းတီႈ 4/3/2020 ပူၼ်ႉမႃးၼႆႉၵေႃႈ တူဝ်တၢႆ ၸဝ်ႈသၢင်ႇ တူၼ်ၼိုင်ႈ ဢႃယုတေမီး မွၵ်ႈ 13 ပီ ၸိုဝ်ႈႁွင်ႉ ၸဝ်ႈသၢင်ႇၵုၼ လွင်ႈၸွမ်းၼမ်ႉတူႈမႃးမီးႁိမ်း ဝၢၼ်ႈတူၼ်ႈၵႃႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
