ႁႅင်းၵၢၼ်မိူင်းႁူမ်ႈတုမ် ဢၼ်လုၵ်ႉမိူင်းထႆးပွၵ်ႈၶိုၼ်းတၢင်းမႄႈသၢႆသေ ၶဝ်ႈတႃႈၶီႈလဵၵ်း တႃႇပွၵ်ႈမိူဝ်းႁိူၼ်းမီးထႅင်ႈ 188 ၵေႃႉ ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် ဢၼ်ၵိုတ်းၶမ်ဝႆႉတီႈမႄႈသၢႆ မိူင်းထႆးၼၼ်ႉ မိူဝ်ႈၼႆႉ ဝၼ်းတီႈ 6/4/2020 ႁူဝ်ၵူၼ်း 188 ၵေႃႉ လႆႈ ၶႂၢင်ႉပွၵ်ႈၶဝ်ႈတၢင်းၽၵ်းတူ/ ၶူဝ်မိုတ်ႈၵိုဝ်းမၢႆ 2 လႅၼ်လိၼ်တႆး – ထႆး တၢင်းၾင်ႇတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ဝႃႈၼႆ။
ဢိင်ၼိူဝ်လွင်ႈႁႅင်းၵၢၼ်ပွၵ်ႈၶဝ်ႈမႃးတၢင်းၾင်ႇတႃႈၶီႈလဵၵ်းၼႆႉ ယူႇတီႈၸဝ်ႈၼႃႈတီႈတင်းသွင်ၾင်ႇမိူင်း ဢုပ်ႇဢူဝ်းငူပ်ႉငီႉ ၵၼ်သေ ၸင်ႇတေလႆႈၶႂၢင်ႉပၼ်ၶဝ်ႈမႃး ဝႃႈၼႆ။
ဢူးမိၼ်ႉၼၢႆႇ ၽူႈၵွၼ်းၸႄႈတွၼ်ႈတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လႆႈႁပ်ႉဢဝ် ႁႅင်းၵၢၼ်မိူင်း ႁူမ်ႈတုမ် လုၵ်ႉတၢင်းမႄႈသၢႆ ပွၵ်ႈၶဝ်ႈမႃး 188 ၵေႃႉ။ ၵူၺ်းၵႃႈ လူဝ်ႇပႂ်ႉတူၺ်းတႃႇၶၢဝ်းတၢင်း 14 ဝၼ်း၊ တေႃႈလဵဝ် ဢဝ်ဝႆႉတီႈႁူင်း သဝ်း (မိုးကုတ်ရိပ်သာ) ဝႆႉ” ဝႃႈၼႆ။
ၽၵ်းတူမိူင်း လႅၼ်လိၼ် တႆး – ထႆး (တႃႈၶီႈလဵၵ်း- မႄႈသၢႆ) ၼႆႉ ယူႇတီႈၾၢႆႇၸဝ်ႈၼႃႈတီႈထႆး သင်ႇဢိုတ်း တင်ႈတႄႇ ဝၼ်းတီႈ 23/3/2020 မႃး ဝႃႈၼႆ။
ၼၢင်းဝူဝ်းၽတ်း ၸုမ်းမွၵ်ႇၵွၼ် ၸွႆႈထႅမ်ႁႅင်းၵၢၼ် တီႈတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ဝၼ်းတီႈ 5 ၼႆႉ ႁႅင်းၵၢၼ် ဢၼ်မႃးယူႇဝႆႉတီႈ (မိုးကုတ်ရိပ်သာ) တဵမ် 14 ဝၼ်းၼၼ်ႉ ပွၵ်ႈမိူဝ်းဝၢၼ်ႈၽႂ် ဝဵင်းမၼ်းယဝ်ႉ။ ၼႂ်းၼၼ်ႉ မိူင်း တႆး မီး 9 ၵေႃႉ။ လိူဝ်ၼၼ်ႉတႄႉ ပဵၼ်ၵူၼ်းတၢင်ႇၸႄႈမိူင်း။ ယဝ်ႉၵေႃႈ မိူဝ်ႈၼႆႉ ဝၼ်းတီႈ 6 သမ်ႉ ႁႅင်းၵၢၼ် ဢၼ်လုၵ်ႉတၢင်း မႄႈသၢႆၶၢမ်ႈမႃး 180 ပၢႆၼၼ်ႉ မႃးပုတ်ႈယူႇဝႆႉ တႃႇၶၢဝ်းတၢင်း 14 ဝၼ်း” ဝႃႈၼႆ။
ၵဵဝ်ႇလူၺ်ႈလွင်ႈ ၵူၼ်းမိူင်းႁူမ်ႈတုမ် လုၵ်ႉတၢင်ႇမိူင်းသေ တေပွၵ်ႈႁိူၼ်းယေးၶိုၼ်းၼၼ်ႉ ယူႇတီႈလူင်ပွင်ၸိုင်ႈမိူင်းႁူမ်ႈ တုမ် ၸီႉသင်ႇဝႆႉ ၵူႈၸႄႈဝဵင်း ၵူႈႁွင်ႈၵၢၼ်ဝႃႈ ႁႂ်ႈၵုမ်းတူဝ်ၶဝ်ပႂ်ႉတူၺ်း 14 ဝၼ်း၊ ႁႂ်ႈဝႆႉပၼ်ဢွင်ႈတီႈ ဢၼ်မီးၾႆး၊ ၼမ်ႉ၊ ၶွင်ၵိၼ်ယမ်ႉ ႁႂ်ႈတဵမ်ထူၼ်ႈ ဝႃႈၼႆ။
မိူဝ်ႈ ဝၼ်းတီႈ 25/3/2020 ၼၼ်ႉၵေႃႈ ႁႅင်းၵၢၼ်ၽူႈၸၢႆး ဢႃယု 24 ပီ ပဵၼ်ၵူၼ်းၵျွၵ်ႉမႄး လုၵ်ႉၵုင်းထဵပ်ႈပွၵ်ႈမႃး တၢင်းၾင်ႇတႃႈၶီႈ လဵၵ်း၊ မၼ်းၸၢႆးမီးလူမ်းမႆႈ ဢႆ လႄႈၵူတ်ႇထတ်း ထူပ်းႁၼ်ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ဝႃႈၼႆ။
ၸွမ်းၼင်ႇ ၶေႃႈပိုၼ်ၽၢဝ်ႇ ႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ဝႆႉၼၼ်ႉ တႄႇဢဝ် ဝၼ်းတီႈ 23/3/2020 တေႃႇထိုင် ဝၼ်းတီႈ 5/4/2020 ၼႆႉ ၵူၼ်းၸပ်းတၢင်းပဵၼ်ၼႂ်းမိူင်းႁူမ်ႈတုမ် မီးၵႂႃႇ 21 ၵေႃႉ၊ တၢႆၵေႃႉၼိုင်ႈ၊ ၼႂ်းၵူၼ်းပဵၼ် ၼၼ်ႉ တႃႇ 19 တႄႉ ငဝ်းလၢႆးတၢင်းပဵၼ် ယဵၼ်လူင်း ၼိမ်ဝႆႉ။ တႃႇထႅင်ႈၵေႃႉၼိုင်ႈတႄႉ လႆႈပၵ်းတႃပႂ်းတူၺ်းဝႆႉ ႁၢဝ်ႈႁႅင်း ယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ