ၵူၼ်းဝၢၼ်ႈတီႈဝဵင်းမႂ်ႇဝၢၼ်ႈႁႆး ႁူမ်ႈၵၼ်ႁဵတ်းသုမ်ႉ တႃႇၵူၼ်းလုၵ်ႉတီႈၵႆမႃးၼၼ်ႉ မႃးလိုဝ်ႈ မႃးယူႇ တႃႇၶၢဝ်းတၢင်း 14 ဝၼ်း။
ဢိင်ၼိူဝ်တၢင်းပဵၼ် ၶူဝ်ႊဝိတ်ႉ 19 လၢမ်းၽႄႈႁၢဝ်ႈႁႅင်းသေ ၵူၼ်းဝၢၼ်ႈ ၼႂ်းထုင်ႉ ဝဵင်းမႂ်ႇဝၢၼ်ႈႁႆး ဢွၼ်ၵၼ်ႁဵတ်းသုမ်ႉ တႃႇ ပၼ်ၵူၼ်းၸိူဝ်းလုၵ်ႉတီႈၵႆပွၵ်ႈ ၶိုၼ်းဝၢၼ်ႈၵဝ်ႇမိူင်းၼွၼ်း လႆႈမႃးလိုဝ်ႈသဝ်းၵုမ်းတူဝ် တႃႇၶၢဝ်းတၢင်း 14 ဝၼ်း ပႂ်ႉတူၺ်းငဝ်းလၢႆးၶူဝ်ႊဝိတ်ႉ 19။ ပဵၼ် ပီႈၼွင်ႉတၢင်းဝၢၼ်ႈလူၺ်၊ ဝၢၼ်ႈဢၢၵ်ႇ ဝၢၼ်ႈ ၼႃးလဝ်း လႄႈ ဝၢၼ်ႈပၢင်ႇလေႃႉ၊ ဝၢၼ်ႈႁႆး ၶဝ်မႃးႁဵတ်းသုမ်ႉသွင်းဝႆႉ 33 သုမ်ႉ ဝႃႈၼႆ။
ယူႇတီႈၵူၼ်းဝၢၼ်ႈလူၺ်တင်းဝၢၼ်ႈဢၢၵ်ႇ ႁဵတ်းဝႆႉသုမ်ႉ တင်းမူတ်းမီး 18 သုမ်ႉ ၾၢႆႇၸၢၼ်းဝၢၼ်ႈႁႆး တၢင်းၽႄၾၢႆႇတူၵ်း တၢင်းၵႂႃႇဝၢၼ်ႈလူၺ်။ ဝၢၼ်ႈၼႃးလဝ်း တင်းဝၢၼ်ႈပၢင်ႇလေႃႉသမ်ႉ ႁဵတ်းဝႆႉတင်းမူတ်း 15 သုမ်ႉ ၾၢႆႇႁွင်ႇဝၢၼ်ႈႁႆး ႁိမ်းသဵၼ်ႈတၢင်း လုၵ်ႉလႃႈသဵဝ်ႈၶဝ်ႈမႃးတၢင်းဝၢၼ်ႈႁႆး။
ၵူၼ်းၼုမ်ႇဝၢၼ်ႈႁႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တင်းမူတ်း သွင်တီႈႁူမ်ႈၵၼ် မီး 33 သုမ်ႉ။ ၵမ်ႈၼမ် ႁဵတ်းဝႆႉ ပၼ်တႃႇ ၵူၼ်းပွၵ်ႈမႃးတၢင်းမိူင်းထႆး၊ မိူင်းၶႄႇၼၼ်ႉၶႃႈ။ တေႃႈလဵဝ်တႄႉ ပႆႇမီးၵူၼ်းမႃးယူႇတိူဝ်ႈ” ဝႃႈၼႆ။
ဢိင်ၼိူဝ်လွင်ႈၼႆႉ ယူႇတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၵေႃႈ လူင်းၵူတ်ႇထတ်းၵူၼ်းမိူင်း ၶဝ်ႈ ဢွၵ်ႇတီႈငဝ်ႈငုၼ်းဝၢၼ်ႈႁႆး တႄႇလူင်းၵူတ်ႇထတ်းႁၢဝ်ႈႁႅင်းမႃး မိူဝ်ႈဝၼ်းတီႈ 29/3/2020 ဝႃႈၼႆ။
လိူဝ်ၼၼ်ႉ ယူႇတီႈၵူၼ်းၼုမ်ႇၼမ်ႉမႃႉ ၸႄႈဝဵင်းသီႇပေႃႉၵေႃႈ ဢွၼ်ၵၼ်လူင်းပိုၼ်ႉတီႈၵူတ်ႇထတ်း တႅၵ်ႈလူမ်းမႆႈ ၵူၼ်း မိူင်းၵႂႃႇမႃးၼႂ်းပိုၼ်ႉတီႈ ဝႃႈၼႆ။
ၵူၼ်းၼုမ်ႇ ၼမ်ႉမႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈလူင်းပိုၼ်ႉတီႈသေ ၵူတ်ႇထတ်းတူၺ်းလူမ်းမႆႈၼႆႉ မီး ၶၢဝ်းတၢင်း 1 ဝူင်ႈယဝ်ႉ။ ႁဝ်းၶႃႈဢွၼ်ၵၼ်ၵူတ်ႇထတ်းၵူၼ်းဝၢၼ်ႈႁဝ်းၶႃႈ ၼႂ်းဢိူင်ႇၼမ်ႉမႃႉၼႆႉ ၵူႈဝၢၼ်ႈ။ ယဝ်ႉၵေႃႈ ပႂ်ႉ တၢင်းၶဝ်ႈဝၢၼ်ႈ ဢွၵ်ႇဝၢၼ်ႈ။ သင်ပဵၼ်ၵူၼ်းမိူင်းလုၵ်ႉတၢင်းမိူင်းထႆး၊ မိူင်းၶႄႇမႃးတႄႉ ႁဝ်းၶႃႈတေဝႆႉတီႈၼိုင်ႈႁင်းမၼ်း ပေႃးလႆႈ 14 ဝၼ်း ၸင်ႇတေပၼ်ၶဝ်ႈဝၢၼ်ႈလႆႈ” ဝႃႈၼႆ။
ၼႂ်းမိူင်းႁူမ်ႈတုမ် ပတ်းပိုၼ်ႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ မီး 21 ၵေႃႉ။ တၢႆ ၵႂႃႇၵေႃႉၼိုင်ႈ။ ၼႂ်းၵူၼ်းပဵၼ်ၼၼ်ႉ ပႃးမိူင်းတႆးၵေႃႉၼိုင်ႈ တေႃႈလဵဝ် တိုၵ်ႉယူတ်းယႃတူဝ်ဝႆႉတီႈႁူင်းယႃ လႃႈသဵဝ်ႈ။
တေႃႈလဵဝ် ၵူၼ်းၸပ်းတၢင်းပဵၼ်ၼႂ်းလုမ်ႈၾႃႉၼႆႉ တင်းမူတ်း မီး 1,274,265 ၵေႃႉ၊ တၢႆ 69,471 ၵေႃႉလႄႈ ယႃၶႅၼ်း 264,837 ၵေႃႉ ယူႇတီႈ ႁွင်ႈၵၢၼ်ပၵ်းတႃပႂ်ႉတူၺ်း တၢင်းပဵၼ်ၶူဝ်ႊဝိတ်ႉ 19 worldometers ဢွၵ်ႇဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ