ၾႆးပႃႇလၢမ်းမႆႈ ႁိမ်းထၢတ်ႈလူင် ၸွမ်ယွင်း ၼႂ်းၸႄႈဝဵင်းမိူင်းယွင်း မႆႈပႃး ၵျွင်းသွမ်း။

ဝၼ်းတီႈ 5/4/2020 ယၢမ်းႁူဝ်ၶမ်ႈ မွၵ်ႈ 5 မူင်းပၢႆၼၼ်ႉ ၾႆးပႃႇလၢမ်းမႆႈ ၵျွင်းသုင်းသွမ်း၊ ၸလွပ်ႈ လႄႈ တီႈဝိႁၢရ် ဢွင်ႈ တီႈဝႆႉၽြႃးၵိင်း ၼႂ်းဝၢင်းၽထၢတ်ႈလူင် ၸွမ်ယွင်း ၸႄႈဝဵင်းမိူင်းယွင်း ၸိုင်ႈတႆးပွတ်းဢွၵ်ႇၶူင်း။

တူႉပီႈလူင်ၸွမ် မိူင်းယွင်း လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈဢေႃႈ တၵ်ႉၵႃႇ ၾႆးပႃႇမႆႈမႃး 2-3 ဝၼ်းယဝ်ႉ။ ၾႆးပႃႇၼႆႉ လၢမ်းမႆႈမႃးတၢင်း ၾၢႆႇဢွၵ်ႇၽထၢတ်ႈလူင်ၸွမ်ယွင်း။ ယွၼ်ႉလူမ်းႁႅင်း လႄႈပဵဝ်ၾႆးမႃးမႆႈႁိမ်းၶၢင်ႈဝၢင်းၽထၢတ်ႈ လူင်သေ လၢမ်းမႆႈ ပႃးၵျွင်း/ ႁူင်းသုင်းသွမ်း ၸိူဝ်းၼၼ်ႉ တင်းမူတ်းတေမႆႈ 3 တီႈ” ဝႃႈၼႆ။

ယူႇတီႈသင်ႇၶႃႇၸဝ်ႈၵူၼ်းဝၢၼ်ႈ ႁူမ်ႈၵၼ်သေ ၸွႆႈၶႄႁူတ်းၾႆး ဝၢႆးၼၼ်ႉ ၸင်ႇမီးရူတ်ႉၵႃး ပလိၵ်ႈၾၢႆႇၶႄၾႆး မႃးႁူတ်းၸွႆႈသေ ၸင်ႇတေမွတ်ႇလူင်းၵႂႃႇ မွၵ်ႈႁိမ်း 8 မူင်းၵၢင်ၶမ်ႈ ဝႃႈၼႆ။

တူႉပီႈလူင်ၸွမ် သိုပ်ႇလၢတ်ႈဝႃႈ “ တီႈၽထၢတ်ႈလူင် ၸွမ်ယွင်းႁဝ်းၼႆႉ မီးတူႉပီႈတူၼ်ၼိုင်ႈလႄႈ ၵူၼ်းၵေႃႉၼိုင်ႈ ပႂ်ႉဝႆႉ။ လွင်ႈလူႉသုမ်းတႄႉ တေၼပ်ႉႁူဝ်လၢၼ်ႉမၼ်းယူႇ။ တီႈဝိႁၢရ်ၽြႃးၵိင်းၼၼ်ႉ တၼ်းမႆႈၵႂႃႇ တီႈမွၼ်ႁူဝ်ၽြႃးၸဝ်ႈ ၊ တီႈၽထၢတ်ႈလူင်တႄႉ ဢမ်ႇမႆႈ” ဝႃႈၼႆ။

လွင်ႈၾႆးပႃႇလၢမ်းမႆႈၼႆႉ ပဵၼ်ၵေႃႉလႂ်ၸုတ်ႇၽဝ်မႃးဢၼ်ဝႃႈၼၼ်ႉ ပႆႇလႆႈႁူႉ။ လွင်ႈၵူၼ်းလူႉတၢႆ မၢတ်ႇၸဵပ်းတႄႉ ဢမ်ႇမီး ဝႃႈၼႆ။

မိူဝ်ႈဝၼ်းတီႈ 3/4/2020 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈၼၼ်ႉ ၾႆးပႃႇလၢမ်းမႆႈႁိူၼ်းၵူၼ်းဝၢၼ်ႈ ပူင်ႇတပ်ႈ တင်း ဝၢၼ်ႈ ၶတ်းၵျုးတေႇ (ပုံတပ် (၁) ကျေးရွာ နှင့် ခတ်ကြားဒေကျေးရွာ) ၼႂ်းဢိူင်ႇမိူင်းတုမ်း ၸႄႈဝဵင်းမိူင်းသၢတ်ႇ ၸိုင်ႈတႆးပွတ်း ဢွၵ်ႇၶူင်း ။ ႁိူၼ်းပႃးၵႂႃႇၸွမ်းၾႆးမႆႈပႃႇ 36 လင် ၵူၼ်းဝၢၼ်ႈ 130 ၵေႃႉ ႁူပ်ႉၽေးၾႆး ယၢပ်ႇၽိုတ်ႇ တႃႇယူႇတႃႇၵိၼ်။