ၸဝ်ႈၼႃႈတီႈတၢင်းၾင်ႇမိူင်းၶႄႇ ဢမ်ႇပၼ်ၵူၼ်းႁေႃႈၵႃးလႄႈ ၵူၼ်းၸွမ်းၵႃး ၵႃးတၢင်ႇၵုၼ်ႇၾင်ႇမိူင်းတႆး ၶဝ်ႈၸွမ်းၵႃး ထိုင်ၼႂ်းမိူင်းၶႄႇလႄႈ လႆႈထဵင်မေႃးမီးပၼ်ႁႃၵၼ်တီႈလႅၼ်လိၼ်။

မိူဝ်ႈၼႆႉ ဝၼ်းတီႈ 5/4/2020 ယၢမ်းၵၢင်ၼႂ် 9 မူင်း ၸဝ်ႈၵႃး/ ၵူၼ်းႁေႃႈၵႃးလူင် တၢင်ႇၵုၼ်ႇ တၢင်းၾင်ႇမိူင်းတႆး/ မိူင်းႁူမ်ႈ တုမ် ထုၵ်ႇၸဝ်ႈၼႃႈတီႈၾင်ႇမိူင်းၶႄႇ ဢမ်ႇပၼ်ႁေႃႈၵႃးတၢင်ႇၵုၼ်ႇၶဝ်ႈမိူင်းၶႄႇႁင်းၵူၺ်း။ ႁႂ်ႈၵူၼ်းႁေႃႈၵႃး ယူႇပႂ်ႉတၢင်း ၾင်ႇ မူႇၸေႊၼႆႉသေ ၸဝ်ႈၼႃႈတီႈတၢင်းၾင်ႇမိူင်းၶႄႇ တေၸႂ်ႉၵူၼ်းမိူင်းၶႄႇ မႃးႁပ်ႉဢဝ်ရူတ်ႉၵႃးၵုၼ်ႇၶဝ် ႁေႃႈၶဝ်ႈ မိူင်းၶႄႇ ပၼ်ၼႆလႄႈ ၸဝ်ႈၵႃးဢမ်ႇၽွမ်ႉ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၸဝ်ႈၵႃးလူင်ၶဝ် တၢင်းမိူင်းတႆးႁဝ်းၼႆႉ မီး ပၼ်ႁႃၶႃႈဢေႃႈ။ ၵႃးလူင်တၢင်ႇၵုၼ်ႇတႄႉ ပၼ်ၶဝ်ႈၵႂႃႇတၢင်းမိူင်းၶႄႇၶဝ်ယူႇ။ ၵူၺ်းၵႃႈ ၵူၼ်းႁေႃႈၵႃးတႄႉ ဢမ်ႇပၼ်ၶဝ်ႈ။ တၢင်းၾင်ႇမိူင်းၶႄႇ ၶဝ်ႁၢင်ႈႁႅၼ်း ၵူၼ်းႁေႃႈၵႃးဝႆႉ ၼိုင်ႈၵမ်းလႂ် 10 ၵေႃႉ။ မႃးႁပ်ႉၵႃးၵုၼ်ႇ ၼိုင်ႈၵေႃႉ ႞ လမ်း။ ၵူၺ်းၵႃႈ ၾၢႆႇၸဝ်ႈၵုၼ်ႇၸဝ်ႈၵႃးတေလႆႈပၼ်ၵႃႈၸၢင်ႈ တီႈၵူၼ်းၶႄႇ ၼိုင်ႈၵေႃႉလႂ် 10 ယႂၼ်၊ တႃႇဢွင်ႈတီႈဝႆႉၵႃး တႃႇဢဝ်ၶူဝ်း လူင်းသမ်ႉ ထႅင်ႈ 10 ယႂၼ် ။ တူဝ်ၸဝ်ႈၵႃးဢမ်ႇလႆႈႁေႃႈၶဝ်ႈႁင်းၵူၺ်းသေဢမ်ႇၵႃးယင်းလႆႈပၼ်ငိုၼ်းထႅင်ႈ ၼိုင်ႈလမ်း 20 ယႂၼ် ၸင်ႇတေၸၢင်ႈသူင်ႇၵုၼ်ႇၶဝ်ႈၶၢႆၼႂ်းမိူင်းၶႄႇ” ဝႃႈၼႆ။

မိူဝ်ႈဝႃး ဝၼ်းတီႈ 4/4/2020 ၼၼ်ႉ ယူႇတီႈၾၢႆႇၸဝ်ႈၼႃႈတီႈၾင်ႇမိူင်းၶႄႇ လႆႈဢွၵ်ႇလိၵ်ႈပိုၼ်ၽၢဝ်ႇ ဝႃႈ – ရူတ်ႉၵႃးတၢင်ႇ ၵုၼ်ႇၾင်ႇမိူင်းတႆး ဢၼ်တေၶဝ်ႈၶၢႆၵုၼ်ႇၼႂ်းမိူင်းၶႄႇၼၼ်ႉ ၵူၼ်းမိူင်းၶႄႇတေမႃးႁပ်ႉဢဝ်ရူတ်ႉၵႃးတီႈႁူဝ်ၶူဝ်သေ ႁေႃႈ ၶဝ်ႈၵႂႃႇပၼ်၊ ဢဝ်ၵုၼ်ႇလူင်းပၼ်သေ တေဢဝ်ရူတ်ႉၵႃးဢွၵ်ႇမႃးပၼ်ၶိုၼ်း ။ တူဝ်ၵူၼ်းႁေႃႈလႄႈၵူၼ်းၸွမ်း တၵ်းလႆႈ လူင်းယူႇဝႆႉၾင်ႇမိူင်းတႆး ။ တေဢမ်ႇလႆႈၶဝ်ႈၸွမ်း ဝႃႈၼႆ။

ၸၢႆးမၢဝ်း ၸဝ်ႈၵႃး ဢၼ်လႅၼ်ႈတၢင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ဢိင်ၼိူဝ်လွင်ႈၼႆႉ ႁဝ်းၶႃႈ ၸိူဝ်းပဵၼ်ၸဝ်ႈၵႃး ဢွၼ်ၵၼ်မႆႈၸႂ် ၶႃႈဢေႃႈ ပေႃးပၼ်ၶဝ်ႁေႃႈၵႂႃႇယဝ်ႉ ၵူၼ်းတၢင်းၾင်ႇမိူင်းၶႄႇၼၼ်ႉ ၶဝ်ဢမ်ႇႁူႉလွင်ႈၵႃးတၢင်းမိူင်းႁဝ်း။ ၶဝ်ဢမ်ႇမေႃႁေႃႈၵႃးမိူင်းႁဝ်း။ ၶဝ်သႂ်ႇၵီႊယႃႊၽိတ်း ၊ယဵပ်ႇၵလၢတ်ႉၽိတ်းၸိူဝ်းၼႆႉ ႁဝ်းၶႃႈၵူဝ်ၵႃးႁဝ်းၵွႆၶႃႈဢေႃႈ။ သင် ဝႃႈ ၵီႊယႃႊပွၵ်ႉသ်မၼ်းလႅဝ်ၵႂႃႇၸိုင် ပေႃးၵႂႃႇမႄးၶိုၼ်းတေလႆႈသဵင်ႈငိုၼ်းမၢၼ်ႈမွၵ်ႈ 20 သႅၼ်ပျႃး။ ယွၼ်ႉၼၼ်လႄႈ ႁဝ်းၶႃႈဢမ်ႇၽွမ်ႉသေ ၸင်ႇပဵၼ်ပၼ်ႁႃၵၼ် ၶႃႈဢေႃႈ မိူဝ်ႈၵႆႈၼႆႉ” ဝႃႈၼႆ။

ထႅင်ႇၾၢႆႇၼိုင်ႈ ယွၼ်ႉၸဝ်ႈၵႃး ၵူၼ်းၸွမ်းၵႃး ဢမ်ႇလႆႈၶဝ်ႈၸွမ်းလႄႈ ၵူဝ်ၶူဝ်းၶွင်ႁၢႆၵေႃႈပိူင်ၼိုင်ႈ။ ၶူဝ်းၶွင် ဢၼ်တေတၢင်ႇပွၵ်ႈၶိုၼ်းမႃးၼၼ်ႉၵေႃႈ ၵူဝ်မၼ်းဢမ်ႇၶူပ်း ဢမ်ႇတဵမ် ၵူဝ်မၼ်းလူႉၵွႆ ၸဵမ်ၸိူဝ်းၼႆႉ။

ၸၢႆးမၢဝ်း လၢတ်ႈဝႃႈ “ ၶဝ်ၵေႃႈဢမ်ႇႁူႉလွင်ႈႁဝ်း။ တေဢဝ်ၵုၼ်ႇႁဝ်းၵႂႃႇဝၢင်းတီႈလႂ် တေၵႂႃႇပၼ်ၽႂ်ၸိူဝ်းၼႆႉ။ ယဝ်ႉၵေႃႈၶူဝ်းၶွင်ဢၼ်ၶႃႈၶဝ်တၢင်ႇမႃးပၼ်ၶိုၼ်းၼႆႉ ပေႃးဝႃႈမၼ်းႁၢႆ၊ ယွမ်းသမ်ႉ ၽႂ်တေ ဢဝ် ပုၼ်ႈၽွၼ်း ။ သင်ဝႃႈ ရူတ်ႉၵႃးႁဝ်းၶႃႈပဵၼ်ၵႂႃႇသေၸိူဝ်ႉသေပိူင် ။ ယွၼ်ႉၼၼ်လႄႈ ႁဝ်းၶႃႈဢမ်ႇယုမ်ႇယမ်၊ ဢမ်ႇၸၢင်ႈပၼ် ၶဝ်ႁေႃႈ ၵႃးႁဝ်းၶဝ်ႈၵႂႃႇၶႃႈ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈၾၢႆႇၸဝ်ႈၼႃႈတီႈ တင်းသွင်ၾင်ႇမိူင်း တိုၵ်ႉဢုပ်ႇဢူဝ်းငူပ်ႉငီႉၵၼ်ယူႇ လွင်ႈတေႃႉၵုၼ်ႇၶဝ်ႈ တၢင်းၾင်ႇမိူင်းၶႄႇၼၼ်ႉ ဝႃႈၼႆ။

“လွင်ႈၼႆႉ မၼ်းဢမ်ႇမီးလွင်ႈၽဵင်ႇပဵင်းသေဢိတ်း။ မိူဝ်ႈတၢင်းမိူင်းၶႄႇပဵၼ်ၼၼ်ႉ ၶဝ်ႈဢမ်ႇႁၢမ်ႈၵူၼ်းမိူင်းၶဝ် ပၼ်တေႃႉ ၶူဝ်းၶဝ်ႈဢွၵ်ႇၵႂႃႇမႃးယူႇ။ သင်ႁူႉဝႃႈတၢင်းမိူင်းႁူမ်ႈတုမ်ႁဝ်းၶႃႈၼႆႉ မီးၵူၼ်းၸပ်းတၢင်းပဵၼ်မႃးယဝ်ႉၵေႃႈ ႁၢမ်ႈၵူၼ်းမိူင်း ႁဝ်းၶႃႈ ဢမ်ႇပၼ်ၶဝ်ႈမိူင်းၶဝ် လွင်ႈၼႆႉ မၼ်းဢမ်ႇလီပဵၼ်သေဢိတ်း” ၵူၼ်းၵႃႉၶၢႆၸွမ်းလႅၼ်လိၼ် တႆး-ၶႄႇ ၵေႃႉၼိုင်ႈ လၢတ်ႈၼႄၼင်ႇၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉ လၢမ်းၽႄႈႁၢဝ်ႈႁႅင်း ၼႂ်းလုမ်ႈၾႃႉသေ ၸွမ်းလႅၼ်လိၼ်တႆး – ၶႄႇ၊ လႅၼ်လိၼ် တႆး – ထႆး ၸိူဝ်းၼႆႉၵေႃႈ လႆႈဢိုတ်းပိၵ်ႇဝႆႉ ၽၵ်းတူၶဝ်ႈဢွၵ်ႇမိူင်း ၵူႈတီႈ ဝႃႈၼႆ။

တႄႇဢဝ်ဝၼ်းတီႈ 1/4/2020 ၼႆႉမႃး ၽၵ်းတူမိူင်းၶဝ်ႈဢွၵ်ႇတီႈမူႊၸေႊ လႅၼ်လိၼ်တႆး – ၶႄႇ ဢၼ်ပိုတ်ႇဝႆႉပဵၼ်တၢင်း ၵၢၼ်ၼၼ်ႉၵေႃႈ လႆႈတႄႇဢိုတ်း/ ပိၵ်ႉမႃးယဝ်ႉ။ ၸွမ်းတႃႈႁိူဝ်း သၢပ်ႇၼမ်ႉမၢဝ်းၵေႃႈ လႆႈဢိုတ်း/ ပိၵ်ႉမိူၼ်ၵၼ် ဝႃႈၼႆ။

ၶူဝ်းၵုၼ်ႇ ဢၼ်လုၵ်ႉတၢင်းမိူင်းႁူမ်ႈတုမ်သေ သူင်ႇၸူးတၢင်းမိူင်းၶႄႇ ၵမ်ႈၼမ်ၼႆႉ မိူၼ်ၼင်ႇ ႁူဝ်မီႇလႅင်၊ ၽိူၵ်ႇ၊ ပႃႁႅင်ႈ၊ ၶဝ်ႈသၢၼ်၊ တႅင် ဢိၵ်ႇထႅင်ႈလၢႆလၢႆဢၼ် ၸဵမ်ၸိူဝ်းၼႆႉ။