ၾႆးပႃႇလၢမ်းမႆႈ ပႃးႁိူၼ်းၵူၼ်းဝၢၼ်ႈ ၼႂ်းၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ၼပ်ႉႁူဝ်သိပ်းလင်၊ ႁူဝ်ၵူၼ်း ၼပ်ႉပၢၵ်ႇ ၺႃးၽေးၾႆး ယၢပ်ႇၽိုတ်ႇတႃႇယူႇတႃႇၵိၼ်။
ဝၼ်းတီႈ 3/4/2020 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈၼၼ်ႉ ၾႆးပႃႇလၢမ်းမႆႈႁိူၼ်းၵူၼ်းဝၢၼ်ႈ ပူင်ႇတပ်ႈ တင်း ဝၢၼ်ႈၶတ်းၵျုးတေႇ (ပုံတပ် (၁) ကျေးရွာ နှင့် ခတ်ကြားဒေကျေးရွာ) ၼႂ်းဢိူင်ႇမိူင်းတုမ်း ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ။ ႁိူၼ်းပႃးၵႂႃႇၸွမ်းၾႆးမႆႈပႃႇ 36 လင် ၵူၼ်းဝၢၼ်ႈ 130 ၵေႃႉ ႁူပ်ႉၽေးၾႆး ယၢပ်ႇၽိုတ်ႇ တႃႇယူႇတႃႇၵိၼ်။
ၸၢႆးသႅင် ၵူၼ်းမိူင်းသၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ၾႆးပႃႇလၢမ်းမႆႈၶႃႈ။ တေႃႈလဵဝ် ၼႂ်းမိူင်းႁဝ်းၶႃႈၼႆႉ ဢွၼ်ၵၼ်ၸုတ်ႇပႃႇ ၽဝ်ပႃႇၵၼ်သေ ၾႆးပႃႇလၢမ်းမႆႈပႃး ႁိူၼ်းၵူၼ်းဝၢၼ်ႈၶႃႈဢေႃႈ။ ဝၢၼ်ႈဢၼ်ၺႃးမႆႈၵႂႃႇၼၼ်ႉ ပဵၼ်ဝၢၼ်ႈပီႈၼွင်ႉ ၸၢဝ်းၶိူဝ်းလႃးႁူႇ ၵမ်ႈၼမ်ၶႃႈယဝ်ႉ” ဝႃႈၼႆ။
သိုပ်ႇလၢတ်ႈဝႃႈ “ ၽွင်းယၢမ်းတေႃႈလဵဝ်ၼႆႉ လႅတ်ႇၵေႃႈမႆႈ လူမ်းၵေႃႈႁႅင်းသေ ပေႃးၸုတ်ႇပႃႇၼႆ လၢမ်းမႆႈဝႆးၼႃႇၶႃႈ။ မႆႈၸႂ် ႁိူၼ်းၵူၼ်းဝၢၼ်ႈ ၸိူဝ်းယူႇၸွမ်းပၢၼ်းတၢပ်ႈလွႆၸိူဝ်းၼၼ်ႉၵူၺ်းယဝ်ႉၶႃႈ၊ ပေႃးၾႆးပႃႇမႆႈမႃးၼႆ ၸၢင်ႈမႆႈပႃးႁိူၼ်းၵူၼ်း ဝၢၼ်ႈႁဝ်းၶႃႈ” ဝႃႈၼႆ။
ဢိင်ၼိူဝ်လွင်ႈၾႆးမႆႈ တီႈဝၢၼ်ႈပူင်ႇတပ်ႈတင်း ဝၢၼ်ႈၶတ်းၵျုးတေႇၼႆႉသေ ယူႇတီႈၵူၼ်းဝၢၼ်ႈ ၽူႈမီးပုၼ်ႈၽွၼ်းၾၢႆႇ ၶႄၾႆးလႄႈ ပလိၵ်ႈ ၸဵမ်ၸိူဝ်းၼႆႉ ႁူမ်ႈၵၼ်သေ ၶႄၾႆးမွတ်ႇၵႂႃႇ ယၢမ်းႁူဝ်ၶမ်ႈ 5 မူင်းပၢႆ ဝႃႈၼႆ။
မိူဝ်ႈဝၼ်းတီႈ 19/3/2020 ယၢမ်းဝၢႆးဝၼ်း 2 မူင်းပၢႆၼၼ်ႉသမ်ႉ ၼႂ်းၸႄႈဝဵင်းမိူင်းၶၢၵ်ႇ ဝၢၼ်ႈၼွင်ၽုၵ်ႈၵေႃႈ ႁိူၼ်းၵူၼ်းဝၢၼ်ႈ 8 လင် ပႃးၵႂႃႇၸွမ်းၾႆးပႃႇ၊ လွင်ႈလူႉသုမ်းၵေႃႈ ၼပ်ႉႁူဝ်သိပ်းသႅၼ်၊ ၵူၼ်းဝၢၼ်ႈ ၵေႃႈႁူပ်ႉတၢင်းယၢပ်ႇၽိုတ်ႇ တႃႇယူႇတႃႇၵိၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ