ၸဝ်ႈၼႃႈတီႈ မိူင်းၶႄႇ မိူင်းမၢၼ်ႈ သွင်ၾင်ႇၸိုင်ႈမိူင်း ပိုၼ်ၽၢဝ်ႇပိၵ်ႉၽၵ်းတူလႅၼ်လိၼ် ဝႆႉၸူဝ်ႈၶၢဝ်းသေတႃႉ ႁႅင်းၵၢၼ်မိူင်းႁူမ်ႈတုမ် ၸိူဝ်းၵႂႃႇႁဵတ်းၵၢၼ်တၢင်းမိူင်းၶႄႇ ယင်းတိုၵ်ႉပၼ်ပွၵ်ႈၶိုၼ်းမိူင်းယူႇ။

မိူဝ်ႈၼႆႉ ဝၼ်းတီႈ 4/4/2020 ယၢမ်းၵၢင်ဝၼ်း 12 မူင်းၼႆႉ ႁႅင်းၵၢၼ်မိူင်းႁူမ်ႈတုမ် ပွၵ်ႈၶိုၼ်းမိူင်း၊ ၸဝ်ႈၼႃႈတီႈလႅၼ်လိၼ်ဝူင်ႈၵၢင်သွင်ၸိုင်ႈမိူင်း – ၽၵ်းတူမိူင်းတႆး မိူင်းၶႄႇ မူႇၸေႊ – ၸႄႈၵဝ်ႇ ၽၵ်းတူၸၢင်ႉၽိူၵ်ႇ၊ ၽၵ်းတူမၢၼ်ႈဝဵင်း၊ ၽၵ်းတူလူင် ၼၼ်ႉ ယင်းတိုၵ်ႉႁပ်ႉ ၵူၼ်းၸိူဝ်းၵႂႃႇႁဵတ်း ၵၢၼ်မိူင်းၶႄႇ ပွၵ်ႈၶိုၼ်းဝၢၼ်ႈၵဝ်ႇမိူင်းလင်၊ ဝၼ်းမိူဝ်ႈၼႆႉ မီးႁူဝ်ၵူၼ်း ပွၵ်ႈၶဝ်ႈမႃး 45 ၵေႃႉယဝ်ႉ ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ လၢတ်ႈတီႈၽူႈတွႆႇႁွၵ်ႈဝႃႈ “ ၵၢင်ၼႂ်ၸဝ်ႉ တေႃႇထိုင် ယၢမ်းၵၢင် ဝၼ်း 12 မူင်းၼႆႉ တင်းမူတ်းႁႅင်းၵၢၼ်ပွၵ်ႈၶဝ်ႈမႃးမီး 45 ၵေႃႉယဝ်ႉ။ ၼႂ်းၼၼ်ႉ ပႃးလုၵ်ႈဢွၼ်ႇ 2 ၵေႃႉ။ ယၢမ်းလဵဝ်ၼႆႉ တိုၵ်ႉဢွၼ်ၵၼ် ပွၵ်ႈၶဝ်ႈမႃးယူႇတိၵ်းတိၵ်းၶႃႈယဝ်ႉ။ ႁၢၼ်ႉတေႃႇထိုင် တၢမ်းၶမ်ႈၼႆႉ တေမီးၼပ်ႉႁူဝ်ပၢၵ်ႇမၼ်းယူႇ” ဝႃႈၼႆ။

ၵူၼ်းပွၵ်ႈမႃးၸိူဝ်းၼၼ်ႉၾၢႆႇပူၵ်းပွင် မိူင်းမူႇၸေႊ ဢမ်ႇႁပ်ႉ၊ ၵူတ်ႇထတ်းပၢႆးယူႇလီသေ ပၼ်လိၵ်ႈၵမ်ႉ သူင်ႇပွၵ်ႈမိူဝ်း ဝၢၼ်ႈၽႂ်မိူင်းမၼ်း ႁႂ်ႈၵုမ်းၵမ် 14 ဝၼ်း ႁင်းၽႂ်ႁင်းမၼ်း။ ႁႅင်းၵၢၼ် ဢၼ်ၵႂႃႇႁဵတ်းၵၢၼ် တၢင်းမိူင်းၶႄႇ ၸိူဝ်းပွၵ်ႈမႃး သႅၼ်ပၢႆ၊ ပေႃးၵုမ်းၵမ်ဝႆႉတီႈ မူႇၸေႊ ဢၼ်လႆႈႁပ်ႉပုၼ်ႈၽွၼ်း တီႈယူႇတီႈၵိၼ်ပုၼ်ႈၽွၼ်း ၸဝ်ႈၼႃႈတီႈၵေႃႈၼၵ်း ဝႃႈၼႆ။

လုင်းသႅင်ၶမ်းႁိူင်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ သင်ဝႃႈ ႁႅင်းၵၢၼ်ၶဝ်ပွၵ်ႈမႃးသေ တေဢဝ်ဝႆႉတီႈမူႇၸေႊပႂ်ႉတူၺ်း တႃႇၶၢဝ်းတၢင်း 14 ဝၼ်းၸိုင် ၸင်ႇပွၵ်ႈမိူဝ်းၶိုၼ်းဝၢၼ်ႈၽႂ်မိူင်းမၼ်းၼၼ်ႉ ပေႃးမႃးၵွင်ၵၼ်တင်းမူတ်းၸိုင် ဢွင်ႈတီႈယူႇၵေႃႈ တေဢမ်ႇပေႃး၊ လွင်ႈႁူမ်ႇလူမ်ႈၵေႃႈ တေဢမ်ႇၵုမ်ႇထူၼ်ႈလႆႈ ယဝ်ႉၵေႃႈ တေယၢပ်ႇၽိုတ်ႇပႃးထႅင်ႈ တွၼ်ႈတႃႇၵူၼ်းမိူင်း” ဝႃႈၼႆ။

“ ပေႃးဝႃႈ ႁႅင်းၵၢၼ်ပွၵ်ႈမႃးယူႇတီႈမူႇၸေႊၵၼ်တင်းၼမ်တႄႉ ၾၢႆႇႁူမ်ႇလူမ်ႈၵေႃႈ တေဢမ်ႇၵုမ်ႇထူၼ်ႈ၊ မေႃယႃၵေႃႈ တေဢမ်ႇၵုမ်ႇထူၼ်ႈ၊ လွင်ႈၵိၼ်လွင်ႈယမ်ႉၵေႃႈ တေယၢပ်ႇၽိုတ်ႇ ၵွပ်ႈၸိူင်ႉၼၼ်လႄႈ သင်ဝႃႈ ပွၵ်ႈမႃးယဝ်ႉၵေႃႈ ႁႂ်ႈ ဢွၼ်ၵၼ်ပွၵ်ႈမိူဝ်းၶိုၼ်းတီႈဝၢၼ်ႈၽႂ် ဝဵင်းမၼ်းၵမ်းလဵဝ်ၼႆ တေလီၶႃႈ” ၵူၼ်းမိူင်းမူႇၸေႊၵမ်ႈၼမ် လၢတ်ႈၼႄၼင်ႇၼႆ။

မိူဝ်ႈဝႃး ဝၼ်းတီႈ 3/4/2020 ၼႆႉ ႁႅင်းၵၢၼ်မိူင်းႁူမ်ႈတုမ် ပွၵ်ႈၶဝ်ႈမႃးတၢင်းမူႇၸေႊတင်းမူတ်းတေမီး 219 ၵေႃႉ၊ ၵမ်ႈၼမ် ပဵၼ် ၸၢဝ်းမၢၼ်ႈ ၸိူဝ်းယူႇတၢင်းမိူင်းမၢၼ်ႈ တူင်ႈပဵင်း၊ ၵူၼ်းတၢင်းၵျွၵ်ႉမႄး၊ ၵူတ်ႉၶၢႆ လႄႈ တၢင်ႇဝဵင်း ၼႂ်းၸိုင်ႈတႆးၵေႃႈမီးၽွင်ႈ။

ဢိင်ၼိူဝ် လွင်ႈတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈႁၢဝ်ႈႁႅင်းၼႆႉသေ ၸဝ်ႈၼႃႈတီႈတၢင်းၾင်ႇ မိူင်းၶႄႇ ၸီႉသင်ႇ ဢိုတ်း ၽၵ်းတူမိူင်း ၸွမ်းလႅၼ်လိၼ်ၵူႈတီႈ၊ ၸွမ်းတႃႈႁိူဝ်းၸိူဝ်းၼႆႉၵေႃႈ ၼင်ႇၵႃႈပဵၼ်လႆႈ ဢိုတ်းဝႆႉမိူၼ်ၵၼ်။

တေႃႈလဵဝ် ၵူၼ်းၸပ်းတၢင်းပဵၼ်ၼႂ်းလုမ်ႈၾႃႉၼႆႉ တင်းမူတ်း မီး 1,118,844 ၵေႃႉ၊ တၢႆ 59,236 ၵေႃႉလႄႈ ယႃၶႅၼ်း 229,286 ၵေႃႉ ယူႇတီႈ ႁွင်ႈၵၢၼ်ပၵ်းတႃပႂ်ႉတူၺ်း တၢင်းပဵၼ်ၶူဝ်ႊဝိတ်ႉ 19 worldometers ဢွၵ်ႇဝႆႉ။