ၼႂ်းဝၢင်းဝတ်ႉဝေႇလုဝၼ်ႇ ဢၼ်မီးၼႂ်းၵၢင်ဝဵင်းၵျွၵ်ႉမႄးၼၼ်ႉ သင်ၶၸဝ်ႈ ထူပ်းႁၼ် မၢၵ်ႇပွမ်း ဢၼ်ၸႂ်ႉၼႂ်းပၢင်တိုၵ်း သိုၵ်းသိူဝ်လုၵ်ႈၼိုင်ႈ လႄႈ လႆႈမွၵ်ႇႁွင်ႉ ၾၢႆႇတပ်ႉပလိၵ်ႈ မႃးဢဝ်ၵႂႃႇ။
မိူဝ်ႈၼႆႉ ဝၼ်းတီႈ 4/4/2020 ယၢမ်းၵၢင်ၼႂ် ထူပ်းႁၼ် မၢၵ်ႇပွမ်းလုၵ်ႈၼိုင်ႈ ႁိမ်းၵွင်းမူးထၢတ်ႈ ၼႂ်းဝၢင်းဝတ်ႉဝေႇလုဝၼ်ႇ ပွၵ်ႉ 8 ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ၊ မၢၵ်ႇပွမ်းၼၼ်ႉ ပဵၼ်ၶွင်ၽႂ် ၸုမ်းလႂ် မီးၽႅၼ်ၵၢၼ်ၸိူင်ႉႁိုဝ် ၾၢႆႇၵူတ်ႇထတ်းယင်းပႆႇပိုၼ်ၽၢဝ်ႇ။
ၸဝ်ႈၶူး ၼႂ်းဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈဢေႃႈ ႁိမ်းၵွင်း မူးထၢတ်ႈၼၼ်ႉၼႃႇ တၵ်ႉၵႃႇ။ ပဵၼ်မၢၵ်ႇပွမ်းလုၵ်ႈၼိုင်ႈ။ ၽွင်းၵႂႃႇၽဵဝ်ႈပတ်းၼၼ်ႉ မၢၵ်ႇပွမ်းၼၼ်ႉ သႂ်ႇဝႆႉၼႂ်းထူင်ပလၢတ်ႉသတိၵ်ႉ။ ၽိူဝ်ႇငၢင်ႉႁၼ်မၢၵ်ႇပွမ်းၵေႃႈ ဢွၼ်ၵၼ်တူၵ်းၸႂ်ၼၼ်ႉၼႃႇတၵ်ႉၵႃႇဝႃႈ။ ႁွင်ႉၽူႈၵွၼ်းပွၵ်ႉမႃး တူၺ်းသေ မွပ်ႈပၼ်ၽူႈမီးပုၼ်ႈၽွၼ်းၶဝ် မႃးဢဝ်ၵႂႃႇယဝ်ႉ” ဝႃႈၼႆ။
ဢိင်ၼိူဝ် ၸိူဝ်ႉမႅင်း ၶူဝ်ႊဝိတ်ႉ 19 ၽႄႈၸပ်းၵၼ်၊ ၵူဝ်တၢင်းပဵၼ် သိုပ်ႇၽႄႈတေႃႇ ၵူၼ်းမိူင်း ၼႂ်းၵျွၵ်ႉမႄးၼႆသေ တီႈႁိမ်းဝတ်ႉ/ ၵျွင်းဝေႇလုဝၼ်ႇၼႆႉ ႁဵတ်းဝႆႉ ပၼ်ၵူၼ်းလုၵ်ႉတၢင်ႇတီႈသီႇလႅၼ် ပွၵ်ႈမႃးၶိုၼ်းဝၢၼ်ႈၵဝ်ႇမိူင်းလင် ၵုမ်းၵမ်ထတ်းထွင်ပၢႆးယူႇလီ ၶဝ်ဝႆႉ ၶၢဝ်းတၢင်း 14 ဝၼ်း လႄႈ ၽွင်းႁူပ်ႉႁၼ်မၢၵ်ႇပွမ်းၼၼ်ႉ ပႃးၵၼ်တူၵ်းၸႂ်ၵႂႃႇၽွင်ႈ ဝႃႈၼႆ။
ၼႂ်းၸႄႈဝဵင်းၵျွၵ်ႉမႄးၼႆႉ ပေႃးၼႂ်းဝဵင်း မီးသိုၵ်းလူင်ပွင်ၸိုင်ႈမၢၼ်ႈ ပလိၵ်ႈမၢၼ်ႈ သၢပ်ႇဝဵင်းတႄႉ ၸုမ်းယိပ်းၵွင်ႈၵၢင်ႇလုၵ်ႉ ၽိုၼ်ႉ မီးလၢႆလၢႆၸုမ်း။ ပၼ်ႁႃ ၶႃႈႁႅမ်ပိုတ်းယိုဝ်းၵၼ်တၢႆၵေႃႈ ၵႆႉၵႆႉပဵၼ်။ ယိုဝ်းၵၼ်တၢႆမိူဝ်ႈလႂ်ၵေႃႈ ၾၢႆႇတပ်ႉပလိၵ်ႈ ယင်းဢမ်ႇၵူတ်ႇထတ်းတီႉၺွပ်းလႆႈတူဝ်ၵူၼ်းႁၢႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ