ၵႃးလူင် တၢင်ႇၵူၼ်း လုၵ်ႉမူႇၸေႊ လူင်းမႃး တၢင်းလႃႈသဵဝ်ႈ ၼၼ်ႉ ပိၼ်ႈ ၼႂ်းၵႄႈၵူတ်ႉၶၢႆ – သႅၼ်ဝီ မီးၵူၼ်းလူႉတၢႆ မၢတ်ႇၸဵပ်းလၢႆလၢႆၵေႃႉ။

ဝၼ်းတီႈ 3/4/2020 ယၢမ်းႁူဝ်ၶမ်ႈ 5 မူင်းပၢႆ ၵႃးတၢင်ႇၵူၼ်း(မၢၼ်ႇလူင်ႇ) လၢမ်းၼိုင်ႈ ပိၼ်ႈၶႂမ်ႈ တီႈတၢင်းလူင်းလွႆ ႁိမ်းဝၢၼ်ႈပဵင်း (ထုင်ႉလွႆသၢမ်သိပ်း) ယၢၼ် ၵႆ ဝဵင်းၵူတ်ႉၶၢႆ 38 လၵ်း ၼႂ်းၵႄႈ ၵူတ်ႉၶၢႆ – သႅၼ်ဝီ ၼၼ်ႉ မီးၵူၼ်း သႅၼ်းဢႃယု 20 ပီ (ၸၢႆး) ၵေႃႉၼိုင်ႈ လႆႈလူႉတၢႆထင်တီႈ ဝႃႈၼႆ။

ၵူၼ်းၼႂ်းၸုမ်းၸွႆႈထႅမ်တူင်ႇဝူင်းၵူၼ်း (သိန္နီမြို့အနှိုင်းမဲ့ကုသိုလ် လူမှုကူညီရေးအသင်း) လၢတ်ႈတီႈၽူႈတွႆႇႁွၵ်ႈဝႃႈ “ ၵႃး မၢၼ်ႇလူင်ႇၼႆႉ လုၵ်ႉတၢင်းမူႇၸေႊမႃး။ ၼႂ်းၵႃးၼၼ်ႉ မီးၵူၼ်းမႃးၸွမ်း 27 ၵေႃႉ။ ၼႂ်း 27 ၵေႃႉၼၼ်ႉ လႆႈလူႉတၢႆထင်တီႈ ၵေႃႉၼိုင်ႈ၊ ဢၼ်မၢတ်ႇၸဵပ်းၸွမ်းၵေႃႈမီး လၢႆလၢႆၵေႃႉၼင်ႇၵဝ်ႇ ” ဝႃႈၼႆ။

ဢွင်ႈတီႈဢၼ်ၵႃးပိၼ်ႈၶႂမ်ႈၼႆႉ ၵႃႈၵွၼ်ႇပူၼ်ႉမႃးၵေႃႈ ၵႆႉၵႆႉပိၼ်ႈ။ မိူဝ်ႈပူၼ်ႉမႃး ဢမ်ႇပႆႇႁိုင် ၵႃးတၢင်ႇၵုၼ်ႇ မႃးပိၼ်ႈၶႂမ်ႈ၊ ၵမ်းၼႆႉသမ်ႉ ပဵၼ်ၵႃးလူင် တၢင်ႇၵူၼ်းဢွၵ်ႇၶၢဝ်းတၢင်း မႃးပိၼ်ႈၶွမ်ႈ ဝႃႈၼႆ။

ၸၢႆးတူး သႅၼ်ဝီ ၽူႈလႆႈႁူပ်ႉႁၼ်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ဢွင်ႈတီႈလူင်းလွႆၼၼ်ႉ ၵႃးၵႆႉပိၼ်ႈဢေႃႈ။ ၵႃးၼႆႉ ၵေႃႈ မၼ်းဢမ်ႇၵုမ်း လႆႈႁႅင်းမၼ်းသေ လေႃႇတမ်သႂ်ႇႁၢၼ်ႉ ၶၢႆၶဝ်ႈၽၵ်း ႁိမ်းၶၢင်ႈတၢင်းၼၼ်ႉလႄႈ လႆႈဢဝ်ၵႃး ပိၼ်ႈၵႂႃႇ ၶႃႈဢေႃႈ” ဝႃႈ ၼႆ။

ၼိူဝ်တၢင်းလူင် မူႇၸေႊ – ၵူတ်ႉၶၢႆ – သႅၼ်ဝီ – လႃႈသဵဝ်ႈ – သီႇပေႃႉ – ၵျွၵ်ႉမႄး – ဝဵင်းလိူဝ်ႇၼႆႉ ၵႃးတၢင်ႇၵူၼ်း၊ ၵႃးတၢင်ႇၶူဝ်းၵုၼ်ႇသိၼ်ၵႃႉ ၵႂႃႇမႃးၼမ် ၽေးဢုပၢတ်ႈၵေႃႈ ၵႆႉၵိူတ်ႇၶိုၼ်ႈ၊ ၶူဝ်/သဵၼ်ႈတၢင်းၵႆႉၶၢတ်ႇ၊ ဢၼ်လေႃႇတမ်ၵူၼ်းတၢႆၵေႃႈ ၵႆႉၵႆႉမီးယူႇတႃႇသေႇ။ မိူဝ်ႈလိူၼ်ပူၼ်ႉၼၼ်ႉသမ်ႉ ၼႂ်းၵႄႈၵူတ်ႉၶၢႆ တင်း သႅၼ်ဝီၼႆႉၵူၺ်းၼင်ႇၵဝ်ႇ မီးၵႃးလမ်းၼိုင်ႈ ႁေႃႈဝႆးသေ ၽႃႇတမ် ၺႃးလုၵ်ႈဢွၼ်ႇႁဵၼ်းၵေႃႉၼိုင်ႈ လႆႈလူႉတၢႆထင်တီႈ ဝႃႈၼႆ။