ၵူၼ်းဝၢၼ်ႈၵူၼ်းမိူင်း ၼႂ်းမိူင်းတႆး ပတ်းပိုၼ်ႉ ဢၼ်ထုၵ်ႇထၢင်ႇထိူမ်ဝႃႈ တိတ်းၸိူဝ်ႉမႅင်း 19 သေ ၺႃး ၾၢႆႇပၢႆးယူႇလီ ၵူတ်ႇထတ်းပႂ်ႉတူၺ်းငဝ်းလၢႆး တီႈႁူင်းယႃ တင်းမူတ်းမီး 93 ၵေႃႉ။
ဝၼ်းတီႈ 3/4/2020 ၵူၼ်းမိူင်းၸိူဝ်းထုၵ်ႇ ၾၢႆႇပၢႆးယူႇလီ ပႂ်ႉတူၺ်းဝႆႉ ၼႂ်း 93 ၵေႃႉၼၼ်ႉ တႃႇ 29 ၵေႃႉ ယူႇတီႈ မေႃယႃၶဝ် ပၼ်ၶႂၢင်ႉလူင်းႁူင်းယႃမိူဝ်းယဝ်ႉ ယၢမ်းလဵဝ်ၵိုတ်းၵူၼ်း 64 ၵေႃႉ – ဝႃႈၼႆ။
Dr. မဵဝ်းထုၼ်း ၽွင်းလူင်ၾၢႆႇပၢႆးပိူင်ၵူၼ်း ၸုမ်းလူင်ပွင်ၸိုင်ႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၵူၼ်းပဵၼ် ဢၼ်ထၢင်ႇထိူမ် မီး 57 ၵေႃႉ။ တီႈၵျွၵ်ႉမႄး ဢၼ်လႆႈထူပ်းႁၼ် ၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ၵေႃႉ႞ၼၼ်ႉ ပၢႆးယူႇလီမၼ်းၸၢႆးလီၶိုၼ်ႈမႃးယဝ်ႉ” ဝႃႈၼႆ။
ႁွင်ႈၵၢၼ်ၾၢႆႇပၢႆးယူႇလီ လူင်ပွင်ၸိုင်ႈမိူင်းတႆး လူင်းပၼ်ပိုၼ်ႉႁူႉ တႃႇႁႂ်ႈၵူၼ်းမိူင်း ၵႆယၢၼ် တၢင်းပဵၼ်ၶူဝ်ႊဝိတ်ႉ 19 ၊ ၸိူင်ႉၼၼ်ၼင်ႇၵဝ်ႇ တပ်ႉသိုၵ်းၸိုင်ႈတႆး RCSS/SSA ၊ ပႃႇတီႇမႂ်ႇသုင် ၸိုင်ႈတႆး SSPP/SSA ပႃးၸဵမ်ၸုမ်းမိူင်းလႃး၊ ၸုမ်းဝႃႉ ၵေႃႈ ၶဵင်ႈၶႅင် ၵူတ်ႇထတ်းပၢႆးယူႇလီ ၵူၼ်းၵႂႃႇမႃး ၼႂ်းပိုၼ်ႉတီႈ ၸုမ်းလႂ်ၸုမ်းၼၼ်ႉၵုမ်းၵမ်။
ၼႂ်းမိူင်းႁူမ်ႈတုမ် ပတ်းပိုၼ်ႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ မီး 20 ၵေႃႉ။ တၢႆ ၵႂႃႇၵေႃႉၼိုင်ႈ။ ယၢမ်းလဵဝ် ဢၼ်ပႂ်ႉတူၺ်းငဝ်းလၢႆးဝႆႉ မီး 644 ၵေႃႉ၊ ၵူၼ်းၸိူဝ်း ၵူတ်ႇထတ်းလိူတ်ႈ လႄႈ ၸိူဝ်ႉမႅင်းသေ ပႂ်ႉထွမ်ႇၵႂၢမ်းတွပ်ႇ တီႈႁွင်ႈၵၢၼ်ၾၢႆႇပၢႆးယူႇလီသမ်ႉ မီး 90 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ