ၼႂ်းၸိုင်ႈတႆး ပွတ်းၸၢၼ်း ၸႄႈဝဵင်းလၢင်းၶိူဝ်း မိူင်းပၼ်ႇ တင်ႈလၢၼ်ႇၵူတ်ႇထတ်းလူမ်းမႆႈ ႁူဝ်ဝဵင်းႁၢင်ဝဵင်း တၢင်းၶဝ်ႈဢွၵ်ႇ ယႅၵ်ႈၵူၼ်းၶႆႈၵူၼ်းပဵၼ် တႃႇၵုမ်းၵမ် ၸိူဝ်ႉမႅင်း ၶူဝ်ႊဝိတ်ႉ 19 တေဢမ်ႇၽႄႈၸပ်းၵၼ်။

ယူႇတီႈႁွင်ႈၵၢၼ်ပၢႆးယူႇလီ လူင်ပွင်ၸိုင်ႈ၊ ၽူႈၵွၼ်းၸႄႈဝဵင်း၊ ပလိၵ်ႈ လႄႈ တပ်ႉသိုၵ်း ႁူမ်ႈၵၼ် ပႂ်ႉၵူတ်ႇထတ်း တၢင်း ၶဝ်ႈဢွၵ်ႇ ၵူၼ်းၵႂႃႇမႃး ၵူၼ်းဢွၵ်ႇတႃႈပႆတၢင်း၊ တင်ႈလၢၼ်ႇၵူတ်ႇထတ်း ႁူဝ်ဝဵင်း ႁၢင်ဝဵင်းတၢင်းၶဝ်ႈဢွၵ်ႇ ၼိူဝ်သဵၼ်ႈတၢင်းလူင် မိူင်းပၼ်ႇ – လၢင်းၶိူဝ်း ဝႃႈၼႆ။

ၸၢႆးၶိူဝ်းတႆး ပေႃႈၾႃႉမႄႈမိူင်း မိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ “တီႈဝဵင်းလၢင်းၶိူဝ်း ၼႆႉၵူတ်ႇထတ်းမႃးမီး ၶၢဝ်းတၢင်း မွၵ်ႈ 20 ဝၼ်း ၼႆႉယဝ်ႉ။ တႄႇဢဝ် ယၢမ်းၵၢင်ၼႂ် ထိုင်ၵၢင်ၶမ်ႈ 9 မူင်း ၵူႈဝၼ်း။ တီႈမိူင်း ပၼ်ႇႁဝ်းၶႃႈတႄႉ ဢၼ်ဝႃႈ ပႂ်ႉတူၺ်းၵူၼ်း လုၵ်ႉတီႈၵႆမႃး တၢင်းၶၢဝ်းတၢင်း 14 ဝၼ်းၵေႃႈပႆႇမီး။ ဢၼ်ထၢင်ႇထိူမ်(ငမ်းငဝ်း) သေ ၶိုၼ်ႈႁူင်းယႃ ၸိူဝ်းၼႆႉၵေႃႈ ပႆႇမီး သေၵေႃႉ၊ ဢၼ်ယူႇဝႆႉၼွၵ်ႈ ဝၢၼ်ႈသေ ပႂ်ႉတူၺ်း 14 ဝၼ်းၵေႃႈပႆႇမီး ” ဝႃႈၼႆ။

တီႈဝဵင်းမိူင်းၼၢႆးၵေႃႈ ၵူၼ်းၸိူဝ်းၶီႇၵႃးလုၵ်ႉတူၼ်ႈတီး မႃးၼၼ်ႉ လႆႈမႃးၶဝ်ႈတီႈၵဵတ်ႉလၢၼ်ႇ ဢၼ်ၸဝ်ႈၼႃႈတီႈ ၵူတ်ႇထတ်းပၢႆးယူႇလီ။ သင်မီးလူမ်းမႆႈတႄႉ ထုၵ်ႇၵမ်းတူဝ်သေ ထတ်း တူၺ်း ပၢႆးယူႇလီၵေႃႈမီး၊ ၵူၼ်းၸိူဝ်းလုၵ်ႉတၢင်ႇတီႈသီႇလႅၼ်မႃး ဢၼ်ထုၵ်ႇၵုမ်းတူဝ် ပႂ်ႉတူၺ်း 14 ဝၼ်းၵေႃႈမီး။

ၸၢႆးၶိူဝ်းတႆး လၢတ်ႈဝႃႈ “ ပဵၼ်ၵူၼ်းထုင်ႉလိၼ်ပဵင်း ဢၼ်ၵႂႃႇႁဵတ်းၵၢၼ်တၢင်း မိူင်းတူၼ်၊ မိူင်းသၢတ်ႇ၊ ၼႃးၵွင်းမူး၊ ပုင်ႇပႃႇ ၶႅမ် ၸိူဝ်းၼၼ်ႉသေ ပွၵ်ႈမႃး။ တေပွၵ်ႈမိူဝ်းတၢင်းမိူင်းၶဝ်ၼၼ်ႉယဝ်ႉ။ တီႈမိူင်း ပၼ်ႇတႄႉ လုၵ်ႉဢဝ်တၢင်းတႃႈသၢင်းသေ တေၶဝ်ႈဝဵင်းတႄႉ ဢမ်ႇၵူတ်ႇ။ ဢၼ်ၵူတ်ႇတႄႉ ၵူတ်ႇတီႈတၢင်းဢွၵ်ႇဝဵင်းၵူၺ်း” ဝႃႈၼႆ။

သိုပ်ႇလၢတ်ႈဝႃႈ “တၢင်းပဵၼ်ၼႆႉ လီၵူဝ်ၶႃႈဢေႃႈ ပေႃးပဵၼ်မႃးၼႆယၢပ်ႇတႄႉၶႃႈ ဢွၼ်တၢင်းသုတ်း တေတုမ်ႉတိူဝ်ႉ ၼႃႈႁိူၼ်းႁဝ်း၊ ယဝ်ႉၵေႃႈ တေတုမ်ႉတိူဝ်ႉၵူၼ်းၼႂ်းပွၵ်ႉႁဝ်း၊ လိူဝ်ၼၼ်ႉ တေတုမ်ႉ တိူဝ်ႉၵူၼ်းမိူင်းလႄႈ တေတုမ်ႉတိူဝ်ႉၶႃႈႁႅမ်ၸိူဝ်ႉၶိူဝ်းတႆးႁဝ်းၶိုၼ်း မၢၵ်ႇၵွင်ႈပိူၼ်ႈဢမ်ႇတႅၵ်ႇ သေလုၵ်ႈတေမႃးဢဝ် ၸိူဝ်ႉၶိူဝ်းႁဝ်းမူၺ်ႉၼႆႉ မၼ်းဢမ်ႇထုၵ်ႇလီပဵၼ် ၵွပ်ႈပိူဝ်ႈႁဝ်းၵေႃႉလဵဝ်၊ ငိုၼ်းၶမ်းၼႆႉ မေႃႁႃ မေႃသဵင်ႈၵႂႃႇ။ ၸၢတ်ႈပၢၼ်ႁဝ်းၼႆႉ ႁႃဢမ်ႇလႆႈထႅင်ႈယဝ်ႉ။ ၵဵဝ်ႇၵပ်းလွင်ႈၼႆႉ ယႃႇပေတူၺ်းပုၼ်ႈသုၼ်ႇတူဝ်သေ ယဝ်ႉၵေႃႈ ဢမ်ႇၶႂ်ႈပဵၼ် ၵူၼ်းတႅမ်ႈပိုၼ်း ႁၢႆႉဝႆႉၼၼ်ႉၶႃႈ” ဝႃႈၼႆ။

မိူဝ်ႈဝၼ်းတီႈ 31/3/2020 ယၢမ်းၵၢင်ၶမ်ႈ ၸဝ်ႈၼႃႈတီႈၾၢႆႇပၢႆးယူႇလီ ဝဵင်းလၢင်းၶိူဝ်း ဢဝ်ရူတ်ႉၵႃး ႁူင်းယႃ မိူဝ်းႁပ်ႉသင်ႇ ၶႃႇၸဝ်ႈ တီႈတိူၵ်ႈၵမ်မထၢၼ်း ၼမ်ႉသၢႆးမႃးႁူင်းယႃ လၢင်းၶိူဝ်း တင်းမူတ်း 5 တူၼ်။ ထုၵ်ႇထၢင်ႇထိူမ် ပႂ်ႉတူၺ်းၸိူဝ်ႉမႅင်း ၶူဝ်ႊဝိတ်ႉ 19 ဝႆႉ – ယွၼ်ႉပၢႆးယူႇလီၶဝ် ၸဝ်ႈဢမ်ႇပေႃးၶႅမ်ႉလႅပ်ႈ -ဝႃႈၼႆ။

ဝၼ်းမိူဝ်ႈၼႆႉ ယၢမ်းၵၢင်ၶမ်ႈ 8 မူင်း ၶေႃႈတွပ်ႇလွင်ႈၵူတ်ႇထတ်းတၢင်းပဵၼ် သူင်ႇမႃးထိုင်လၢင်းၶိူဝ်းၶိုၼ်းဝႃႈ တင်း 5 ၸဝ်ႈ 5 တူၼ် ဢမ်ႇမီးၸိူဝ်ႉမႅင်း မေႃယႃလူင် တီႈႁူင်းယႃလၢင်းၶိူဝ်း တွၵ်ႊတိူဝ်ႊမွင်ႇမွင်ႇတၢၼ်း ပိုၼ်ၽၢဝ်ႇၼင်ႇၼႆ။

တၢင်းပဵၼ် ၸိူဝ်ႉမႅင်း ၶူဝ်ႊဝိတ်ႉ 19 ၼႆႉ ၽႄႈၸွတ်ႇ တင်းလုမ်ႈၾႃႉ၊ မိူင်းႁူမ်ႈတုမ် ပတ်းပိုၼ်ႉ ၵူၼ်း တိတ်း တၢင်းပဵၼ် ၸမ်ထိုင် 20 ၵေႃႉ၊ ဢၼ်လူႉတၢႆ မီးၵေႃႉၼိုင်ႈ၊ ထုၵ်ႇထၢင်ႇထိူမ် ပႂ်ႉတူၺ်းယူႇ မီး ၼပ်ႉႁူဝ်ပၢၵ်ႇ။ မိူင်းဢၼ်ယူႇႁိမ်းၵိၼ်ၸမ် ၼႂ်းမိူင်းထႆး ၵူၼ်းတိတ်းၸပ်း မီး 1,000 ပၢႆ လူႉတၢႆ 19 ၵေႃႉ။ တၢင်းပဵၼ်ၼႆႉ တႄႇမႃးမိူင်းၶႄႇ ၽႄႈၸွတ်ႇလုမ်ႈၾႃႉ၊ မိူင်းဢမေႊရီႊၵၼ် ၵူၼ်းၸပ်း တၢင်းပဵၼ်သႅၼ်ပၢႆ ၼမ်တီႈသုတ်း။ မိူင်းဢီႊတလီႊတႄႉ ၵူၼ်းတၢႆ ၼမ်လိူဝ် ပိူၼ်ႈတီႈသုတ်း။