ငဝ်ႈငုၼ်းသင်ႇၶႃႇ ၸိုင်ႈတႆး ပွင်ႇၶၢဝ်ႇထိုင် သင်ႇၶႃႇၸဝ်ႈလႄႈ ၵူၼ်းမိူင်း ၵူႈၸႄႈဝဵင်း ႁႂ်ႈၵိုတ်းလိုဝ်ႈ လွင်ႈၶိုၼ်ႈၵျွင်း လွင်းမွၵ်ႇ ၽွင်းလိူၼ်ႁႃႈ သၢင်းၵျၢၼ်ႇ တေထိုင်ၼႆႉ ဝႃႈၼႆ။

မိူဝ်ႈၼႆႉ ဝၼ်းတီႈ 3/4/2020 ယူႇတီႈငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈတႆး ဝတ်ႉပိတၵၢတ်ႈ ဝဵင်းပၢင်လူင် ပိုၼ်ၽၢဝ်ႇ ပွင်ႇလႅင်းထိုင် သင်ႇၶႃႇၸဝ်ႈ လႄႈ ၵူၼ်းမိူင်းၵူႈၸႄႈဝဵင်း ၽွင်းလိူၼ်ႁႃႈ သၢင်းၵျၢၼ်ႇ ၼႂ်းပီၵေႃးၸႃႇ 1381-1382 ၼႆႉ ႁႂ်ႈ ၵိုတ်းလိုဝ်ႈလွင်ႈၶိုၼ်ႈၵျွင်းလွင်းမွၵ်ႇၵၼ်သေၵမ်း ယွၼ်ႉတၢင်းပဵၼ်ၶူဝ်ႊဝိတ်ႉ 19 ဢၼ်လၢမ်းၽႄႈယူႇႁၢဝ်ႈႁႅင်းၼႆႉ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ ပွင်ႇလႅင်းထိုင်ၼၼ်ႉဝႃႈ “ ႁႂ်ႈၵိုတ်းလိုဝ်ႈ လွင်ႈၶိုၼ်ႈၵျွင်း လွင်းမွၵ်ႇ ပီၵဝ်ႇ ပီမႂ်ႇ ႁူမ်ႈၵၼ်။ ႁႂ်ႈၵိုတ်း လိုဝ်ႈ လွင်ႈၵၼ်ႇတေႃးၵျွင်းတႂ်ႈ ၵျွင်းၼိူဝ် ႁူမ်ႈၵၼ် ၵူႈတီႈတီႈသေၵမ်း” ဝႃႈၼႆ။

လိူၼ်ႁႃႈ သွၼ်းၼမ်ႉပီၼႆႉ ဝၼ်းတီႈ 12/4/2020 ႁပ်ႉသၢင်းၵျၢၼ်ႇ၊ ဝၼ်းတီႈ 13/4/2020 ပဵၼ်ဝၼ်းသၢင်းၵျၢၼ်ႇတူၵ်း ဝၼ်းတီႈ 14 လႄႈ 15/4/2020 ပဵၼ်ဝၼ်းၼဝ်ႈ၊ ဝၼ်းတီႈ 16/4/2020 ပဵၼ်ဝၼ်းသၢင်းၵျၢၼ်ႇၶိုၼ်ႈ။

ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉ လၢမ်းၽႄႈၸွတ်ႇတူဝ်ႈလုမ်းၾႃႉသေ မီးၵူၼ်းလူႉတၢႆလႄႈ တိတ်းၸပ်းတၢင်းပဵၼ် တင်းၼမ်လၢႆ ယဝ်ႉလႄႈ ၵႃႈပဵၼ်ပွႆးလၢမ်းၼႂ်းမိူင်းမၢၼ်ႈမိူင်းတႆး သင်ႇႁၢမ်ႈဝႆႉမူတ်းယဝ်ႉ။ တေႃႇထိုင်ဝၼ်းမိူဝ်ႈၼႆႉ ၵူၼ်းမိူင်းတႆးတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ-19 ယဝ်ႉၵေႃႉၼိုင်ႈ။

ယူႇတီႈ ႁွင်ႈၵၢၼ်ပႂ်ႉတူၺ်းတၢင်းပဵၼ်ၶူဝ်ႊဝိတ်ႉ 19 ၼႂ်းလုမ်ႈၾႃႉ woldometers ၼႆႉ ဢွၵ်ႇဝႆႉဝႃႈ တေႃႈလဵဝ် ၵူၼ်းၸပ်း တၢင်းပဵၼ် တင်းမူတ်းမီး 1,030,654 ၵေႃႉ၊ တၢႆ 54,231 ၵေႃႉ၊ ယႃၶႅၼ်း 220,011 ၵေႃႉ။